زەيكەش تىنىقلار
مەھمۇد مۇھەممەد(ئۆزلەت)
بەلكىم
زاتى كەرىمگە يۈز كېلەلمەيمەن
ئېرىشكىنىم كۆپ يوقاتقىنىمدىن
يا يوقاتقىنىم ئېرىشكىنىمدىن.
ئىمان
ۋىجدان بىلەن مېنى سىقىدۇ
قەلبىم ھۇۋلايدۇ
ھۇۋلايدۇ يېرىقلىرىدىن
جەزبدار رەڭلەر.
بەلكى بۇنداق ياشىماسلىقىم كېرەكتۇر
رەقىبنىڭ مۇز چىرايىغا بېقىپ.
بەلكى بۇنداق ياشىماسلىقىم كېرەكتۇر
تېپىۋاتقان يۈرەكنى سىقىپ!
ئەمما يېڭى ھاياتلىق، كونا سەھنىدە
ئوخشىيالماي كەلدىم ئۆزۈمگە...
ئەركەك بولۇپ يارالغان ئەرلەر
ئەلنىڭ ئوغلى بوپ
تېخى مېۋە بەرگەن يوق بىز قويغان تەكلەر!
يولىمىز كۆپ
يولىمىزدا تولا ئەگمىلەر
شۇنداق بولارمۇ دەيمەن
شۇنداق بولارمۇ دەيمەن
مارجانلىرىم ئۈزۈلمەكتە.
بوۋام ماڭا تۇتقۇزغانتى ئات
كەتكەندە بىر ئەركەكنىڭ ئۆمرىنى ياشاپ،
ئىگىلىپ يۈرمەيتتى بوۋام،
تىترەپ يۇرمەيتتى بوۋام،
ئات ئۆستىدە شۇ مەغرۇر تۇرقى
كۆڭۈل ئويۇمنى باسماقتا قورام.
نەھال
قولۇمدىن كەتتى يۈگەنلەر!
يۈزلىرىمنى نومۇس تەستەكلەر
يۇمران بىخلارنى ساقلىيالمىدۇق
ساقلىيالمىدۇق.
نومۇس!
ئاتاڭ سەندەك ئوغۇل تاپمىغان
ئاناڭ سەندەك ئوغۇل تۇغمىغان.
كۆرمەكتىمىز ئەنە ئەركەكلەر
ئېغىر خۇرسىنىش،ئاچچىق ئۆرتىنىش
قېتىپ تۇرغان تالاي داپ يۈزلەر.
ئۇيغۇرى گۈل
قىزلىرى غۇنچە
ئەرلىرى تۇپراق
زەيكەشمۇ شۇنچە؟
بىر تال ئۇرۇق، بىردان تىكمىگەن
داۋراڭ قىلار تالاي ئادەملەر.
نىچۈن ئانىلارنىڭ كۆزلىرىدە مۇڭ؟
نىچۈن قىزلارنى كۆرىمەن سولغۇن؟
بۇ قىزلار
ئايۋانىمنىڭ چېرىقى تۇرۇپ
نىچۈن يانمىدى كۆڭۈل تۆرۈمدە؟
بۇ قىزلار
كامان ئېلىپ زىبا قەددىدە
نىچۈن كۆكرىكىمگە ئاتمىدى ئوقلەر؟
پادىچىغا تەگسە مەلىكە
سىغدۇرالماي ھېچ ئەقلىمىزگە،
ھەيرانمىز
ئۇلار يىگەن كۆيۈك زاغرىغا،
تەڭ بېقىشقان بىر قاپاق سۇغا،
تۈتەكلەردىن ھالقىغان نۇرغا،
ھەيرانمىز
ئايدىن خىلۋەت بىر جۈپ يۇلتۇزغا!
ھەيرانمىز
بۈركۈتنى ساقلىغان شاكال تۇخۇمغا،
يازغا ئۇلاشقان بىغەم قوڭغۇزغا.
ھەيرانمىز
گۆھەرى مۆلدۈرلەپ تۇرغان قارچۇققا،
ئىبراھىم پەيغەمبەر ساق چىققان ئوتقا.
زاتى بۈيۈكنى ئويلىماي جاھىل
ئۆز جېنىغا سالغان زۇلۇمغا.
بىر نەپەستە ئۆزۈلىدۇ جان
ئىشىنىمز ئەجەپ تىنىققا.
پايىمىز باردۇر
بارسا كىلەر يا كەلمەس يولغا
مەلھەم ئىزدەپ ماڭساق ئۇسسۇلغا،
ئۇ تەۋەككۇل دەپ ئۇلاشقان نۇرغا.
بىلدىم
ئەركەكلەرنىڭ مەلىكىسى بار
ئايۋانىدا ئوخشار خاقانغا...
ئوكيان تورىدىكى بارلىق ئەسەرلەرنىڭ نەشىر ھوقۇقى ئوكيان تورىغا مەنسۈپ. قالايمىقان كۆچۈرۈپ ئىشلىتىشكە، قانۇنسىز نەشىر قىلىشقا، ھەرقانداق مېدىيا ۋاستىلىرىدا ئېلان قىلىشقا بولمايدۇ. خىلاپلىق قىلغانلارنىڭ قانۇنى جاۋابكارلىقى سۈرۈشتە قىلىنىدۇ. قالايمىقان كۆچۈرۈپ تارقاتقان تور بىكەتلەر ئاشكارە ئېلان قىلىنىدۇ.