ئۈچ شېئىر
نۇرئامىنەم ئەھەت


باھارسىز ياشاش

تۇنجى شۇ باھارنى ئۆزۈڭ تونۇتۇپ،
ئاھ، مىليون باھارسىز قويدۇڭغۇ ئانا.
ئۈمىدۋار بولۇشنى ئۆگىتىپ تۇرۇپ،
بىر ئۆمۈر ئۈمىدسىز قويدۇڭغۇ مانا.

قەبرەڭگە مىڭ قېتىم باردىم باش ياقتىم،
بىر قېتىم كۆرگەندەك يانمىدى يۈرەك.
سېنىڭسىز باغلاردا شىۋىرغان كۆردۈم،
سەنمىدىڭ قەدرىمنى يۆلىگەن تىرەك.

قارلىغاچلار ئاينىغان جايلارنى كەزدىم،
چوڭلىرى بالام دەر، كىچىكى ئانا.
دوستۇمنىڭ ئانىسى يۈز يىل ياشىدى،
ئاھ، ئەجەب قەيەردىن كەلگەن دەرد ماڭا.

بىر قەدەم باسساممۇ يەكلەيدۇ زېمىن،
ئېھ، سەن يوق تويلاردىن پەرىشان ياندىم.
توزىدى بەركىتىم گويا شامالدەك،
بەختىمنى تىلەيتتىڭ ھەي ئەجەب چاندىم.

قېنىمنىڭ ئەۋجىدە ئازاب كەلكۈنى،
ئارمانىڭ چۆلىگە باشلىسام دەيمەن.
كۈلگۈم بار قېنى كىم بىللە ئاڭلايدۇ،
ھەي... يالغۇز غەم تارتىپ يالغۇز كۆكلەيمەن.

ئوغلۇمغا

سەن مېنىڭ بالامسەن جېنىمدىن ئەزىز،
مەن سەندە قايتىدىن يارالدىم بالام.
قاقاقلاپ كۈلگىنە زېمىن ئاڭلىسۇن،
تاغ كەبى تاغلارغا قوشۇلغىن بالام.

ئوغۇزخان بول بالام يىراقلارغا باق،
ھەقىقەت كۆلىدە چۆمۈلگىن بالام.
پەرھاد بول يا تاھىر مۇھەببەت ئۈچۈن،
ئېتىقاد، غۇرۇرغا كۆمۈلگىن بالام.

يىغاڭنى بىر مەنلا ئاڭلاي جور بولاي،
مېھرىمنىڭ نۇرىدا قۇرۇتقىن بالام.
ئاتاڭغا قانات بول ئەلگە تاج كەبى،
قاراڭغۇ دىللارنى يورۇتقىن بالام.

سەن مېنىڭ بالامسەن خەلقىمنىڭ قېنى،
ئەلگە ئەر مىسالى قېتىلغىن بالام.
شان قۇچۇپ كۆك كەپتەر كەبى بىر كۈنى،
ئارمانلار كۆكسىگە ئېتىلغىن بالام.

تەبىرسىز كېچە

1

قۇشلارنىڭ ئىزىدا تەلۋە ساداقەت،
تىۋىشسىز جىمجىتلىق تىلىنار قەبىھ.
مۇجۇلغان يالغۇزلۇق يۈرەكسىز بىر تەن،
مۇزىكا ئەۋجىگە قىستالماقتا ئېھ.

تۇپراقنى تاتىلايدۇ يىرىڭلىق بارماق،
كىرپىكى شور لېكىن يۇلتۇز ئېسىلغان.
ھىدى بار ئەرۋاھنىڭ بۇندا يوشۇرۇن،
مۆجىزە جاھىل بىر ئارمان بېقىلغان.

چىپىلدار سوۋۇغان تىنىقى ئۇنىڭ،
يوشۇرۇن كەلمەكتە ھاياتنىڭ ھىدى.
يېشىلگەن يۆگەكنىڭ يوچۇقلىرىدىن،
ئۈزەلمەي تۇرسىمۇ ساقىپ ياش دېغى.

پىلتىڭلاپ بۇ بوۋاق غەمسىز، نىشانسىز،
تۆت تامنى ئەللەيلەپ ئۇخلاتتى ئاستا.
تورۇسنى بۆلىدى يۆگىكىگىمۇ،
گۆھىرى ساقىتقان سۇنۇق بۇلاقتا.

قايرىلىپ ئېھ، چەتكە تاشلىدى نەپەس،
ۋىلىقلاپ ئالدىغا ئۇمتۇلدى تىمەن.
چىرمىشىپ قىسمەتنىڭ تەتۈر پىيىگە،
قول سوزدى پاناھسىز يۈرىكى بىلەن.

