رۇسىيە كىرېمىل سارىيىنىڭ باياناتچىسى دىمىترى پېسكوف 22-ماي: رۇسىيە زۆرۈر تەدبىرلەرنى قوللىنىپ، ئۇكرائىنا تۇتۇۋالغان رۇسىيەنىڭ ئىككى ئەسكىرىنى قۇتقۇزۇشقا تىرىشماقتا، دېدى. ئەمما ئۇكرائىنا بۇ ئىككى كىشى ئۇكرائىنانىڭ شەرقىي قىسمىدىكى ئەلئارا قوراللىقلارنىڭ ئۇرۇش قىلىشىغا ياردەملەشتى، دەپ ئەيىبلىدى.
رۇسىيەنىڭ خەۋىرىدە ئۇكرائىنا تۇتۇۋالغانلار رۇسىيە پۇقراسى، شۇڭا رۇسىيە زۆرۈر تەدبىرلەرنى قوللىنىپ ئۇلارنى قۇتۇلدۇرىدۇ، دېيىلدى.
ئۇكرائىنا ئارمىيەسى 17-ماي: شەرقىي قىسىمدىكى لۇگانسىك رايونىدا رۇسىيەنىڭ ئىككى ئەسكىرىنى قولغا چۈشۈردۇق، بۇ ئىككىيلەن قېچىشقا ئۇرۇنغاندا يارىلانغان، ھازىر ئۇكرائىنانىڭ ھەربىي دوختۇرخانىسىدا داۋالىنىۋاتىدۇ، دېدى.
رۇسىيە دۆلەت مۇداپىئە مىنىستىرلىقى 18-ماي جاۋاب قايتۇرۇپ: تۇتۇۋېلىنغانلار ھەقىقەتەن رۇسىيەلىك، ئەمما ئۇلار رۇسىيە قوراللىق قىسمىنىڭ ۋەزىپە ئۆتەۋاتقان ئەسكەرلىرى ئەمەس، دېدى ھەمدە ئۇكرائىنانى ئۇلارنى قويۇپ بېرىشكە دەۋەت قىلدى.
رۇسىيە دۆلەت دۇماسى، يەنى پارلامېنت تۆۋەن پالاتاسىنىڭ بەزى ئەزالىرى 22-ماي: رۇسىيە ئۆز پۇقرالىرى ئۈچۈن كۈرەش قىلىشى كېرەك، دېدى. دۆلەت دۇماسى دۆلەت مۇداپىئە كومىتېتىنىڭ رەئىسى ۋىلادىمىر كوموئىدوف: ئۇلارنىڭ كىم بولۇشىدىن، ۋەزىپە ئۆتەۋاتقان ئەسكەر بولۇش-بولماسلىقىدىن قەتئىينەزەر رۇسىيە ئۆز پۇقرالىرىدىن ۋاز كەچمەيدۇ، دېدى.
ھاكىمىيەت يۈرگۈزۈۋاتقان بىرلىككە كەلگەن رۇسىيە پارتىيەسىنىڭ مۇئاۋىن رەئىسى فىرانس كىرىنسيېۋىچ: بىز ئۇكرائىنادىن ئادەملىرىمىزنى قويۇپ بېرىشنى كۈچلۈك تەلەپ قىلىشىمىز ھەمدە مۆھلەت بېكىتىشىمىز لازىم، دېدى.
رۇسىيەنىڭ ئۇكرائىنادىكى باش ئەلچىخانىسىنىڭ ئەلچى دەرىجىلىك مەسلىھەتچىسى ئاندىرى ۋوروبىيوف 21-ماي: ئۇكرائىنا رۇسىيە دىپلوماتلىرىنىڭ رۇسىيەلىك ئىككى كىشىنى يوقلاش تەلىپىنى تېخى تەستىقلىمىدى، دېدى.
ئۇ مۇنداق دېدى: كونسۇل يوقلاش تەييارلىقىنى قىلىپ بولدى، ئەمما بىز ئۇكرائىنانىڭ يارىدارلارنى كېچىدىلا يوقلاشقا رۇخسەت قىلىشىدىن ئەنسىرەيمىز. بىزگە كېچە سائەت ئىككى ئۈچلەردە يوقلاش ئۇقتۇرۇلغان تەقدىردىمۇ تەييارلىقنى ياخشى قىلىمىز. چاتاق يېرى ئۈچ كۈن بولدى، يوقلاش ئىجازىتىگە تېخىچە ئېرىشەلمىدۇق.
