-
2011-04-03
يازغۇچى جالالىدىن بەھرام بىلەن سۆھبەت - [سۆھبەت - ئەنجۇمەنلەر]
يازغۇچى جالالىدىن بەھرام بىلەن سۆھبەت
سۆھبەت ئىلىپ بارغۇچى: ئىدىل ئەپەندى
خۇش سۆھبەت ئادەم
داڭلىق يازغۇچى جالالىدىن بەھرام ئەپەندى تېلېفوندا سۆزلىشىش ۋە يۈزتۇرانە سۆھبەتلىشىش جەريانىدا ، قەلىمى ئۆتكۈر يازغۇچى بولۇپلا قالماستىن ، سۆزگىمۇ ئۇستا ، ناتىق ئادەم ئىكەنلىكىنى نامايان قىلىپ ، گېپى ئوچۇق ، خۇش مۇئامىلىلىكى بىلەن مەندە چوڭقۇر تەسىر قالدۇردى . كۆڭلى تۈز بولغانلىقى ئۈچۈنمىكىن ، دەسلەپ سۆزلەشكەندىلا ئشلىرىنى مەخپىي تۇتۇپ ، سىر ساقلاپ كەتمىدى .
ـ جالالىدىن ئەپەندى ، ـ دېدىم مەن تېلېفوندا مۇراجىئەت قىلىپ ، ـ پات ئارىدا سىز بىلەن بىر پاراڭلاشماقچى ئىدىم ، ۋاقىت چىقىرالامسىزكىن ؟
ـ مەن ھازىر ئۆيدە ، مەلۇم نەشرىيات ئۈچۈن توختاملىق رومان يېزىۋاتىمەن . ۋاقىت ئۆزئىلىكىمدە ، قاچان سۆزلەشسەكمۇ بولىۋېرىدۇ .
پۈتۈشكەن كۈنى يازغۇچىنىڭ ئۆيىگە كەلدىم . ئىشىكنى خالىدە خانىم ئېچىپ ، مېنى تۆر ئۆيگە باشلىدى . جالالىدىن ئەپەندىمۇ پوپايكىسىنى كىيگەچ يان ئۆيدىن ئالدىراش چىقىپ قىزغىن كۆرۈشتى . كېلىش مەقسىتىمنى ئۇققاندىن كېيىن ، بىردىنلا كۆزى ئېچىلىپ بۇلدۇقلاپ قايناپ كەتكەن بۇلاقتەك ، سۆھبەتنى باشلىۋەتتى . پاراڭ سىستېمىلىق باشلىنىپ ، بىر خىل تەرتىپ بىلەن داۋاملاشماقتا ئىدى . مەن ھۆرمەت يۈزىسىدىن ئۇنىڭ سۆزىنى بۆلمەي ،ئىخلاس بىلەن ئاڭلاپ ئولتۇراتتىم ، چۈنكى مېنىڭ سوئاللىرىمغا ئۆزلىكىدىن جاۋاب بېرىلىۋاتاتتى . شۇغىنىسى ، يازغۇچى سۆزلەپ بىر يەرگە كەلگەندە ، مەن ئۈنسىز ئولتۇرىۋىرىشنى بىئەپ ھېس قىلىپ ؛
ـ جالالىدىن ئەپەندى ، خۇش سۆھبەت ئادەم ئىكەنسىز ، ـ دېدىم كۆڭلۈم سۈيۇنۈپ ، ـ ھەممە مەسىلە سۇۋار سۆزلىنىپ كەتتى ، ئەمدى سوئال قويۇشنىڭ لازىمى قالمىدى . قايتىپ كېتىپ ، ئاڭلىغانلىرىمنى رەتلەپ چىقسام ، بىر پۈتۈك پۈتۈپ قالىدىغان ئوخشايدۇ .
ـ غىلاجىدىن ئەپەندى ، كونا سوئاللىرىڭىزغا جاۋاپ بېرىلىپ كەتكەن بولسا ، يېڭى سوئاللىرىڭىزنى سوراڭ ، ـ دېدى يازغۇچى كۈلۈپ ، ـ كۆڭۈلدىن كۆڭۈلگە يول بار ، دېگەن ئەمەسمۇ .
