بەزى فىزىكا ئالىملىرى، بولۇپمۇ ستېفېن خاۋكىڭ، ئەمەلىيەتتە بىزمۇ ئالەمنىڭ دەسلەپكى ھالىتىنىڭ ناھايىتى ئاددىي ئىكەنلىكىنى ئويلىشىمىز كېرەك ئىدى، دەپ كۆرسەتكەنىدى. بۇنىڭ ئاساسى بىز 2-بابتا قىسقىچە مۇھاكىمە قىلىپ ئۆتكەن دەسلەپكى ئاجايىپ نۇقتىغا چېتىلىدۇ. ئاجايىپ نۇقتىنىڭ ئەڭ تۈپ ئالاھىدىلىكى شۇكى،  ۋاقىت-بوشلۇقنىڭ چېتى، چېگرىسىغا ئوخشايدۇ، شۇ سەۋەبتىن كىشىلەر ئۇنى تەبىئىي ئالەمنىڭ چېتى دەپ قارايدۇ. ئاجايىپ نۇقتىنىڭ بىر مىسالى چەكسىز زىچ ھالەتتىن ئىبارەت بولۇپ، ئۇ چوڭ پارتلاشنىڭ باشلىنىشىدىن دېرەك بېرىدۇ. بزەىلەرنىڭ قارىشىچە، قارا ئۆڭكۈر ئىچىدىمۇ ئاجايىپ نۇقتا پەيدا بولىدىكەن، باشقا جايلاردىمۇ ئاجايىپ نۇقتا پەيدا بولۇشى ئېھتىمال.

ھازىرغا قەدەر، بىزنىڭ بارلىق فىزىكا نەزەرىيىلىرىمىزنىڭ ھەممىسى ۋاقىت-بوشلۇق دائىرىسىدە ئوتتۇرىغا قويۇلغانلىقى ئۈچۈن، ۋاقىت-بوشلۇق چېگرىسىنىڭ مەۋجۇتلۇقى، تەبىئەتتىكى فىزىكىلىق جەريانلارنىڭ بۇ چېگرىنىڭ سىرتىغىچە داۋالاشمايدىغانلىقىدىن دېرەك بېرىدۇ. تۈپ مەنىدىن ئېيتقاندا، بۇ خىل نۇقتىئىينەزەرگە ئاساسلانغاندا، ئاجايىپ نۇقتا تەبىئىي ئالەمنىڭ سىرتقى چېگرىسىغا ۋەكىللىك قىلىدۇ. ئاجايىپ نۇقتىدا، ماددىلار تەبىئەت دۇنياسىغا كىرەلەيدۇ ياكى تەبىئەت دۇنياسىدىن ئايرىلالايدۇ. ئاجايىپ نۇقتا تارقاتقان تەسىرلەرنى تەبىئىي پەن پۈتۈنلەي مۆلچەرلىيەلمەيدۇ، ھەتتا پرىنسىپ جەھەتتىن ئېيتقاندىمۇ مۆلچەرلىيەلمەيدۇ. ئاجايىپ نۇقتا ئىلىم-پەن بايقىغان، تەبىئەتتىن تاشقىرى سەۋەبكە ئەڭ يېقىنلىشىدىغان نەرسىدىن ئىبارەت.

كۆپ يىللاردىن بۇيان، كىشىلەر ئاجايىپ نۇقتا بولسا پايدىلانغان تارتىش كۈچى مودېلىنىڭ زىيادە ئىدېئاللاشتۇرۇلۇشى پەيدا قىلغان بىر ىخل سۈنئىي نەرسىدىن ئىبارەت دەپ قاراپ كەلگەنىدى. كېيىن، بىر قاتار نەپىس ۋە ئىلھامغا باي ماتېماتىكىلىق تېئوررمىلاردىن پايدىلىنىپ، پېنروس ۋە خاۋكىڭلار، ئاجايىپ نۇقتىنىڭ خېلىلا ئومۇميۈزلۈك ئىكەنلىكىنى، بەلكى بارلىق مۇۋاپىق فىزىكىلىق شارائىتتا، تارتىش كۈچى يېتەرلىك كۈچەيگەن ھامان، ئاجايىپ نۇقتىنىڭ پەيدا بولۇشىدىنمۇ ساقلانغىلى بولمايدىغانلىقىنى ئىسپاتلىدى.

