شىنخۇا ئاگېنتلىقى، بېيجىڭ، 18 – فېۋرال تېلېگراممىسى. مۇخبىرنىڭ يېقىندا دۆلەت تەرەققىيات ۋە ئىسلاھات كومىتېتىدىن ئىگىلىشىچە، ئېلىمىز بۇ يىل باھا ئىسلاھاتىنىڭ قەدىمىنى تېزلىتىپ، ئاھالىلەرنىڭ تۇرمۇشقا ئىشلىتىدىغان توكنىڭ پەلەمپەيسىمان باھا تۈزۈمىنى مۇكەممەللەشتۈرۈپ، ئاھالىلەرنىڭ تۇرمۇشقا ئىشلىتىدىغان سۇ ۋە تەبىئىي گازنىڭ پەلەمپەيسىمان باھا تۈزۈمىنى ئومۇميۈزلۈك يولغا قويىدىكەن.

تەرەققىيات ۋە ئىسلاھات كومىتېتىدىكى مەسئۇل كىشى مۇنداق دېدى: بۇ يىل باھا ئىسلاھاتىدا ھۆكۈمەتنىڭ باھا بېكىتىش دائىرىسى ئەڭ زور دەرىجىدە كىچىكلىتىلىپ، باھا بېكىتىش مېخانىزمى قائىدىسى ئەڭ زور دەرىجىدە ئىسلاھ قىلىنىپ، ئوچۇق – ئاشكارا بولۇش ئەڭ زور دەرىجىدە ئىشقا ئاشۇرۇلىدۇ.

كېيىنكى باسقۇچتىكى باھا ئىسلاھاتىنىڭ ئاساسلىق يۆنىلىشى تۆۋەندىكىدەك بولىدىكەن:
بىرىنچى، باھا يەنىمۇ قويۇۋېتىلىپ، ھۆكۈمەتنىڭ باھا بېكىتىش مۇندەرىجىسىگە تۈزىتىش كىرگۈزۈلىدىكەن. باھانى قويۇۋېتىش، باھا بېكىتىش ھوقۇقىنى تۆۋەنگە چۈشۈرۈشكە دائىر تۈرلۈك سىياسەتلەر ياخشى ئەمەلىيلەشتۈرۈلىدىكەن. رىقابەت شەرتىنى ھازىرلىغان باھا تۈركۈم بويىچە قويۇۋېتىلىپ، يەرلىك باشقۇرالايدىغان باھا بېكىتىش تۈرلىرى بىردەك تۆۋەنگە چۈشۈرۈلىدىكەن.

باھا ئىسلاھاتىنىڭ ئىلگىرىلەش ئەھۋالىغا بىرلەشتۈرۈپ، مەركەز ۋە يەرلىكنىڭ يېڭى باھا بېكىتىش مۇندەرىجىسىگە تۈزىتىش كىرگۈزۈلىدىكەن ۋە ئېلان قىلىنىدىكەن. مەركەزنىڭ باھا بېكىتىش مۇندەرىجە تۈرى %60، يەرلىكنىڭ باھا بېكىتىش مۇندەرىجە كونكرېت تۈرى ئاز دېگەندىمۇ %30 ئازايتىلىدىكەن. ھۆكۈمەتنىڭ باھا بېكىتىش دائىرىسى ئاساسلىقى ھۆكۈمەت ئىشى، جامائەت پاراۋانلىقى خاراكتېرلىك مۇلازىمەت ۋە تور تۈرىدىكى تەبىئىي مونوپول ھالقىلىرى بىلەن چەكلىنىدىكەن.