ـ ئوبدان ، ـ دېدىم مەن يازغۇچىنىڭ گېپىنى يىرغۇم كەلمەي ، ـ ئەسەرلىرىڭىز بەك ئۆتۈملۈك بولۇپ ، بازار ئىقتىسادى بىلەن زىچ مۇناسىۋەتلىك ئىكەن . ئۇنداقتا ، بىز ئالدى بىلەن سىزنىڭ ئىجادىي ئەسەرلىرىڭىزنىڭ ئىقتىسادىي ئۇنۇمى ھەققىدە ئاز ـ تولا پاراڭلىشىپ باقايلىمۇ ؟
ـ خوپ ، قېنى ئەمىسە ، سوئالىڭىزنى باشلىۋىتىڭ .
تىلسىمات يازغۇچى
بىزدە شۇنداقمۇ بىر شۆھرەتلىك يازغۇچى بار . ئۇ ـ رەسىم كەسىپىنى ئوقۇپ ، رەسىسامچىلىقتىن پېنسىيىگە چىققان ، سىزمىچىلىق سايمانلىرىنى يىغىشتۇرۇپ قويۇپ ، يېزىقچىلىق قوراللىرىنى يىغقان ، ئىككى كۈندە بىر پارچە ھېكايە كاكىلاپ ، ئىككى ئايدا بىرتوملىق رومان توغقان ، لېۋ تولستوېنىڭ «شامىلى» دارىپ ، چىڭغىس ئايىتماتوۋنىڭ «سەۋدايىلىقى» يۇققان تىلسىمات يازغۇچى !
ـ جالالىدىن ئەپەندى ، ـ دېدىم رومانچى يازغۇچىنىڭ بازارغا سېلىنغان كىتابلىرىدىن گەپ ئېچىپ ، ـ سىز ھېكايە بىلەن بىخ ئۇرۇپ ، پوۋېست بىلەن پورەكلەپ ، رومان بىلەن روناق تاپقان ھەمدە بازىرى چاققان يازغۇچى ئىكەنسىز . ھازىر كىتابلىرىڭىزنىڭ سودىسىى قانداق بولۇۋاتىدۇ ؟
ـ خۇداغا شۇكۈر ، خېلى ئىتتىك بولۇۋاتىدۇ .
ـ ھازىرغا قەدەر بازارغا قانچە كىتاب سالدىڭىز ؟
ـ ھېكايە ـ پوۋېستلاردىن 12 توپلام ، رومانلاردىن 16 توم ، جەمئىي 28 خىل كىتابىمنى بازارغا سالدىم . بۇنىڭدەن تاشقىرى ، كۆپ قىسىملىق تېلېۋىزىيە تىياتىرىدىن 18 نى يازدىم . 14 ئى ئشلىنىپ بازارغا سېلىندى ، 4 ئى ئىشلىنىۋاتىدۇ .
ـ تېلېۋىزىيە ساھاسىنىمۇ بوش قويماپسىز ـ دە ؟
ـ لېكىن ، ھازىر بۇ ساھادىن رايىم يېنىپ قالدى . ئۇلار مەلۇم سەۋەپلەردىن بىر قىسىم ئەسەرلىرىمنى بۇزۇپ قويۇشتى .