3.4 رەسىم. ئاجايىپ نۇقتا (رەسىمدىكى قارا چېكىت) ئىلىم-پەندە ئاخىرقى ھېسابتا بىلگىلى بولمايدىغان نەرسىدىن ئىبارەت. ئۇ ۋاقىت-بوشلۇقنىڭ چېگرىسىياكى چېتى بولۇپ، ئاجايىپ نۇقتىدا ماددا ۋە تەسىر تامامەن مۆلچەرلىگىلى بولمايدىغان شەكىلدە تەبىئىي ئالەمگە كىرەلەيدۇ ۋە ئۇنىڭدىن ئايرىلالايدۇ. ئەگەر ئاجايىپ نۇقتا «ئېچىلىپ قالغان» بولسا، ئۇ ھالدا ھەرقانداق نەرسە ئەسلىدە فىزىكىلىق سەۋەبنىڭ تەسىرى يوق ئەھۋالدا ئاجايىپ نۇقتىدىن پەيدا بولالايدۇ. بەزى ئالەمشۇناسلار، ئالەم دەل سەۋەبى يوق ھالدا مەلۇم تىپتىكى ئېچىلىپ قالغان ئاجايىپ نۇقتىدىن پەيدا بولغان، دەپ قارىماقتا. ئەگەر بۇ قاراش توغرا بولىدىغان بولسا، ئۇنداقتا ئاجايىپ نۇقتا دەل تەبىئەت بىلەن تەبىئەتتىن تاشقىرىلىقنىڭ چېگرىسىدىن ئىبارەت بولىدۇ.

كىشىلەرنىڭ ئۇ ئىككىيلەننىڭ ئىسپاتىغا ئەستايىدىل مۇئامىلە قىلىشى زۆرۈر بولغانلىقتىن، نۇرغۇن كىشىلەر كاللىسىنى ئىشقا سېلىپ، ئاجايىپ نۇقتىنىڭ قانداق ھەرىكەت قىلىدىغانلىقى توغرىسىدا ئويلىنىشقا كىرىشتى. ھەرخىل پىكىر يوللىرىنىڭ ھەممىسى مۇنداق بىر نۇقتىغا، يەنى ئاجايىپ نۇقتىدىن پەيدا بولغان نەرسە يا تامامەن تەرتىپسىز، تۈزۈلۈشسىز بولىدۇ، يا تەرتىپلىك، تەشكىللىك بولىدۇ دېگەن نۇقتىغا مەركەزلەشتى. ئالدىنقى بىرخىل ئەھۋالدا، چوڭ پارتلاشتىكى ئاجايىپ نۇقتىدىن پەقەتلا بىرخىل تەرتىپسىزلىك ئالەم پەيدا بولىدۇ، ئۇنىڭدا ھېچقانداق كونكېرت تەرتىپ بولمايدۇ. كېيىنكى بىرخىل ئەھۋالدا، ئالەم مەلۇم دەرىجىدىكى تۈزۈلۈشى بار ھالدا پەيدا بولىدۇ.

خاۋكىڭ «بىلگىلى بولماسلىق پىرىنسىپى»نى ئوتتۇرىغا قويدى، بۇنىڭ مەنىسى ئاجايىپ نۇقتىنى ئاخىرقى ھېسابتا بىلگىلى بولمايدۇ، شۇڭا .ۇنىڭدا پۈتۈنلەي ئۇچۇر بولمايدۇ (فىزىكىدا ئۇچۇر ئاساسەن تەرتىپلىكلىك بىلەن ئوخشاش مەنىدە، يەنى مەنپىي ئېنتروپىيىنى كۆرسىتىدۇ). شۇنىڭ ئۈچۈن، ئاجايىپ نۇقتىدىن چىققان ھەرقانداق نەرسە تامامەن تەرتىپسىز، ئارىلاش بولىدۇ. خاۋكىڭ ئوتتۇرىغا قويغان بۇ پرىنسىپ دەسلەپكى ئالەم تەرتىپسىزلىك قىممىتى ئەڭ چوڭ ھالەت (ئىسسىقلىقى تەڭپۇڭ)تە بولغان دېگەن قاراشقا ناھايىتى ئۇيغۇن كېلىدۇ.

نۇرغۇن مۇشۇنداق قاراشلار ھازىر نەزەرىيىۋى فىزىكىنىڭ ئالدىنقى قاتارىدا تۇرماقتا، شۇڭا ئۇلار پەقەت نەزەرىيىنىڭ كەلگۈسىدىكى تەرەققىياتى ئارقىلىق ئاندىن ئايدىڭلىشىشى مۇمكىن. فىزىكا ئالىملىرىنىڭ ۋاقىت-بوشلۇق، ئاجايىپ نۇقتا ھەققىدىكى قاراشلىرى بىردەك ئەمەس، ھەتتا دەسلەپكى ئالەمنىڭ زادى قانداق كونكرېت ھالەتتە بولغانلىقى توغرىسىدىكى قاراشلىرىمۇ ھەرخىل. ئەمما ئىلمىي ئالەمشۇناسلىقنىڭ يېقىنقى ئىلگىرىلەشلىرىدىن بارلىققا كەلگەن ھەرخىل ئىدىيىلەر شۈبھىسىز ھالدا يەنە بىر قېتىم خۇدا ۋە ئالەمنىڭ مەۋجۇتلۇقى توغرىسىدىكى بەس-مۇنازىرىنى قوزغايدۇ ھەمدە بۇ بەس-مۇنازىرىنى يېڭى بىر نىشانغا بۇرايدۇ.

5-باب ھاياتلىق دېگەن نېمە

«خۇدا ئۆزىنىڭ ئوبرازى بويىچە ئادەمنى ياراتتى....»

