قەدەھتە تاشقان رۇبائىيلار
نۇرمۇھەممەت ھاشىم


1

شارابنى كۆپ ئىچتىم غەرق مەست بولدۇم،
ئۆزۈمنى ئىگىلەپ شاھ－خاقان بولدۇم.
ئىشقىمنىڭ گۆھىرى تاشتى خەزىنەمدىن،
ھەممىدە بار بولدۇم، ھەمدە يوق بولدۇم.

2

كېچە－كۈندۈز شارابىمنى خۇش ئىتەي،
جور بولۇپ يار ساڭا توختىماي ئىچەي.
سىمايىڭ چاقنىغان مەيگە قاراپلا،
بىر ئۆمۈر ئولتۇرۇپ مەست بولۇپ ئۆتەي.

3

قەدەھتە سۈزۈك مەي تىترەر تولۇن ئاي،
مەستانە بولغانچە كۆزۈڭگە قاراي.
مىسلىسىز گۈزەلدۇر ئاشۇ دەقىقە،
بىر ئۇلۇغ ئېقىندەك ئۆركەشلەپ ئاقاي.

4

مۇھەببەت شارابتۇر، شاراب مۇھەببەت،
بىرسىلا بولسىمۇ رازىمەن پەقەت.
مۇھەببەت شەربىتى مەست قىلسا مېنى،
شارابنىڭ لەززىتى ئۇنىڭدىن دەھشەت.

5

سەن ئاشىق بولمىساڭ ئىچمىگىن شاراب،
ۋە ياكى ئاشىق بول ئىچكەندە شاراب.
بىرسىمۇ بولمىسا سەندە ناۋادا،
جىممىدە ئولتۇرغىن ئۆزۈڭگە قاراپ.

6

مەندە بار بىر يۈرەك مەسۇ－مەستانە،
سۆيگۈگە لىق تولغان گۈل－گۈلىستانە.
مەن گۈلىستاندا ھەم گۈلىستان مەندە،
كەيپ مەن ئۆزۈمدە قىلىپ سەيلانە.