ئۆزۈمگە نەسىھەت

زاكىرجان مىجىت سىددىقى

بولما غاپىل، كەچ بۇدۇنيا راھىتىدىن ئەي نادان،

بارى تۆت كۈنلۈك قونالغۇ-بۇ، باقاسى يوق جاھان. ①

كۆر، ئىرادەت قىلدى رەببىم ئەھلى جەننەت ئەتكىلى،

ئويلا، ئىنساننى ياراتماقتىن نېمە مەقسەت، نېشان؟②

كىم بۈگۈننىڭ روزىغارى بىرلە قوپتى ئەتىسى؟

نەدە فىرئۇن؟ نەدە ھارۇن؟ نەدە كىسرا ئوردىسى؟

گەر تەپەككۇر ئەيلىسەڭ چىن بىرلا ھەقنىڭ ۋەدىسى،

كۆز ئاياندۇر ھەقكە، ۋەللاھى كۆرەلمەس كۆز ھامان... ③

بىلكى، تاپقاي دىل ئاراملىق بىرلا ھەقنىڭ زىكرىدىن،④

تىل ياراملىق بولغۇسى ھەم مۇستەقىملەر پىكرىدىن.

كىمكى ئىمان ئېيتتى يالغان، ئالدى لوقما پىتنىدىن،

ئاخىرەتتە ھەممىدىن شۇ- تارتقۇچىدۇر چوڭ زىيان. ⑤

--------------------------------

①«ھاياتىي دۇنيا پاراغىتىنىڭ بۈگۈنى بار، ئەتىسى يوق. » سۈرە بەقەرە 179-ئايەت

②«ئىنسانلارنى پەقەت ماڭا ئىبادەت قىلىش ئۈچۈنلا ياراتتىم»(سۈرە زارىيات 56-ئايەت)

③«اللەنى كۆزلەر كۆرەلمەيدۇ، اللە كۆزلەرنىڭ ئەھۋالىنى بىلىدۇ»(سۈرە ئەنئام 103-ئايەت)

④«دىللار اللەنى ياد ئېتىش بىلەن ئارام تاپىدۇ»(13-سۈرە رەئد 28-ئايەت)

⑤«ئىنسانلار ‹ ئىمان ئېيتتۇق› دەپ قويۇش بىلەنلا سىنالماي تەرك ئىتىلىمىز، دەپ ئويلامدۇ؟»(سۈرە ئەنكەبۇت 2-ئايەت)