     ــ «ئىنجىل» 1-توم، 1-باب، 27-پاراگراف

ئىلاھىيەتشيناسلار، ھاياتلىق ئەڭ ئۇلۇغ مۆجىزە، ئادەمنىڭ جېنى بولسا خۇدانىڭ ئالەم ئومۇمىي پىلانىدىكى ئەڭ يۈكسەك نەتىجىدىن ئىبارەت، دەپ قارايدۇ. ئالىملارغا نىسبەتەن ئېيتقاندا، ھاياتلىق تەبىئەت دۇنياسىدىكى كىشىنى ھەممىدىن بەك ھەيران قالدۇرىدىغان ھادىسىدىن ئىبارەت.. 100 يىلنىڭ ئالدىدا، ھاياتلىق سىستېمىسىنىڭ بارلىققا كېلىش ۋە ئۆزگىرىش مەسىلىسى ئىلىم-پەن بىلەن دىننىڭ تارىختىن بۇيانقى ئەڭ چوڭ ئۇرۇش مەيدانىغا ئايلاندى. دارۋىن (ئەنگىلىيىلىك ناتۇرالىسىت) تەدرىجىي تەرەققىيات نەزەرىيىسى خىرىستىئان دىنى ئەقىدىلىرىنىڭ ئاساسىنى تەۋرىتىۋەتتى. بەلكى كوپېرنىك قۇياشنى قۇياش سىستېمىسىنىڭ مەركىزىگە قويغاندىن بۇيان، تەدرىجىي تەرەققىيات نەزەرىيىسى يەنە بىر قېتىم ئادەتتىكى پۇقرالارغا ئىلمىي تەھلىلنىڭ چوڭقۇر تەسىرىنى ھېسقىلدۇردى. ئىلىم-پەن قارىماققا ئىنسانلارنىڭ ئۆزى ھەمدە ئادەم بىلەن تەبىئەتنىڭ مۇناسىۋىتى توغرىسىدىكى قارىشىنى پۈتۈنلەي ئۆزگەرتەلەيدىغاندەك قىلاتتى.

بۇ بابتا توختىلىدىغىنىمىز ئالىملارنىڭ جانلىق ئورگانىزم توغرىسىدىكى قارىشىدىن ئىبارەت. مۇھاكىمە قىلىنىدىغان مەسىلە: ھاياتلىق دېگەن نېمە؟ ھاياتلىق ئىلاھنىڭ روھىنىڭ مەۋجۇتلۇقىنى دەلىل بىلەن تەمىن ئېتەمدۇ-يوق؟ دېگەنلەردىن ئىبارەت.

(قىسقارتىلدى)

ھاياتلىقنى خۇدا ياراتقانمۇ؟ ئەجەبا خۇدا راستتىنلا مۆجىزىلە ئارىسىدا فىزىكىلىق ۋە خىمىيىلىك قانۇنلارغا پەرۋا قىلماي، جانسىز ماددىلاردىن تەشكىل تاپقان مولېكۇلىلارنى سىقىمدپ يۈرۈپ، تۇنجى تىرىك نەرسىنى ياساپ چىققانمۇ؟ خۇدا راستتىنلا بىر قانچە مىڭ (ياكى بىرقانچە مىليون) يىللار ئىلگىرى چېۋەرلىك بىلەن مەلۇم ئادەمسىمان مايمۇنغا ئوخشاش جانلىقنىڭ گېن تۈزۈلۈشىنى بىر تەرەپ قىلىپ، مۇشۇ .اساستا ئادەمنى ياساپ چىققانمۇ ياكى ھاياتلىق نوقۇل تەبىئەتتىكى (بەلكىم مۇرەككەپ بولۇشى مۇمكىن) فىزىكىلىق ۋە خىمىيىلىك ھەرىكەتلەرنىڭ نەتىجىسى، ئادەم بولسا ئۇزاق مۇددەتلىك ئەگرى-توقاي تەدرىجىي تەرەققىيات جەريانىنىڭ مەھسۇلاتىمۇ؟ ھاياتلىقنى سۈنئىي ئۇسۇلدا تەجرىبىخانىدا ياساپ چىققىلى بولامدۇ؟ ئۇنىڭغا بىرخىل تەكىب (ئىلاھنىڭ ئېنېرگىيىسى)نى قوشقاندىلا، ئاندىن ئۇنىڭغا جان كىرەمدۇ؟

ھاياتلىق دېگەن نېمە؟ فىزىكا ئالىملىرىغا نىسبەتەن ئېيتقاندا، ھاياتلىق سىستېمىسىنىڭ باشقىلارغا ئوخشىمايدىغان ئىككى ئالاھىدىلىكى بار. بىرى، ئۇ مۇرەككەپ، يەنە بىرى، ئۇ تەشكىللىك. بى ر ھۈجەيرىلىق جانلىق بولغان تەقدىردىمۇ، گەرچە ئىپتىدائىي بولسىمۇ، لېكىن ئۇ ھەرقانداق سۈنئىي ياسالغان نەرسىلەرگە سېلىشتۇرغىلى بولمايدىغان مۇرەككەپلىكى ۋە نەپىسلىكىنى نامايان قىلىدۇ.

(قىسقارتىلدى)

(داۋامى بار)