ـ يازغۇچى ئەپەندى ، ـ دېدىم مەن ئىجتىھاتلىق يازغۇچىغا ئىلتىجا قىلىپ ، ـ تۇنجى رومانىڭىز « مېھرىگىياھ » نەشر قىلىنىپ ، ھازىرغىچە 20 يىلغا يەتمەيدىغان ۋاقىت ئىچىدىلا شۇنچىلىك مول ئەسەر ئىجاد قىلىپسىز . سىزنى دىيارىمىزدا رومانچىلىقتا رېكورت ياراتقان تىلسىمات يازغۇچى دېسەك بولغىدەك ! روماننى زادى قانداق يازىسىز ؟
ـ رەھمەت ! مەن ھازىر پېنسىيەدە . ئۆزۈمنىڭ ئشىم ـ ئۆكۈزدەك كۈچۈم ، دېگەن ئەمەسمۇ . كۈندۈزلىرى سەككىز سائات ، كەچلىرى ئىككى سائەت ئولتۇرىمەن ... سەل تەخىر قىلىپ تۇرۇڭ ! ـ دەپ يازغۇچى تۇيۇقسىز ئورنىدىن لىككىدە تۇرۇپ يان ھۇجرىسىغا كىرىپ كەتتى ـ دە، ھايال بولماي ، ھازىرقى يېزىۋاتقان رومانى « ھايات قىسمىتى» نىڭ قوليازما ئورگىناللىرىنى ئەپچىقىپ ، ئالدىمغا قويدى ، ـ مانا ، كۆرۈپ بېقىڭ . بۇ ـ ھازىر يېزىۋاتقان رومانىمنىڭ دەسلەپكى نۇسخىسىنى . مەن قۇر سىزىقلىرى يوق، قېلىن ئاق قەغەزگە يازىمەن .
ـ يازغۇچى ئەپەندى ، ـ دېدىم مەن خەتلىرى مارجاندەك تىزىلىپ ، زىچ يېزىلغان، ئۆچۈرۈلگەن ، بويالغان بەتلىرى بولمىغان بىر دۆۋە ئورگىنالىنى كۆرۈپ ئولتۇرۇپ ، ـ بۇ ، رومانىڭىزنىڭ كۆچۈرۈلگەن نۇسخىسىمۇ ؟
ـ ياق ، بۇ ـ دەسلەپكى قوليازمام .
ـ بەتلەر بىر قەلەم بىلەن چىقىپ كېتىپتۇ، ـ دېدىم مەن تەئەججۇپلىنىپ ، ـ ئىككىنچى قەلەم تەگمەپتۇ ، ھە ؟
ـ مەن پىكىرىمنى پۇشۇرۇۋىلىپ ، ئاندىن قەغەزگە چۈشۈرىمەن ، ـ دېدى يازغۇچى ئىشەنچ بىلەن ، ـ قەغەزگە چۈشكەن سۆزنى قايتىدىن ئۆزگەرتىپ يۈرمەيمەن .
ـ نەشرىياتقا مۇشۇنداقلا يوللامسىز ؟
ـ كۆپ ھاللاردا شۇنداق . لېكىن بەزىدە نەشرىياتنىڭ ئۆلچەملىك ئورگىناللىرىغا رەپىقەم خالىدە ئۆز قولى بىلەن قايتىدىن كۆچۈرۈپ چىقىدۇ . خالىدە ـ باسما زاۋۇتىدا ئۇزۇن ئىشلەپ ئارامغا چىققان پېشقەدەم كوررېكتور . كۆچۈرۈش جەريانىدا سۆز ـ ئاتالغۇ ، ئىملا ـ جۈملە جەھەتتىن كۆزىتىپ بارىدۇ ، نامۇۋاپىق دەپ تاپقان جايلىرىنى تۈزىتىپ بارىدۇ .
ـ جالالىدىن ئەپەندى ، رومانىڭىزنىڭ تەكشۈرگۈچىسىمۇ ، تەھرىرلىگىچىسىمۇ يېنىڭىزدا ئىكەن . سىز نېمىدىگەن بەختلىك يازغۇچى ، ھە ! ـ دېدىم قىزىقىشىلىق بىلەن.
ـ شۇنداق . مېنىڭ بەختىم ئىجادىيىتىم بىلەن ، ئىجادىيىتىم رەپىقەم بىلەن ! ـ دېدى يازغۇچى قويۇق قارا بۇرۇتىنى سىلاپ ، چاي قۇيۇۋاتقان رەپىقىسى خالىدە خانىمغا رازىمەنلىك بىلەن قاراپ ، ـ ھازىر خالىدە ئىككىمىز ھەمكارلىشىپ ، قولىڭىزدىكى مۇشۇ توختاملىق روماننى يېزىۋاتىمىز ، روماننىڭ ئىككى بابى قالدى . خۇدا خالىسا ، تېز ئارىدا قولدىن چىقىدۇ . ھە ، خالىدە ؟
ـ شۇنداق ، ـ دېدى خالىدە خانىم كۈلۈمسىرەپ .
