ئەنگلىيە كۈندىلىك پوچتا گېزىتىنىڭ 16-دېكابىردىكى خەۋىرىگە قارىغاندا، مېكسىكىنىڭ شىمالى قىسمىدىكى چىخۇاخۇا شتاتىنىڭ كاۋتىموك شەھىرىدىكى ساقچى دائىرىلىرى ھېچقانداق كۈچ سەرپ قىلمايلا بەش نەپەر زەھەر ئەتكەسچىسىنى تۇتۇۋالغان، ئەسلىدە بۇ بەش نەپەر ئەتكەسچى پىلاستىر بىلەن باغلىنىپ كوچىدىكى بىر چىراغ تۈۋرۈكىگە باغلىنىپ قويۇلغان بولۇپ، بۇ ئىشنى زادى كىمنىڭ قىلغىنىنى ھېچكىشى بىلمەيدىكەن.

       ئىگىلىنىشچە، بۇ بەش نەپەر كىشى «NewJuarez» زەھەر ئەتكەسچىلىك گۇروھىنىڭ ئەزالىرى بولۇپ، ئۇلار بۇنىڭ ئالدىدا بىر تاكسى شوپۇرىنى قەستلەپ ئۆلتۈرۈشكە چېتىشلىق ئىكەن. يولدىن ئۆتكۈچىلەر ئۇلارنىڭ بىر چىراغ تۈۋرۈكىگە باغلاقلىق ئىكەنلىكىنى كۆرۈپ دەرھال ساقچىلارغا مەلۇم قىلغان. نەق مەيداندا كۆرگۈچىلەرنىڭ ئېيتىشىچە، بۇ كىشىلەرنىڭ ئېغىزلىرىغا لاتا كەپلەنگەن، كۆزلىرى ئېتىۋېلىنغان ۋە ھەمدە قېلىن پىلاستىر ۋە ئارغامچا بىلەن كۈچىدىكى چىراغ تۈۋرۈكىگە باغلانغان ئىكەن.

  ئۇنىڭدىن باشقا، ئۇلارنىڭ يېنىدا يەنە تېخى بىر پارچە خەت بولۇپ، ئۇنىڭدا ئۇلارنىڭ «NewJuarez» زەھەر ئەتكەسچىلىك گۇروھىنىڭ ئەزالىرى ئىكەنلىكى يېزىلغان. بۇنىڭدىن ھەيران قېلىشقان ساقچىلار نۆۋەتتە بۇ ئىشنىڭ ھەقىقىي ئەھۋالىنى تەكشۈرۈۋاتقان بولۇپ «بۇ كىشىلەر سەييارە قەھرىمانلار تەرىپىدىن تۇتۇۋېلىنغانمۇ ياكى ئۇلار تۇرۇشلۇق زەھەر ئەتكەسچىلىك گۇروھىنىڭ دۈشمەنلىرى تەرىپىدىن تۇتۇپ ساقچىلارغا تاپشۇرۇل بېرىلگەنمۇ؟» دېگەن مەسىلىنى ئايدۇڭلاشتۇرماقچى بولغان.

    «NewJuarez»زەھەر ئەتكەسچىلىك گۇرۇھى ئاساسلىقى جارىز شەھىرىدە ھەرىكەت قىلىدىغان بولۇپ، بۇ جاي ئامېرىكىنىڭ دۆلەت چېگىرسى بىلەن قوشنا كېلىدۇ. دەل مۇشۇنداق قانخور، رەھىمسىز زەھەر ئەتكەسچىلىك گۇرۇھى مەۋجۇت بولۇپ تۇرغانلىقى ئۈچۈن جارىز شەھىرى مېكسىكىدىكى ئەڭ خەتەرلىك شەھەر دەپ قارىلىپ كەلگەن. ئامېرىكا زەھەرگە قارشى تۇرۇش ئىدارىسىنىڭ ئىستاتىستىكىسىغا ئاساسلانغاندا، «NewJuarez» زەھەر ئەتكەسچىلىك گۇروھىنىڭ ھەر ھەپتىلىك پايدىسى ئاز دېگەندىمۇ 200 مىليون دوللارغا يېتىدىكەن.