ئىككىنچى، بايلىق مۇھىتى ۋە تۆمۈريول تىرانسپورت باھاسىنىڭ شەكىللىنىش مېخانىزمى مۇكەممەللەشتۈرۈلىدىكەن. يېزا ئىگىلىكىدە سۇ باھاسىنى ھەر تەرەپلىمە ئىسلاھ قىلىشنى نۇقتىدا سىناق قىلىش ياخشى قانات يايدۇرۇلىدىكەن. يەرلىك سۇ بايلىقى ھەققى، بۇلغىما چىقىرىش ھەققى يىغىش ئۆلچىمىنى جايىدا ئەمەلىيلەشتۈرۈشكە ھەيدەكچىلىك قىلىنىدىكەن. شېنجېن شەھىرىنىڭ توك يەتكۈزۈش، توك تەقسىملەش باھاسى ئىسلاھاتىنى نۇقتىدا سىناق قىلىشى پۇختا ئىلگىرى سۈرۈلۈپ، نۇقتىدا سىناق قىلىش دائىرىسى يەنىمۇ كېڭەيتىلىدىكەن. كۆمۈر – ئېلېكتىر باھاسى ھەمتۈرتكە مېخانىزمىنى ئورنىتىش مۇكەممەللەشتۈرۈلىدىكەن. تەبىئىي گاز باھا ئىسلاھاتى تېزلىتىپ، تەبىئىي گاز سودا بازىرى قۇرۇش پائال ئىلگىرى سۈرۈلىدىكەن. ئېنېرگىيە تېجەپ مۇھىت ئاسرايدىغان ئېلېكتىر باھاسى، پار باھاسى، پاسكىنا سۇنى بىر تەرەپ قىلىش ھەققى قاتارلىقلار توغرىسىدىكى سىياسەتلەر مۇكەممەللەشتۈرۈلىدىكەن.

ئۈچىنچى، ئاھالىلەرگە قارىتىلغان پەلەمپەيسىمان باھا تۈزۈمى ئومۇميۈزلۈك يولغا قويۇلىدىكەن. ئاھالىلەرنىڭ تۇرمۇشقا ئىشلىتىدىغان توكنىڭ پەلەمپەيسىمان باھا تۈزۈمى مۇكەممەللەشتۈرۈلۈپ، ئاھالىلەرنىڭ تۇرمۇشقا ئىشلىتىدىغان سۇ، تەبىئىي گاز باھا تۈزۈمى ئومۇميۈزلۈك يولغا قويۇلۇپ، ئاھالىلەرنىڭ ئاساسىي تۇرمۇش ئېھتىياجىغا كاپالەتلىك قىلىنىپ، بايلىق تېجەش خىزمىتى ئىلگىرى سۈرۈلىدىكەن.

تۆتىنچى، ئىلمىي، قېلىپلاشقان، ئاشكارا بولغان باھانى نازارەت قىلىپ باشقۇرۇش سىستېمىسى بەرپا قىلىنىدىكەن. قانۇن بويىچە مەمۇرىيەت يۈرگۈزۈش، كوللېكتىپ قاراپ چىقىش، مۇتەخەسسىسلەر دەلىللەش، ئامما قاتنىشىش تۈزۈمى مۇكەممەللەشتۈرۈلۈپ، ھۆكۈمەتنىڭ باھا باشقۇرۇش ھوقۇقى قېلىپلاشتۇرۇلۇپ، قانۇن – تۈزۈم بويىچە ئاشكارا يۈرگۈزۈلىدىكەن. ھۆكۈمەتنىڭ باھا بېكىتىش تەننەرخىنى نازارەت قىلىش قائىدىسى مۇكەممەللەشتۈرۈلۈپ، تەننەرخنىڭ ئېشىپ كېتىشىنى چەكلەش كۈچەيتىلىپ، ھۆكۈمەتنىڭ باھا بېكىتىشىنىڭ ئىلمىيلىكى ئۆستۈرۈلۈپ، ھەقىقىي ياخشى باشقۇرۇش، جايىدا باشقۇرۇش ئىشقا ئاشۇرۇلىدىكەن. مۇھىم تاۋارلار ۋە مۇلازىمەت باھاسى قويۇۋېتىلىش بىلەن بىللە، ماس باھانى بېكىتىش قائىدىسى ۋە نازارەت قىلىپ باشقۇرۇش چارىسى بېكىتىلىپ، تىجارەتچىلەرنىڭ باھا بېكىتىشى قېلىپلاشتۇرۇلىدىكەن.