ـ ھۇ بەللى ، تىلسىمات يازغۇچىنىڭ تىلسىمى تېپىلدى ! ـ دېدىم مەن ھەزىل قىلىپ .
ئاجايىپ ئوخشاشلىق
مەن جالالىدىن ئەپەندىنىڭ قوليازمىسىغا كۆز يۈگۇرتىپ ، ئۇ يەر، بۇ يەرلىرىنى كۆرۈپ ئولتۇرۇپ ، بەزى ئورگىنالنىڭ ئۈستۈنكى تەرىپىدىكى ئاق يېرىگە يېزىلغان ئۇششاق خەتلەرنى بايقاپ قالدىم . بىر بەتنىڭ ئاق يېرىگە ؛ « 2007 ـ يىلى 12 ـ ئاينىڭ 7 ـ كۈنى ئۈرۈمچى جەنۇبى قاتناش بېكىتىگە بېرىپ بېلەت ئەكەلدىم ، بۇنىڭغا بىر سائەت ۋاقىت كەتتى . قايتىپ كېلىپ يېزىشنى داۋاملاشتۇردۇم » دەپ يېزىلغانىدى .
ـ يازغۇچى ئەپەندى، ـ دېدىم قىزىقسىنىپ ، ـ ئىجادىيەت ئۈستىدە كۈندىلىك خاتىرىڭىزنىمۇ پۈتۈپ ماڭىدىكەنسىز ـ دە ؟ نەشرىياتقا رومانىڭىز بىلەن بىللە يوللامسىز؟
ـ شۇنداق . بۇ ، روماننىڭ يىزىلغان ۋاقىت سەرپىياتىنى ھېسابلاپ چىقىشقا پايدىلىق ، رومان مۇھەررىرلىرى ئۈچۈنمۇ بىرئەرمەك ، ـ دەپ چۈشەندۈرۈشكە باشلىدى يازغۇچى ، ـ مۇشۇ بويىچە ۋاقىتنى جەملەپ باققانىدىم ، بەش ـ ئالتە يۈز بەتلىك بىر روماننى ئىككى ئايدا تاماملاپتىمەن . شۇنىڭغا قارىغاندا ، ھازىر ئىككى ئايدا بىر رومان يېزىۋىتىپتىمەن . ئىلگىرى، خەلق نەشرىياتىدا مېنىڭ بىر رومانىمنى تەھرىرلىگەن ئالىي مۇھەررىر دىلشاد سۇلتان ئەپەندى ئورگىنالنىڭ ئاق يەرلىرىدىكى سۆزلەرنى كۆچۈرۈپ قويۇپتىكەن ، چىرايلىق بىر كۈندىلىك خاتىرە بوپقاپتۇ .
ـ ۋاھ ، ئەجەبا ، شۇنداقمۇ ئوخشىشىپ كەتكەن بارمۇ ! ـ دېدىم مەن تاڭ قېلىپ ، ـ سىز مەشھۇر كلاسسىك يازغۇچى لېۋ نىكولايېۋىچ تولستوينىڭ باشقىلار تەرىپىدىن رەتلىنىپ نەشر قىلىنغان «تولستوي ئاقساقالنىڭ كۈندىلىك خاتىرىلىرى » ناملىق كىتابىنى كۆرگەنمىدىڭىز ؟
ـ ياق ، كۆرمىگەن .
ـ لېۋ تولستوي كۈندىلىك خاتىرىلىرىنى رومان يېزىش جەريانىدا پۈتۈپ ماڭغانىكەن . ئۇ ئورگىنالغا «بۇگۇن 12 ـ يانۋار . ئەتىگەن سائەت سەككىزدە قوپۇپ ، توققۇزغىچە كۆتەك ياردىم . ناشتىدىن كېيىن ئولتۇرۇپ ، سائەت ئىككىگىچە ئىشلىدىم ، ئاندىن كېيىن قورۇق ئىچىدە ئاتلىق سەيلە قىلىپ كۆڭۈل ئاچتىم» دېگەندەك سۆزلەرنى يازغان . بۇ ئوخشاشلىققا قارىغاندا ، سىزگە تولستوي بوۋاينىڭ« شامىلى» دارىغان ئوخشىمامدۇ !
