مەملىكەتلىك ئەرزىيەت خىزمىتى مەخسۇس تېمىلىق يىغىنى 4-نويابىر ۋۇخەندە ئېچىلدى. جۇڭگو كومپارتىيەسى مەركىزى كومىتېتى شۇجىچۈسىنىڭ شۇجىسى، دۆلەت كومىسسارى قۇشۇمچە گوۋۇيۈەننىڭ باش كاتىپى ياڭ جىڭ يىغىنغا قاتناشتى ھەمدە سۆز قىلىپ مۇنۇلارنى تەكىتلىدى: پارتىيە 18-نۆۋەتلىك مەركىزى كومىتېتى 4-ئومۇمىي يىغىنى روھىنى ئەستايدىل ئىزچىل ئەمەلىيلەشتۈرۈپ، تىنچ جۇڭگو قۇرۇلۇشى يىغىنىنىڭ مۇناسىۋەتلىك ئورۇنلاشتۇرۇشلىرىنى چوڭقۇرلاشتۇرۇش بويىچە، قانۇن ئارقىلىق ئىدارە قىلىش تەپەككۇرى ۋە قانۇن ئارقىلىق ئىدارە قىلىش ئۇسۇلى بىلەن ئەرزىيەت خىزمىتى تۈزۈم ئىسلاھاتىنى چوڭقۇر ئىلگىرى سۈرۈپ، تەپەككۇر ئۇسۇلىدا يېڭىلىق يارىتىپ، ئىجتىمائىي زىددىيەتلەرنى پەسەيتىش ئىقتىدارى ۋە سەۋىيەسىنى داۋاملىق ئۆستۈرۈش كېرەك.

ياڭ جىڭ مۇنداق دەپ كۆرسەتتى: جايلاردىكى ئالاقىدار تارماقلار قانۇن بويىچە مەمۇرىيەت يۈرگۈزۈشنى ئومۇميۈزلۈك ئەمەلىيلەشتۈرۈپ، تۈزەش سالمىقىنى زورايتىپ، زور تەدبىر بەلگىلەش ۋە مەمۇرى قانۇن ئىجراسى مەسئۇلىيىتىنى سۈرۈشتە قىلىش مېخانىزمىنى مۇكەممەللەشتۇرۇشى، ھەر دەرىجىلىك كادىرلار چەكلىمە ئىچىدە خىزمەت قىلىشقا ماسلىشىشى، نازارەت ئاستىدا ئىش قىلىشقا ئادەتلىنىشى، ئەرزىيەت مەسىلىسىنىڭ يۈز بېرىشىنى مەنبىيىدىن تۈزىشى ۋە ئازايتىشى كېرەك.