سەن بەلكى، مەن كۈتكەن ئاخىرقى مەنزىل

يوللىغۇچى : hotanboy يوللىغان ۋاقىت : 2011-05-04 15:14:37

سەن بەلكى، مەن كۈتكەن ئاخىرقى مەنزىلمۇتەللىپ سەيپۇللا ئەزىزــ ئىنىم ئېزىز سەيپۇللا ۋاپاتىنىڭ بىر يىللىق خاتىرىسىگە:سەن بەلكى، قىيادا قۇرۇغان قامغاق،ئۇنتۇلغان، يىلتىزىڭ تاشلانغان يۇلۇپ.بەلك...



     

     

     

    سەن بەلكى، مەن كۈتكەن ئاخىرقى مەنزىل

    مۇتەللىپ سەيپۇللا ئەزىز

     ــ ئىنىم ئېزىز سەيپۇللا ۋاپاتىنىڭ بىر يىللىق خاتىرىسىگە:

    سەن بەلكى، قىيادا قۇرۇغان قامغاق،

    ئۇنتۇلغان، يىلتىزىڭ تاشلانغان يۇلۇپ.

    بەلكى، سەن چۆلدىكى مىڭ يىللىق توغراق،

    سۆزلەيسەن ئۆتمۈشنى يۈرەككە ئۇيۇپ.

     

    سەن بەلكى، بىر تامچە سىرغىغان كۆز ياش،

    ھىجراننىڭ كىرپىگى قالمىغان تۇتۇپ.

    بەلكى، سەن ياۋا ئات، ئاساۋ- بەكمۇ شاش،

    تىزگىنلەر كۆڭلۈڭنى باقمىغان ئۇتۇپ.

     

    سەن بەلكى، بىر زەررە قۇياشتىن تامغان،

    ئاق نۇرغا بۆلىگەن چاڭ باسقان دىلنى.

    بەلكى، سەن بىر قېلىچ (قىنغا پاتمىغان)

    يېرىشقا ئىنتىلگەن قىرىققا  قىلنى.

     

    سەن بەلكى، بىر بۇۋاق سۈتكە ئىنتىزار،

    يىغاڭ يوق، ئەللەيدىن قورقۇسەن چۈنكى.

    بەلكى، سەن بىر لەھەڭ نەپسىڭ بىقارار،

    چىشىڭ گال غازلارغا ئۆز كۆلۈڭدىكى.

     

    سەن بەلكى، بىر ئېرىق كۆلگە سويلىغان،

    مىڭ ئەپسۇس، پىلتىڭلاپ بىلىجانىڭ يوق.

    بەلكى، سەن بىر بۇۋاي كۆپنى ئويلىغان،

    ئويلىرى ئوي پېتى، پىغانى تۇلۇق.

     

    سەن بەلكى، قارلىغاچ ئېغىزىدىكى دان،

    يەم بولۇپ تۈگۈگەن باچكا قۇشلارغا.

    بەلكى، سەن سەييادنىڭ كۆكسىدىكى قان،

    ساداقتىن چاچرىغان ئوق ھۇقۇشلارغا.

     

    سەن بەلكى، بىر ياپراق يولدا پايلىغان،

    ئاگاھ بول! دەپ، پىنھان لەخمە- ئورەكتىن.

    بەلكى، سەن بىر تىكەن راسا سانچىلغان،

    رەقىپنىڭ كۆزىگە ئوخچۇپ يۈرەكتىن.

     

    سەن بەلكى، ناتىۋان قىزنىڭ يوپكىسى،

    قوغدىغان ئىپپەتنى بولۇپ پاسىبان.

    سەن بەلكى، شۇ قىزنىڭ شاتلىق كۈلكىسى،

    ۋۇجۇدۇڭ پاكلىققا سەھنەيۇ، ئاسمان.

