بۇ قېتىمقى ھۆل-يېغىنلىق ھاۋارايى ئۈرۈمچىدىكى ئاممىۋى ئاپتوبوس شوپۇرلىرىنى ئەنسىزچىلىككە سېلىپ قويدى. 15-ئىيۇن مۇخبىرنىڭ ئۈرۈمچى شەھەرلىك ئاممىۋى ئاپتوبوس گۇرۇھى چەكلىك شىركىتىدىن ئىگىلىشىچە، ئاممىۋى ئاپتوبۇس شوپۇرلىرى يامغۇر سۈيى يىغىلىپ قالغان يول بۆلەكلىرىدە ماڭغاندا سۈرئەتنى ئاستىلىپ مېڭىشى كېرەككەن، ئەگەر يامغۇر سۈيى بىر قەدەر كۆپ يىغىلىپ قالغان، بىراق كەينىگە بۇرۇلۇپ مېڭىش چەكلەنگەن يول بۆلەكلىرىدە كەينىگە يانسا بولىدىكەن.
503-يول ئاممىۋى ئاپتوبوس شوپۇرى گۇي جۈن 9-ئىيۇندىكى قاتتىق يامغۇرلۇق كۈننى ئەسلەپ «ناۋادا قاتتىق يامغۇر ياغسا بىر قىسىم ئويمانلىق يول بۆلەكلىرىدە يامغۇر سۈيى تېرەن يىغىلىپ قالىدۇ، بۇنداق ئەھۋالدا ئاپتوبوسلار بۇ يول بۆلەكلىرىدىن ئۆتۈش ئىمكانىيىتى بولمىغانلىقتىن كەينىمىزگە يانىمىز»، دېدى.
ھۆل-يېغىنلىق ھاۋارايى كۆرۈلگەندە، ئۈرۈمچى شەھەرلىك ئاممىۋى قاتناش گۇرۇھى قارىمىقىدىكى ھەر قايسى ئاپتوبوس ئەترەت رەھبەرلىرى 1-سەپكە بېرىپ تەكشۈرۈش ئېلىپ بارىدىكەن، يوللاردا يامغۇر سۈيى يىغىلىپ قېلىشتەك ئەھۋال بايقالسا يىغىلىپ قالغان سۇنىڭ چوڭقۇرلۇق دەرىجىسىگە ئاساسەن ئاممىۋى ئاپتوبوس شوپۇرلىرىغا سۈرەتنى ئاستىلىتىش ياكى كەينىگە يېنىش تەلىپىنى قويىدىكەن، شۇنىڭ بىلەن بىرگە ئاپتوبوس ئەترەتلىرى سۆرەش ئاپتوموبىللىرىنى ياخشى ئورۇنلاشتۇرۇپ، پەۋقۇلئاددە يۈز بەرگەن ھادىسىلەرگە تاقابىل تۇرىدىكەن.