ـ لېۋ تولستوينىڭ خاتىرىسىنى ئوقۇمىساممۇ ، رومانلىرىنى ئوقۇغان ، ـ دېدى يازغۇچى تەمكىن قىياپەتتە ، ـ ئۇنىڭ ئەسەرلىرىنى ئەينى زاماندىكى رۇس تۇرمۇشىنىڭ كۆزگۈسى دېيىشكە بولىدۇ . ئېھتىمال ، مەن تۇرمۇشقا تولستوينىڭ كۆزگۈسى بىلەن قارىغاندىمەن ، شاراپىتى تەگكەن بولسا ئەجەپ ئەمەس .
ـ يازغۇچى ئەپەندى ، جاۋابىڭىز جايىدا ، ـ دېدىم مەن مەمنۇن بولۇپ ، ـ يەنە بىر گەپ ، سىزنىڭ تاللىغان تېمىڭىزنىڭ ئالاھىدىلىكى ۋە ئەسەرلىرىڭىزنىڭ جەلپكارلىقى دۇنياۋى مەشھۇر يازغۇچى چىڭغىس ئايىتماتوۋنىڭ ئەسەرلىرىنى ئەسلىتىدۇ . سىز ئايىتماتوۋنىڭ قايسى ئەسەرلىرىنى ئوقىغان ؟ تەسىراتىڭىزنى سۆزلەپ باقامسىز ؟
ـ مەن ئايىتماتوۋنىڭ « ئاق پاراخۇد » ، « ئەلۋىدا گۈلسارە » ، « ئەسىردىن ھالقىغان بىر كۈن » قاتارلىق ئەسەرلىرىنى ئوقىغانمەن . ئۇ ئەسەرلەردىن زور ئىلھام ۋە روھىي ئوزۇق ئالغانىدىم .
ـ دەرۋەقە ، سىزنىڭ ئەسەرلىرىڭىزدىمۇ قەھرىمانلارنىڭ ئىككى ياقلىما خاراكتىرى ئېچىپ كۆرسىتىلىدۇ . مەيلى ئىجابىي ، مەيلى سەلبىي قەھرىمانلىرىڭىز بولسۇن ئۆزلىرىنىڭ ھەر خىل يۈزلىرىنى يوشۇرۇپ قالالمايدۇ . ئاق يۈزلۈكلەرنىڭ قارا يۈزلۈك تەرەپلىرى ، قارا يۈزلۇكلەرنىڭ ئاق يۈزلۈك تەرەپلىرى قەلىمىڭىزدىن قېچىپ قۇتۇلالمايدۇ . ئەمدى قەھرىمانلارنىڭ ئىككى ياقلىما خاراكتىرى ھەققىدە سۆزلەپ باقسىڭىز قانداق ؟
ـ ئوبدان . ھازىرقى زامان ـ زىددىيەتلىك ئالەم ، زامانغا بېقىپ ئادەملەرمۇ شۇنداق ، ـ دېدى يازغۇچى ئويلىنىپ ، ـ ھەممە نەرسىنىڭ ئوڭى ، تەتۈرى بولغىنىغا ئوخشاش ، قەھرىمانلارنىڭمۇ ئىككى ياقلىما خاراكتىرى بولىدۇ . ئادەم دېگەن ئەيىپسىز ئىلاھ ئەمەس ، ئۇ ـ خام سۈت ئەمگەن ئىنسان . شۇڭا زىددىيەتلىك ھىسىياتلارنىڭ بىرلىكتە مەۋجۇت بولۇپ تۇرۇشىنى يېزىش ، ئەلۋەتتە ، دۇنياۋى ئەدەبىيات يۈزلىنىشىگە ماسلاشقانلىق بولىدۇ .