ئۇكرائىنا كىرىزىسىنى ياراشتۇرۇۋاتقان ياۋروپا بىخەتەرلىك ۋە ھەمكارلىق تەشكىلاتى 21-ماي مۇنداق دېدى: تۇتۇپ تۇرۇلۇۋاتقان ئىككى ئەر كىشى ئۆزلىرىنىڭ رۇسىيە ئەسكىرى ئىكەنلىكى، ئۇكرائىنانىڭ شەرقىي قىسمىدىكى ئەلئارا قوراللىقلارغا ياردەم بېرىشكە ئەۋەتىلگەنلىكىنى ئىقرار قىلدى.

ياۋروپا بىخەتەرلىك ۋە ھەمكارلىق تەشكىلاتىنىڭ ۋەكىللىرى شۇ كۈنى دوختۇرخانىغا بېرىپ ئىككى رۇسىيەلىكنى يوقلىدى. ياۋروپا بىخەتەرلىك ۋە ھەمكارلىق تەشكىلاتى دوكلات ئېلان قىلىپ مۇنداق دېدى: بۇ ئىككىيلەن ئۆزلىرىنى بىز رۇسىيە فېدېراتسىيەسى قوراللىق قىسمىنىڭ بىر تارمىقىنىڭ ئەزاسى، شۇ چاغدا بىز ئۇ يەردە چارلاش ۋەزىپىسىنى ئۆتەۋاتاتتۇق دېدى. ئۇلار قوراللىق لېكىن ھۇجۇم قىلىش بۇيرۇقىنى تاپشۇرۇپ ئالمىغان. ئارىدىكى بىرسى: مەن بۇيرۇق بويىچە ئۇكرائىناغا بېرىپ، ئۈچ ئايدا بىر قېتىم ئالمىشاتتىم دېدى. ئىككىيلەن بىردەك ئۆزلىرىنىڭ ئۇكرائىناغا ۋەزىپە ئۆتەشكە بارغانلىقىنى ئېتىراپ قىلدى.
فىرانسىيە ئاخبارات ئاگېنتلىقى مۇنداق دېدى: بۇ ئىككىيلەن سوراق قىلىنغاندا ئۆزلىرىنىڭ رۇسىيە ئاخبارات ئىدارىسىدىن ئىكەنلىكى، ئىككى ئاي ئىلگىرى باشقا 200 ئادەم بىلەن ئۇكرائىنانىڭ شەرقىگە بارغانلىقىنى ئېيتقان.
رۇسىيە زۇڭتۇڭى پۇتىن بۇندىن ئىلگىرى مۇنداق دېدى: ئۇكرائىنا توقۇنۇشىغا قاتناشقانلار رۇسىيەلىك پىدائىي ياكى ھەربىيلىكتىن چېكىنگەن ئەسكەرلەر. ئالېكساندىروۋنىڭ رەپىقىسى رۇسىيە دۆلەتلىك تېلېۋىزىيە ئىستانسىسىنىڭ 20-مايدىكى بىر سۆھبەت پىروگراممىسىدا: ئالېكساندىروۋ 28 ياشتا، ئۇ ئۆتكەن يىلى دېكابىردا رازۋېدكا قىسمىدىن ئايرىلغان دېدى.
ئۇكرائىنا تېررورلۇق ھەرىكەتلىرىگە قاتناشتى دېگەن گۇمان بىلەن بۇ ئىككىيلەن ئۈستىدىن ئەرز قىلىپ، ناۋادا بۇ ئىككىيلەن سوتتا پۈتۈنلەي ئىقرار قىلسا، ئۇلارنى قويۇۋېتىمىز دەپ ۋەدە بەردى.
ئۇكرائىنانىڭ شەرقىدە توقۇنۇش پارتلىغاندىن كېيىن، ئۇكرائىنا بىلەن غەرب ئەللىرى رۇسىيەنى ئۇكرائىنانىڭ شەرقىدىكى چېچىلاڭغۇ ئەلئارا قوراللىقلارغا پەردە ئارقىسىدا قوماندانلىق قىلدى ھەمدە ئۇلارغا قورال-ياراق ۋە ئەسكەر ياردەم قىلىپ، ئۇلارنىڭ ئۇكرائىنا ھۆكۈمەت ئارمىيەسى بىلەن قارشىلىشىشىغا ياردەملەشتى دەپ ئەيىبلىدى. رۇسىيە ئۇكرائىنانىڭ شەرقىدىكى توقۇنۇشقا ھەربىي جەھەتتىن ئارىلاشقانلىقىنى ئىنكار قىلدى، ئالاقىدار ئەيىبلەشلەر ئامېرىكا قاتارلىق غەرب ئەللىرىنىڭ پۇتىن ھۆكۈمىتىنى ئاغدۇرۇشقا ئۇرۇنۇش، رۇسىيەنىڭ رايون مەنپەئەتىنى توسۇش ھەرىكىتىنىڭ بىر قىسمى دەپ ئەيىبلىدى.