قەشقەرگە قايتىش -4

(داستان)

دىلشات ساھىت

كوچىلار__   8  مۆجىزە

 

ھالقىڭىز چىرايلىقكەن

ئايغا قاراپ سوققانمۇ؟

ئىسمىڭىز چىرايلىقكەن

ھاجى مەخسۇم قويغانمۇ؟....

                                (قەشقەر خەلق قوشىقى)

تورغاي، تۇمۇچۇق

كاككۇك ئاۋازى

بېقىلغاندەك ئۆيلەردە توپ، توپ

ئۈجمە تىرەكتە

گاھى يۈرەكتە

ئۇۋا سالار شادلىققا تولۇپ.

 

جانان ۋەستە جانان كوچىسى

ئەنجان رەستە، زەرگەر كوچىسى

ئەبرىشىمكا، دوغا بەگ كۆلى

ئېچىلىدۇ تىلسىمدەك بىر-بىر__

كونا دەرۋازا

باغ، كوچىدىن پۇرايدۇ ئەنجۈر.

يوق بۇ يەردە چىگرا سىزىقى

ئۆگزىلەرگە ئۆگزىلەر قونغان

 

بۇلاق چاپار ئېرىق ئىچىدە

نەي ساداسى سىرلىق كىچىدە

قىرائەتكە مۇڭداش قىرائەت...

 

ناتونۇش بىر تىل

ناتونۇش چىراي

تاپالمايسەن كىتاب ئىچىدىن

تاپالمايسەن خالتا كوچىدىن

ئوغرى يوق شەھەر

ئوغرىلارنى باپلايدۇ ئوغرى.

 

ھەر كوچىدا بىردىن پادىشاھ

لەڭپۇ، ئۈگىرە

پولۇ، گۆش گىردە

دوغاپ، لەغمەن

كاۋاپ، پەرمۇدە

ئولتۇرىدۇ ئايرىم قەسىردە

كەسكەنيارنىڭ تۇمشۇقلىرىدا

گىرە سېلىپ يۈرەر ۋەزىرلەر

تاڭدىن تۈنگىچە

تۈندىن تاڭغىچە

ئۈزۈلمەيدۇ خوراز ئاۋازى

ئۈزۈلمەيدۇ ئەزان ساداسى

 

قۇتلۇق شەۋقى

نامىزىنى ئوقۇپ ھېيتگاھتا

دۇئا قلار ئاۋامغا، ئەلگە

دۇئا قىلار ئۇلۇغ ۋەتەنگە

 

تىللا سارىيى

كارۋان سارىيى

ياڭاق سارىيى

رىم، ئەنجاننى، چاڭئەن شەھرىنى

باغاشلايدۇ ئۆز نەۋرىسىدەك.

 

قار گۈللىرى

كۆمۈپ قويسا تۇنجى مۇھەببەت

ۋاللەي

ئوردىكام

ئەلى بابا، قىرىقى قاراقچى

كوچىلارنى كىيەر بېشىغا

 

ئۆمۈر چولپىنى

گۈلە-قاق بىلەن

گاھ ياڭاق بىلەن

مىدال ئاسار بۆرە بايلارغا

بىرى تۇنيۇقۇق

بىرى ئىلتەرىش

بىرى كۆلتىگىن

ئوردا ياساپ

تۇلپارلار مىنىپ

ئاقار سايلارغا.

 

باھار

پىشايۋاندا ئولتۇرۇپ خۇشال

ئۇچۇرماقتا ئىپار كىپىنەك

ئۇچۇرماقتا نەۋرۇزلۇق لەگلەك

چاشقان قۇلاق بولدى تىرەكلەر.

 

ئەللەي قوشىقى

شور تونۇر نېنى

قىرىق كوكۇل ئوماق كىيىك كۆز

پىننە سالغان چۆچۈرە ھىدى

رىۋايەتتۇ رىئاللىقتىكى..

 

موماي

ئۆتكۈزمەكتە مەۋلۇت كۈنىنى

 

تۇمارىس

نوزۇگۇم

بۆشۈكلەرگە ئايلانغاندا تۈن

كارۋاتتىكى خورەك ئاۋازى

مەھەللىنى ئالىدۇ پۈتۈن

جىسەكچى

يانفۇنىدا يوللايدۇ ئۇچۇر

ئاسىيانىڭ سۈت ئۇيقۇسىنى

ئۇخلاۋاتقان ساددا ئەركەككە

 

ياچاق ئېيى

رامىزاننىڭ كۆلچەكلىرىدە

يۇيۇلماقتا يېڭى ئىتىقاد

ياغ بازىرى

قوناق بازىرى

خان بازىرى

تۇماق بازىرى

ئۆتكۈزمەكتە سەلتەنەت پارات.

يۇمۇلاق شەھەر

غوجام كۆلبېشى

خەلپەت كوچىسى

ئوراڭقاي يولى

كۈز ئاخشىمى چىچەكلىرىدەك

ئېچىلماقتا يەنە ھۆپپىدە.

 

چەمبەر ياسار مەدىكار توپى

موخۇركىسى پۈرلەشكەن ساراڭ

چورۇق كىيگەن بىلەيچى بوۋاي

ئىشىكىدىن ياسايدۇ پاراڭ

قوشۇق، تاۋاق

كۆمۈلمىگەن ئىز

دۇنيا قىزدۇر

ھاياتمۇ ھەم قىز...

 

يىپ ساتىدۇ سەھرالىق كىلىن

چاچ ساتىدۇ كۈلگۈنچەك جۇۋان

كۆزلەردىن كۆڭۈلگە كىرىپ چىقىپ

تاغلىق كومشاغا

پۇچۇق ھىجىردە تۇتماقتا قىمىز

 

ئۇلاغ تولغان رەستە بۇرجىكى

تاقىچىغا ماكاندۇر ماكان

تاتلىق بىر نەپەس

بىرخىل ئىزدا چۆرگىلەر جاھان...