ـ دېمەك ، سىزگە شۇ سەركەردىنىڭ « سەۋدايىلىقى » يۇققان ئىكەن ـ دە !
كۆڭۈل ئىزھارى
جالالىدىن بەھرام ئەپەندىنىڭ ئەسەر يېزىش ئۇسۇلىنى ، يېزىش جەريانىدىكى ھېس ـ تۇيغۇلىرىنى بىلىش مەقسىتىدە بەزى سوئاللارنى سوراپ ، بەزى نەرسىلەرگە ئورتاقلىشىشىمغا توغرا كەلدى .
ـ يازغۇچى ئەپەندى ، سىزنىڭچە ، پروزا ئىجادىيىتىدە ئىلھام چاقىرىلامدۇ ؟
ـ مېنىڭچە ، پروزا ئىجادىيىتىنىڭ ئۆزىگە خاس ئىلھامى بولىدۇ . پروزا ئۆزىنىڭ ئىچكى ئىلھامى بىلەن ئىلگىرىلەپ بارىدۇ ، ئۇنىڭغا شېئىرىيەتتىكىگە ئوخشاش تاشقىرىدىن ئىلھام چاقىرىشنىڭ ھاجىتى يوق . رومان قەھرىمانلىرىنىڭ ئۆزىمۇ يازغۇچىغا ئىلھام بېرىپ ، ئۇنى يېتىلەپ ماڭىدۇ ، كەلگۈسىدە بولىدىغان ۋەقەلەردىن بېشارەت بېرىپ تۇرىدۇ . ئۇلار يازغۇچىغا ؛ « ماڭا كۆپ ئىشلارنى قىلدۇردىڭىز ، يەنە قىلىدۇرىدىغان خېلى ئىشلىرىڭىز بار » دەپ ، ئۆزىگە مۇناسىۋەتلىك كىچىك ۋەقەلىكلەرنى خىيالەن توغدۇرۇپ بېرىدۇ .
ـ خوش ، سىز روماننىڭ ۋەقەلىك سيۇژىتىنى قانداق تۈزۈۋالىسىز ؟
ـ ئەگەر رومان يازماقچى بولسام ، ئالدى بىلەن ئۇنىڭ ۋەقەلىكىنى كىشىلەرگە ، ئائىلەمدىكىلەرگە ھېكايە قىلىپ سۆزلەپ بېرىمەن . سۆزلەش جەريانىدا روماننىڭ سيۇژېتى تۈزۈلۇپ بارىدۇ . كېيىنچە ، قولۇمغا قەلەم ئېلىپ ، بىر باشتىن يېزىشقا كىرىشىمەن . يېزىش داۋامىدا سيۇژىتلارنى يەنىمۇ پىششىقلاپ ، جىپسىلاشتۇرۇپ ماڭىمەن .
ـ سىز رومان ئىجادىيىتى ئۈستىدە قانداق تۇيغۇدا ئولتۇرىسىز ؟
ـ بەك ھوزۇرلىنىپ ، بەختلىك تۇيغۈ ئىلىكىدە ئولتۇرىمەن . مەن ئۈچۈن ئىجادىيەت دېمەكلىك بەخت دېمەكلىكتۇر . مېنىڭ بەختىم ئىجادىيىتىم بىلەن ياشنايدۇ !
ـ رومان ۋەقەلىكلىرىنى تەسۋىرلەش جەريانىدا كۆڭۈل كۈيىڭىز قانداق بولىدۇ ؟
ـ روماندىكى ۋەقەلىكنى تەسۋىرلىگەندە ، خۇددى ئۇنى ئۆز بېشىمدىن كەچۈرۇۋاتقاندەك ھاياجانلىنىپ ، گاھ خۇشال بولۇپ ، گاھ قايغۇرۇپ كېتىىمەن . بەزىدە كۆزلىرىمدىن ياش تۆكۈلۈپ ، ئاۋازلىرىم بوغۇلۇپ ، يىغلاپ تاشلايمەن .