     

    سەن بەلكىم، كۆمۈلگەن قەدىمىي ئۇرۇق،

    ئانا يەر قوينىدا ئۈنۈشنى كۈتكەن،

    بەلكى، سەن بىر ياڭاق مېغىزى تولۇق،

    پوستۇڭنى يارالماي، ئارماندا ئۆتكەن.

     

    سەن بەلكى، بىر داستان، ئەسىرلەر بويى-

    كۆرمىگەن ۋە ھېچكىم ئوقۇپ باقمىغان.

    بەلكى، سەن دەرۋىشنىڭ ئىس باسقان ئۆيى،

    ئۆمۈچۈك تورىدىن ئۆزگە پاتمىغان.

     

    سەن بەلكى، بىر ئەينەك مىڭ پارە بولغان،

    ھەر پارەڭ كۆرسىتەر مېنى مەن ئەينى.

    بەلكى، سەن بىر كاسە لىقمۇ- لىق تولغان،

    چاڭقىغان لەۋگە جان قوشقان بەئەينى.

     

    سەن بەلكى، بىر ئاشىق ۋىسال تاپمىغان،

    يار ۋەسلى قىلتىرىق بولغان بوغۇزغا.

    بەلكى، سەن شاھى تون، تەنگە ياپمىغان،

    قاقلىنىپ چوغ بولغان سايدا تۇمۇزغا.

     

    سەن بەلكى، كۆپ ئۈچۈن پايپاق يا پىتەك،

    جۇت باسقان چىللىدە بەرگەن ھارارەت.

    بەلكى، سەن يۇلتۇزغا لىق تولغان ئىتەك،

    كۆز قىسىش، جىمىرلاش ئەمەس ماھارەت.

     

    سەن بەلكى، بىر كۈلدان كۈلگە لىق تولغان،

    پۇخادىن چىقارغان باغرى ئاتەشنى.

    بەلكى، سەن شاھ مەشرەپ ئوت ياققان گۈلخان،

    كۈي بىلەن كۈل قىلغان تالاي ناكەسنى.

     

    سەن بەلكى، سۇلتانى قەلب خانەڭنىڭ،

    كۆز چاقار مۈلكۈڭ كۆپ قازناقلىرىڭدا.

    بەلكى، سەن دىۋانە، غېمى ئەتەڭنىڭ،

    ئۈزۈكتەك يالتىرار بارماقلىرىڭدا.

     

    سەن بەلكى، بىر ناخشا- مۇقام، كۈي مۇڭلۇق،

    ئاھ، ئۆتكەي كىم سىنى يادلاپ بىر نەپەس...؟!

    بەلكى، سەن ساماۋى بىر ھىكمەت ئۇلۇق،

    كىم سىنى چۈشەنسە، بولغايكى پەخەس.

     

    سەن بەلكى، بىر سىدام ئاداققى سۈرەت،

    ئەمەسسەن ۋە لېكىن تۇيغۇسىز رامكا.

    بەلكى، سەن بىر پىچكا، ئاخىرقى بىر رەت

    ئايلانغان گەردىگە شاھمات- دامكىدا.

     

    سەن بەلكى، بىر تىنىق پانىيدىن كۆچكەن،

    ئۆمرۈڭ نۇر بولدىكى بىغۇبار چاقناپ.

    بەلكى، سەن بىر ھەرپ، يېزىپلا ئۆچكەن،

    ئۆچۈشۈڭ مىڭ دىلنى قويغان سۇراقلاپ.

     

    سەن بەلكى، بىر ھەيكەل گۈلسىز، ھەشەمسىز،

    ئۈستۈڭگە كۆك كەپتەر ئۆتكەن ماياقلاپ.

    بەلكى، سەن بىر يولكى- مۇساپەم، شەكسىز،

    يىراقتا تۇرغاندەك قىلىسەن ساقلاپ.

     

    سەن بەلكى، تاڭ سەھەر، دىلكەشلەر ئۈچۈن،

    «مەرھابا! ...يول بولسۇن سەپەرگە»، دىگەن.

