قەززافىي «ئىسلام دۆلىتى» نىڭ قەد كۆتۈرۈشى ۋە ياۋروپاغا ھۇجۇم قىلىدىغانلىقى توغرىسىدا ئالدىن بېشارەت بەرگەنىكەن

     ئەنگلىيە «كۈندىلىك پوچتا گېزىتى» تور بېكىتىنىڭ 10-يانۋاردىكى خەۋىرىگە قارىغاندا، لىۋىيىنىڭ سابىق رەھبىرى قەززافىي ئىلگىرى ئەنگىلىيىنىڭ سابىق باش ۋەزىرى بىلايىرغا ئۆزىنىڭ ھوقۇقى تارتىۋېلىنسا، ئىسلام رادىكال كۈچلىرىنىڭ لىۋىيىنى كونترول قىلىدىغانلىقىنى ۋە ياۋروپانى بويسۇندۇرۇشنىڭ ئىسلام رادىكال كۈچلىرىنىڭ ئاخىرقى نىشانى ئىكەنلىكىنى ئەسكەرتكەنىكەن.

     قەززافىي بىلەن بىلايىرنىڭ 2011-يىلى تېلېفوندا پاراڭلاشقان خاتىرىسى يېقىندا ئاشكارىلانغان بولۇپ، بۇنىڭدا لىۋىيىنىڭ سابىق رەھبىرى قەززافىينىڭ بىن لادېن ۋە «بازا» تەشكىلاتىنىڭ ئافرىقا ۋە ئوتتۇرا شەرق رايونىدىكى تەسىر كۈچىنىڭ بارغانسېرى ئېشىۋاتقانلىقىدىن ئەندىشە قىلىۋاتقانلىقى ئاشكارىلانغان. قەززافىي گەرچە ئۆزىنىڭ لىۋىيىگە ھۆكۈمرانلىق قىلىۋاتقان بولسىمۇ، ئىسلام غازات ئۇرۇشىنىڭ شىمالىي ئافرىقا دۆلەتلىرىگە بۇزغۇنچىلىق قىلىۋاتقانلىقىنى، ناۋادا ئۆزىنىڭ ھاكىمىيىتى ئاغدۇرۇپ تاشلانسا، يېڭى بىر «ئىسلام دۆلىتى»نىڭ قەد كۆتۈرۈشىگە يېشىل چىراغ يېقىلىدىغانلىقىنى، بۇنىڭ تەسىرىدە نۇرغۇنلىغان مۇساپىرنىڭ ياۋروپا قۇرۇقلۇقىغا سەلدەك ئاقىدىغانلىقىنى ئالدىن ئاگاھلاندۇرغانىكەن.

        بىلايىر 2011-يىلى 25-فېۋرالدا قەززافىي بىلەن تېلېفوندا ئىككى قېتىم ئالاقىلىشىپ، ئۇنى بىخەتەر جايغا قېچىپ كېتىشكە ئۈندىگەنىكەن. سەككىز ئايدىن كېيىن، قەززافىي بىر يۇندى ئازگىلىدا تۇتۇلۇپ قالغاندىن كېيىن ئۇرۇپ ئۆلتۈرۈلگەن. تېلېفوندا پاراڭلىشىش خاتىرىسى يېقىندا تۇنجى قېتىم ئاشكارىلانغان. پارلامېنت ئەزالىرىنىڭ ئېيتىشىچە، قەززافىي خام خىيال قىلىشقا ئادەتلەنگەچكە، ئۇنىڭ ئىسلام رادىكال كۈچلىرىنىڭ لىۋىيىنى كونترول قىلىشىغا بولغان ئەندىشىسى ئېتىبارسىز قارالغان. ئەمما بۇ سابىق مۇستەبىتنىڭ «ئىسلام دۆلىتى»نىڭ قەد كۆتۈرۈشى ۋە لىۋىيە، ئىراق، سۈرىيىنىڭ ھەر قايسى جايلىرىدىكى نەچچە مىليون ئادەمنىڭ سەرسان-سەرگەردان بولۇپ كېتىدىغانلىقىدىن ئالدىن بېشارەت بەرگەنلىكى ئىسپاتلانغان.

      ئۇلار تېلېفوندا ئالاقىلەشكەندىن كېيىن، زادى نېمە ئىش يۈز بەردى؟ ئۈچ ھەپتىدىن كېيىن، ئەنگلىيەنى ئۆز ئىچىگە ئالغان «ش ئا ئە ت»نىڭ بومباردىمانچى ئايروپىلانلىرى لىۋىيىگە ھاۋا ھۇجۇمى قوزغىغان. ھاۋا ھۇجۇمىدا قەززافىي ھاكىمىيىتى گۇمران بولۇپ، قەززافىي شۇ يىلى ئۆكتەبىردە ئۇرۇپ ئۆلتۈرۈلگەن.

      بۇلتۇر روژدېستۋا بايرىمىنىڭ ئالدىدا، ئەنگلىيە پارلامېنتىنىڭ تۆۋەن پالاتاسى دىپلوماتىيە ئالاھىدە كومىتېتىدىكى پارلامېنت ئەزالىرى قەززافىينىڭ بىلايىر بىلەن بولغان مۇناسىۋىتى ۋە ئۇلار 2004-يىلى تۈزگەن «قۇملۇق كېلىشىمى»دىن گۇمانلانغان.