ـ ئاپىرىن ! ـ دېدىم مەن يازغۇچىغا ھىسداشلىق قىلىپ ، ـ رومانىڭىزنىڭ ماۋزۇسىنى قانداق تاللايىسىز ؟
ـ روماننى باشلاشتىن ئاۋۋال ئۇنىڭغا بىر ـ ئىككى ۋاقىتلىق ماۋزۇ قويۇۋالىمەن . مەسىلەن، ھازىرقى يېزىۋاتقان رومانىمنىڭ ۋاقىتلىق ماۋزۇسى ـ « ھايات قىسمىتى » ، يەنە بىر ماۋزۇسى ـ «زەپىران ياپراقلار » . كېيىن يەنە بىر قانچە ماۋزۇ قوشۇپ ، ئارىسىدىن بىرىنى تاللىۋالىمەن .
ـ يازغۇچى ئەپەندى ، سىز قانداق يازغۇچىنى تالانتلىق يازغۇچى دەپ ھىساپلايسىز ؟
ـ تالانتنى ئىلاھ بېرىدۇ ، ـ دېدى يازغۇچى ئويلىنىپ ، ـ ئاشۇ تالانتنى تۇتۇپ قالالىغان يازغۇچىلا تالانتلىق يازغۇچى بولىدۇ، دەپ ھىساپلايمەن .
ـ سىزنىڭچە ، ئىجابىي ۋە سەلبىي قەھرىمانلارنىڭ پېشانىسىغا ياخشىلىق ياكى يامانلىق تامغىسىنى بېسىش كېرەكمۇ ؟
ـ مېنىڭچە ، ياخشىلىق بىلەن يامانلىق نىسپىيلىككە ئىگە بولىدۇ ، بىرى بىرىگە ئايلىنىپ تۇرىدۇ . بەزىدە ئىجابىي قەھرىماننىڭ يامان ئىشلارنى قىلىپ تاشلىشى ، سەلبىي قەھرىماننىڭ ياخشى ئىشلارنى قىلىپ قويۇشى مومكىن . شۇڭا ، ئەڭ ياخشىسى ئۇلارنىڭ پىشانىسىغا تامغا باسمىغان تۈزۈك .
ـ سىز تۇرمۇشىىڭىزدا ئۆزىڭىزگە نىسبەتەن نېمىنى ئەڭ ياخشى ئادەت دەپ ھېسابلايسىز؟
ـ ئەپۇچانلىقنى . چۈنكى ، ئۇ قۇدرىتى چەكسىز ، ئەڭ ئۇلۇغ ، ئەڭ پاك نەرسىدۇر .
ـ سىز توي ، نەزىر ، چىللاقلارغا بېرىپ تۇرامسىز ؟
ـ بارىمەن . لېكىن تويدا ئۇزۇن ئولتۇرمايمەن ، نەزىردە دۇئانى ساقلايمەن . چىللىغان يەردىن قالمايمەن .
ـ سىزنىڭ ئۆزىڭىزگە دەستۈر قىلىدىغان ھېكمەتلىك سۆزىڭىز نىمە ؟
ـ مۆتىدىللىك ، سەمىمىيلىك !
ـ مۆھتەرەم مۆتىدىل ئەپەندى ، سەمىمىي سۆھبەتلەشكىنىڭىزگە رەھمەت ! ـ مەن ئاخىرىدا يازغۇچى بىلەن خۇشال ھالدا خەيرلەشتىم ، ـ سالامەت تېنىڭىزگە ساغلام ئەقىل پار بولسۇن ، ئىجادىيىتىڭىزگە ئۆمۈرلۈك بەخت يار بولسۇن !
يازغۇچى جالالىدىن بەھرام بىلەن سۆھبەتتىن .
مەنبە: يازغۇچىلار تورى
历史上的今天:
دىكتور قىزنىڭ ھېكايىسى 2011-04-03ناتونۇش ئاقكۆڭۈل يىگىت 2011-04-03كاككۇك سايرىغان باھار 2011-04-03ھايات گۈلشەنىدىكى ئەھمىيەتلىك ئىزلار 2011-04-03