ئەنگلىيە «پۇل-مۇئامىلە ۋاقىت گېزىتى» تور بېكىتىنىڭ 18-يانۋاردىكى خەۋىرىگە قارىغاندا، ياپونىيە باش ۋەزىرى ئابى شىنزو رۇسىيەنى زىيارەت قىلىش داۋامىدا پۇتىنغا ياخشىچاق بولۇش ئۈچۈن، غەرب ئەللىرىنى رۇسىيە زۇڭتۇڭى پۇتىن بىلەن بولغان ھەمكارلىقنى ئەسلىگە كەلتۈرۈشىنى مۇراجىئەت قىلغان، چۈنكى ئۇنىڭ قارىشىچە، رۇسىيە بىلەن كېلىشىم تۈزۈش ئوتتۇرا شەرقتىكى نۇرغۇنلىغان مۇھىم مەسىلىلەرنى ھەل قىلىشتا ئىنتايىن مۇھىم رول ئوينايدىكەن.

      ئابى شىنزو سەئۇدى بىلەن ئىراننىڭ مۇناسىۋىتىنىڭ يامانلىشىپ قېلىشى، سۈرىيە ئىچكى ئۇرۇشى ۋە ھەمدە تېررورىزم كۈچلىرىنىڭ تەھدىتى قاتارلىق مەسىلىلەرنى تىلغا ئېلىپ مۇنداق دېگەن: بىز رۇسىيەنىڭ بۇ ئىشلارغا قاتنىشىشىغا بەكمۇ ئېھتىياجلىق. ئۇنىڭ دېيىشىچە، ئۇ يەتتە دۆلەت گۇروھىنىڭ 2016-يىللىق رەئىسى بولۇش سالاھىيىتى سۈپىتىدە موسكۋانى زىيارەت قىلىشنى ئۈمىد قىلىدىكەن، ۋە ھەمدە پۇتىننى توكيوغا زىيارەتكە كېلىشكە تەكلىپ قىلىدىكەن. ئابى شىنزو مۇنۇلارنى بىلدۈردى: ياپونىيە رايون ۋە پۈتكۈل دۇنيانىڭ مۇقىملىقى ئۈچۈن ياخشى بولغان ھەل قىلىش تەدبىرى ئىزدەۋاتىدۇ، بۇنىڭ ئۈچۈن زۇڭتۇڭ پۇتىن بىلەن مۇۋاپىق ۋاقىتتا سۆھبەت ئۆتكۈزۈش ئىنتايىن مۇھىم.

      ئابى شىنزو زىيارەت داۋامىدا يەنە جۇڭگونىڭ دېڭىز رايونىدىكى ھەرىكەتلىرىنى تىلغا ئېلىپ «ياپونىيە جۇڭگو تەرەپنىڭ شەرقىي دېڭىز ۋە جەنۇبىي دېڭىز رايونىنى ئۆز بېشىمچىلىق بىلەن ئۆزگەرتىش ئېلىپ بېرىشىغا قارشى تۇرىدۇ» دېگەن، ھەمدە خەلقئارا جەمئىيەتنىڭ بۇنىڭغا قارتا ئاگاھلاندۇرۇش بېرىشىنى مۇراجىئەت قىلغان. ئۇ جۇڭگو ئىقتىسادىنى تىلغا ئالغاندا يەنە «جۇڭگو چوقۇم خەلقئارا ئىقتىسادىنىڭ پىرىنسىپىغا بويسۇنۇشى كېرەك» دېگەن.

    جەنۇبىي دېڭىز مەسىلىسىگە قارىتا، جۇڭگو تەرەپ كۆپ قېتىم مۇنۇلارنى ئېنىق بىلدۈرۈپ «ياپونىيە جەنۇبىي دېڭىز مەسىلىسىگە بىۋاسىتە چېتىشلىق دۆلەتلەردىن ئەمەس، ياپونىيەنىڭ جەنۇبى دېڭىز مەسىلىسىگە ئارىلىشىدىغان ھەققى يوق» دېگەن. لېكىن ياپونىيە يېقىندىن بۇيان جۇڭگونىڭ جەنۇبىي دېڭىز مەسىلىسىدە «چوڭ سەكرەپ» جۇڭگونى ئەيىبلەپلا قالماي، ھەتتا يەنە ئامېرىكا بىلەن بىرگە جەنۇبىي دېڭىز رايونىدا چارلاش ئېلىپ بېرىشقا ئۇرۇنغان.

   ياپونىيە تاراتقۇلىرىنىڭ 12-يانۋاردىكى خەۋىرىگە قارىغاندا، ياپونىيە ھۆكۈمىتى جۇڭگو ھەربىي پاراخوتىنىڭ دياۋيۈ ئارىلىنى چارلاش ئېلىپ بارغانلىقىغا قارتا يېڭىدىن تاقابىل تۇرۇش فاڭجېنى تۈزۈپ چىققان بولۇپ، بۇنىڭدا ئەگەر جۇڭگو تەرەپنىڭ كېمىلىرى دياۋيۈ ئارىلىغا كىرگەن ھامان، ياپونىيە دېڭىز مۇھاپىزەتچىلەر ئارمىيەسىنىڭ ھەربىي پاراخوت ئەۋەتىپ جۇڭگونىڭ كېمىلىرىنى قوغلاپ چىقىرىدىغانلىقى بەلگىلەنگەن.