شىنخۇا تورى، بېيجىڭ، 16-ئاۋغۇست تېلېگراممىسى: گوۋۇيۈەننىڭ زۇڭلىسى لى كېچياڭ 16-ئاۋغۇست چۈشتىن بۇرۇن ‹‹خەلق›› سارىيىدا ئامېرىكا پارلامېنتى ئاۋام پالاتاسىنىڭ ئەزاسى شۇۋېست باشچىلىقىدىكى پارلامېنت ئەزالىرى ۋەكىللەر ئۆمىكىدىكىلەر بىلەن كۆرۈشتى ھەمدە ئۇلار بىلەن سۆزلىشىپ پىكىر ئالماشتۇردى.

شۇۋېست يېقىندا يۈننەننىڭ لۇديەندە يۈز بەرگەن يەر تەۋرەش ئاپىتىدە زور ئۆلۈم-يېتىم بولغانلىقىغا چوڭقۇر تەزىيە بىلدۈردى ۋە ھال سورىدى. لى كېچياڭ ئۇنىڭغا رەھمەت ئېيتتى، جۇڭگونىڭ ئاپەتكە ئۇچرىغان ئاممىنىڭ يۇرت ماكانىنى قايتا قۇرۇشقا ياردەم بېرىش ئىقتىدارىنىڭ بارلىقىنى تەكىتلىدى.

لى كېچياڭ مۇنۇلارنى بىلدۈردى: جۇڭگو بىلەن ئامېرىكا دۇنيا بويىچە ئەڭ چوڭ تەرەققىي قىلىۋاتقان دۆلەت ۋە تەرەققي قىلغان دۆلەت، ھەمكارلىقتا ئۆزئارا تولۇقلاشچانلىقى كۈچلۈك، ئىستىقبالى پارلاق. مۇرەككەپ، ئۆزگىرىشچان خەلقئارا ۋەزىيەتتە، ئىككى دۆلەت بىللە ئالغا ئىلگىرىلەشتە چىڭ تۇرۇپ، ھۆكۈمەت، پارلامېنت، پارتىيە قاتارلىقلارنىڭ ئالاقىسى ۋە ئۆز ئارا ئالماشتۇرۇشىنى كۈچەيتىپ، ئۆز ئارا پايدا يەتكۈزۈش ئاساسىدىكى ئەمەلىي ھەمكارلىقنى چوڭقۇرلاشتۇرۇپ، خەلقئارا، رايون مەسىلىسى ۋە دۇنياۋى خىرسلارغا تاقابىل تۇرۇپ، ئۆزئارا ھۆرمەتلەش، ئوخشاشلىقلاردا بىرلىككە كېلىپ، پەرقلەنى ساقلاپ قېلىش روھى بىلەن ئىختىلاپلارنى مۇۋاپىق بىر تەرەپ قىلىپ، ئىككى دۆلەت مۇناسىۋىتىنىڭ مۇقىم، ساغلام تەرەققىياتىنى ئىلگىرى سۈرۈشى كېرەك.

لى كېچياڭ مۇنۇلارنى تەكىتلىدى: جۇڭگو قوشنىلار بىلەن ئەپ ئۆتۈش، لەۋزىدە تۇرۇشنى تەشەببۇس قىلىدۇ. تىنچ خەلقئارا مۇھىت ۋە مۇقىم ئەتراپ مۇھىتىنى قوغداشقا تىرىشىدۇ، ھازىرقى خەلقئارا سىستېمىنى قوغدىغۇچى ۋە تۆھپە قوشقۇچى بولۇش سۈپىتىمىز بىلەن بىز ئۆزىمىزنىڭ تەرەققىيات سەۋىيەمىزگە ماس كېلىدىغان خەلقئارا مەسئۇلىيەتنى ئاۋالقىدەكلا ئۈستىمىزگە ئالىمىز، ھەر قايسى دۆلەتلەر بىلەن بىرلىكتە دۇنيانىڭ تىنچىلىقىنى قوغدايمىز، ئورتاق تەرەققىياتنى ئىلگىرى سۈرىمىز.
شۇۋېست مۇنۇلارنى بىلدۈردى: ئامېرىكا بىلەن جۇڭگو دۇنيادىكى ئىككى چوڭ ئىقتىسادىي گەۋدە، ئىككى دۆلەت مۇناسىۋىتى ئىنتايىن مۇھىم، ئامېرىكا جۇڭگونىڭ خەلقئارا ۋە رايون ئىشلىرىدا تېخىمۇ زور رول ئوينىشىنى قارشى ئالىدۇ، جۇڭگو بىلەن ئۆزئارا چۈشىنىش ۋە ئىشەنچىنى كۈچەيتىپ، ئۆزئارا پايدا يەتكۈزۈش ئاساسىدىكى ھەمكارلىقنى كېڭەيتىپ، خىرىسقا بىرلىكتە تاقابىل تۇرۇشنى خالايدۇ. ئامېرىكا پارلامېنت ئەزالىرى جۇڭگونى ئومۇميۈزلۈك چۈشىنىپ، ئامېرىكا-جۇڭگو مۇناسىۋىتىنىڭ تەرەققىياتىدا ئىجابىي رول ئويناشنى خالايدىغانلىقىنى بىلدۈردى.

لى كېچياڭ يەنە جۇڭگونىڭ ئىقتىسادىي ۋەزىيىتى، جۇڭگو ئامېرىكا ھەمكارلىقى ۋە ئورتاق كۆڭۈل بۆلىدىغان خەلقئارا، رايون مەسىلىلىرى توغرىسىدا پارلامېنت ئەزالىرىنىڭ سوئاللىرىغا جاۋاب بەردى.