    بەلكى، سەن بىر چوغكى يانغان ۋاھ، پۈتۈن،

    قوينۇمغا كۆمۈلگەن، غەملىرىم يىگەن.

     

    سەن بەلكى، بىر قەبرە گۈللەر قويۇلغان،

    كۆكەرتىپ تۇرىدۇ تىلەك يامغۇرى.

    بەلكى، سەن بىر لەۋھە كۆككە ئويۇلغان،

    ھاياتلىق دەستۇرى، ۋىژدان- غۇرۇرى.

     

    سەن بەلكى، يالىلداپ ئۆچكەن كۆمۈر چوغ،

    ھارارەت بەرمىگەن قەلبى پۈچەككە.

    بەلكى، سەن نۇر- ئاپتاپ ماڭلىيىدا تۇغ،

    ناتىۋان، ئۈمۈتۋار، تىلى چۈچۈككە.

     

    سەن بەلكى، سەنەمنىڭ تويلۇق ئۈزىكى،

    مەڭگۈگە قىممىتىڭ بارىدۇ ئېشىپ.

    بەلكى، سەن دالىنىڭ گۈلگۈن چېچىكى،

    ئىزغىرىن شامالغا كەتكەن سىڭىشىپ.

     

    سەن بەلكى، تۆت قۇلاق، ئىزدىشەر بىر كۈن،

    ئازاپتىن ئىڭرىغان، زىيا كۆرمىگەن.

    بەلكى، سەن چۈشتىكى ئۇزارغان بىر تۈن،

    يار بىلەن ۋىلىقلاپ دەقىق كۈلمىگەن.

     

    سەن بەلكى، مەن كۈتكەن ئاخىرقى مەنزىل،

    كۆكسۈڭ بەر، باغاشلاي، قوشۇلسۇن تىنىق.

    بەلكى، مەن قەدرىڭنى بىلمىدىم (خىجىل!)

    بىلسەم، دۇر- ياقۇتسەن، گۈھەرسەن ئېنىق.

     

    سەن بەلكى، سوقما تام تۈلكە، قاۋانغا،

    پەر قانات قۇشقا ھەم قوللىرىڭ قونداق.

    بەلكى، سەن پايانداز خەلقى ئاۋامغا،

    ئۈمۈدۈم، ئىستىگىم بولسامتىم شۇنداق.

     

    سەن بەلكى، ھويلامغا سۇ ئۈتەر سۈڭگۈچ،

    پاقىنىڭ ئۈندىگەك ئۈنى بار سەندە.

    بەلكى، سەن كۆك سۆيگەن ئۇچقۇر گۈلەڭگۈچ،

    ئۈمۈدۈڭ پارلىغان ئەزىز ۋەتەندە.

     

    سەن ئۆزۈڭ، مەن كۆيگەن زۆھرە يەكمۇ- يەك،

    ئاھ، نىتەي سۆيمىدىم قېنىپ ۋە قېنىپ.

    ئېنىقكى، قىلىسەن ماڭا كۆچكەندەك،

    چاراقلاپ كېتىمەن يېنىپ ۋە يېنىپ!

     

    2009-يىل. 11-نۇيابىر. لوپ.

     

     

ئەسكەرتىش:
ئوكيان تورىدىكى بارلىق ئەسەرلەرنىڭ نەشىر ھوقۇقى ئوكيان تورىغا مەنسۈپ. قالايمىقان كۆچۈرۈپ ئىشلىتىشكە، قانۇنسىز نەشىر قىلىشقا، ھەرقانداق مېدىيا ۋاستىلىرىدا ئېلان قىلىشقا بولمايدۇ. خىلاپلىق قىلغانلارنىڭ قانۇنى جاۋابكارلىقى سۈرۈشتە قىلىنىدۇ. قالايمىقان كۆچۈرۈپ تارقاتقان تور بىكەتلەر ئاشكارە ئېلان قىلىنىدۇ.