Yalancı Bahar
Bekir Coşkun
يالغانچى باھار
بەكىر جوشكۇن ( تۈركىيە)
ھاۋادا گۈل-چېچەك ھىدى،
دەرەخلەر پوتلا چىقاردى.
ئۈچقۇلاقلار يەر يېرىپ
ئۈركىگىنىچە بېشىنى چىقاردى.
قۇياش ئىسسىق، شامال نازلىق،
قۇشقاچلار سۆيگۈ ساماسى سالار.
لېكىن مەن بىلىمەن گۈلۈم،
بۇ يالغانچى باھاردۇر، يالغانچى باھار...
تۇيۇقسىزلا بىر سوغۇق شامال چىقار،
قارا بۇلۇتلار يىغىلار
تېخى تۆنۈگۈن باھارنىڭ كەلگىنىگە ئىشىنىپ قالغان قۇشلارنىڭ
يېرىم قالغان ناخشىلىرىنىڭ ئورنىنى
تامغا ئۇرۇلغان قاڭالتىرلارنىڭ ئاۋازى ئالار.
قۇشقاچلار قېچىشار
چىشى تۇرۇلغا گاڭگىراپ قالار
تاڭ قويۇپ ھەممىنى قىش قايتىپ كېلەر.
بوران-چاپقۇن، قەھرىتان سوغۇق...
يامغۇر ئارىلاش قار.
دەل شۇنداق چاغدا مەن
گۈل غۇنچىلىرىنىڭ ئېچىلار-ئېچىلماستىنلا
قورۇلۇپ يېنىشلىرىغا چىدىيالمايمەن.
ھايات ئەزەلدىن « يالغانچى باھار» لارغا تولغاندۇر،
بەزىدە بىر كۈلكە، بەزىدە نەچچە مىسرا خەت،
بەزىدە بىر خىيال،
بەزىدە بىر توي،
بەزىدە بىر ئىش،
بەزىدە كىچىككىنە بىر ئۈمىت.
بىخلار سۈرەر
قۇياش ئىسسىق، ئىللىق شامال...
لېكىن يالغانچى باھار
مەن يالغانچى باھارلارنى بىلىمەن.
نېمە ئىدى ئەيتاۋۇر؛ چېچىمنى تۇنجى رەت تارىشىم،
قوشنىمىزنىڭ قىزىغا يازغان
تۇنجى سۆيگۈ خېتى،
تۇنجى دىپلوم،
تۇنجى خىزمىتىم،
يەنە مەسىلەن؛ ساۋادىم يېڭى چىققان چاغ،
دۇنيانى ئۆزگەرتىشنى ئويلاشلىرىم،
ئەمەلگە ئاشۇردۇم دەپ ئويلىغان ئۈمىتلىرىم،
بۇلار ــ ماڭا نېسىپ بولغان يالغانچى باھارلار ئىدى گۈلۈم.
ھاۋادا گۈل-چېچەك ھىدى،
ئەقلى-خىيالىم ھاۋادا ئەمدى،
كۆزلىرىم ئۇپۇقلاردا بۇلۇت قوغلايدۇ.
قۇشقاچلارنىڭ ناخشىسى يېرىم قالمىسۇن،
بېشىنى تەبىئەتكە ئۇزاتقان بىخلار،
ئۈركۈگەك گۈللەر قۇرۇپ كېتەر دەپ كۆزۈم بۇلۇتلاردا،
يەنە بىر يالغانچى باھارمىدۇ دەپ ئۆتۈم قوپار
مەن يالغانچى باھارلارنى بىلىمەن، گۈلۈم...
تۈركچىدىن ئەنۋەر ھامىت( ئايپالتا) ئۇيغۇرچىلاشتۇردى.
ئوكيان تورىدىكى بارلىق ئەسەرلەرنىڭ نەشىر ھوقۇقى ئوكيان تورىغا مەنسۈپ. قالايمىقان كۆچۈرۈپ ئىشلىتىشكە، قانۇنسىز نەشىر قىلىشقا، ھەرقانداق مېدىيا ۋاستىلىرىدا ئېلان قىلىشقا بولمايدۇ. خىلاپلىق قىلغانلارنىڭ قانۇنى جاۋابكارلىقى سۈرۈشتە قىلىنىدۇ. قالايمىقان كۆچۈرۈپ تارقاتقان تور بىكەتلەر ئاشكارە ئېلان قىلىنىدۇ.