جاھان ئاگېنتلىقى 4-مارت خەۋىرى؛ لەگلەك تورى تەرجىمىسى: روسىيە-مىسىر ھەربىي ھەمكارلىقى ئورتاق كومىتىتىنىڭ تۇنجى يىغىنى ئىككى دۆلەت مۇداپىئە مىنىستىرلىرىنىڭ قاتنىشىشى بىلەن روسىيە پايتەختى موسكىۋادا ئېچىلدى. يىغىندىن كېيىن ئىككى دۆلەت ئارىسىدا ھەربىي ھەمكارلىق كېلىشىمى ئىمزالاندى.
يىغىنغا روسىيە مۇداپىئە مىنىستىرى سېرگىي شويگۇ ۋە مىسىر مۇداپىئە مىنىستىرى ۋە ھەربىي سانائەت مىنىستىرى سىدقى سۈبھى سەئىد ئەھمەد قاتناشتى.
ھەربىي ساھەدىكى ھەمكارلىقنىڭ 2014-يىللىق نەتىجىلىرى ۋە 2015-يىلىغا ئالاقىدار ئەھۋاللىرى باش تىما قىلىنىدىغان يىغىندا روسىيە بىلەن مىسىر ئارىسىدىكى ھەربىي ھەمكارلىق كېلىشىمى ئىمزالاندى.
ئىمزا مۇراسىمىدىن بۇرۇن، روسىيە مۇداپىئە مىنىستىرى شويگۇ، مىسىرلىق كەسىپدىشىغا، سابىق مىسىر پرېزىدېنتى جامال ئابدۇنناسىرغا ، شۇ دەۋردىكى سوۋىت رەھبىرى نىكىتا خۇرۇشېۋ تەرىپىدىن «لېنىن» ۋە «قىزىل يۇلتۇز» مېدالى بېرىلگەنلىكىنى ئېلان قىلغان 1964-يىلى 15-مايدىكى پراۋدا گېزىتىنى ھەدىيە قىلدى.

روسىيە پرېزىدېنتى پۇتىن ۋە مىسىر پرېزىدېنتى سىسى 10-فېۋرالدا قاھىرەدە ئۇچراشقان ئىدى. مىسىر پرېزىدېنتى سىسى، ئۇچرىشىشتا مىسىر بىلەن روسىيە ئارىسىدا ئەركىن سودا رايۇنى قۇرۇلۇشى قارار قىلىنغانلىقىنى ئېيتىپ، «ھەربىي تېمىلاردىكى ھەمكارلىقىمىزنى تەرەققى قىلدۇرىمىز، ئىقتىسادى مۇناسىۋەتلىرىمىزنى ھەم تەرەققى قىلدۇرۇش ھەققىدىمۇ كېلىشتۇق. ئىنىرگىيە ساھەسىدىكى مۇناسىۋەتلىرىمىزنى ھەم ئىلگىرى سۈرىمىز. شەرم ئەل-شەيختە ئۆتكۈزىلىدىغان مىسىرنى قوللاش يىغىنىغا ئالاقىدار ھۆرمەتلىك پۇتىنغا مەلۇمات بەردىم. ساياھەتچىلىك ساھەسىدىكى مۇناسىۋەتلەرنى تەرەققى قىلدۇرۇش ۋە تېخىمۇ كۆپ روسىيەلىك ساياھەتچىنىڭ مىسىرنى زىيارەت قىلىشىنى ئۈمىد قىلىمەن» دېدى.
روسىيە ئەرەب باھارىدىن كېيىن ئوتتۇرا شەرقتىكى تەسىرىنى كۈچەيتىش كۈرىشى قىلىۋاتىدۇ. سۇرىيەدە ئەسەد ھۆكۈمىتىنى قوللىغان پۇتىن، مىسىردا 3-ئىيۇل ھەربىي ئۆزگىرىشىگە ياردەم بەرگەن ۋە سىسىنىڭ يېنىدا تۇرغان. مىسىردا تېرور تەشكىلاتى دەپ ئېلان قىلىنغان مۇسۇلمان قېرىنداشلار تەشكىلاتى، روسىيە تەرىپىدىن 2003-يىلىدا قارا تىزىملىككە كىرگۈزۈلگەن ئىدى. ئۇكرائىنىيە كىرزىسىدە غەرب بىلەن قارشىلىشىپ قالغان موسكىۋا ھۆكۈمىتى، ئوخشاش يۈزلىشىشنى ئوتتۇرا شەرقتە ھەم داۋام قىلىۋاتىدۇ. روسىيە يېقىنقى ئايلاردا نىفىت باھاسىدىكى زور چېكىنىشنىڭ ئەڭ كۆپ تەسىرگە ئۇچرىغان دۆلەتلەر قاتارىدا.