غازاڭلار شىرىقلاپ ئوقۇيدۇ ناخشا،
قىزىل شام بىپەرۋا ياندۇرىدۇ ئىس.
تەقدىرنىڭ ئازادە ئالقىنى دائىم،
شور بويۇن ئاجىزغا بولىۋېرەر قىس.

2

غازاڭنىڭ چۈشىدە سۇنغان دېرىزە،
رۇباشكا بىلەنلا كۆيمەكتە مەزلۇم.
باغرىدا مۇمكىنسىز ئەللەي سۇنىقى،
لەنىتى كېچىنى ئايناتماقتا غۇم.

سۇپىدا چۇۋۇلغان بورىنىڭ تېنى،
پەگاغا تاشلانغان قاقشال بىر تېرە.
ناتونۇش ئايالنىڭ سارغۇچ كۈلكىسى،
تىتىلغان كىگىزنى قىلار مەسخىرە.

يالىڭاچ ئەركەكتە كۆپجىگەن بىر قان،
دېۋەيلەپ مەزلۇمنى قىلماقتا پايخان.
«سۇ قاينات، يۇندا تۆك، ھەي سەن قەلەندەر...»
مەزلۇمنىڭ قارىچۇقى يۆتكىلەر ئاران.

قىزىل شام، تىترىگەن ئىشىك－بوسۇغا،
كېچىنىڭ تېنىگە بولمىغاندەك يەم.
ھازىدار موھتاجلىق، ھۇۋلىغان تۆت تەن،
مالىمان بۇ ئۆيگە تاراتماقتا نەم.

شىۋىرغان ئوينىتار تۈتەكلەرنى خوپ،
مۇقەددەس ھاياجان بولغاندەك ئادا.
تېلىقىپ قالغاندەك جىمى تەبىئەت،
ئادەملەر خۇداغا يېقىنلاشقاندا.

3

ھە، مانا يىل بېشى ئون سەككىز بىلەن،
ياشلىقنىڭ قەسىرىدە تۇرغانتى سۆزسىز.
باھارسىز، تومۇزسىز، شىۋىرغان بىلەن،
ئاجىز بېغىشلىرى يېرىلدى ئەنسىز.

يېلىنجاپ بەدەندە خوتەن ئەتلىسى،
پەقەت بىركېچىلا ئىللىدى تۆشەك.
نامراتنىڭ پۇشتى ئۇ، پاناھسىز بىر قىز،
گۆدەك بىر ئىستەكتە پۇچۇلاندى بەك.

ھاياتنىڭ تىنىقى سوغۇق بەك سوغۇق،
داۋامدۇر كۈن ۋە تۈن، ئەتىلەر بىلەن.
يۈرەكلەر ئەلەمدىن بولسىمۇ چاك－چاك،
ئېھ، ئارزۇ كارۋىنى ماڭدۇرار تىمەن.

كىملەردۇر كۈلىدۇ، كىملەر يىغلايدۇ،
ئەتىنىڭ قەدرىدە يوچۇن سېغىنىش.
ئارمان ئۇ ئادەمنى ئەللەي ئېتىدۇ،
ھەر قەدەم تۇغسىمۇ يۈزمىڭ ئالدىنىش.

باغرىدا قىستالغان ئانىلىق قەلب،
قىرتاق بىر نەم بىلەن چايقىلار دۇنيا.
بىر ياندا ئاھانەت يۈتمەكتە ئۇنى،
ئىڭراشلار ئالمىشىپ قاينىغان يانا.

نىكاھنىڭ رامكىسى شورالغان يىلىك،
بىر ياندا پىلىلدار ئۈمىد قارىسى.
ئۈچ كۈنلۈك بوۋاق ئۇ تەبىرى چەكسىز،
سوتلىنار ھەر ياندا ۋىسال يارىسى.

يۈندىلار يىغىلغان ئەخلەتلەر تېغى،
ناتونۇش ئاياللار ئالمىشىدۇ پات.
ئېرىنىڭ كۆزىدە قاتقان مۇز داۋان،
سىرلىق بىر ئالەمدەك تۇيۇلىدۇ يات.

4

بوۋاقنىڭ كۆز يېشى پەرىشتىلەردەك،
ئۇچماقتا ئاسمانغا كۆيمەكتە يۇلتۇز.
بىر چەتتە ماغدۇرسىز مەزلۇم تىنىقى،
تىتىلغان كىگىزگە يۆگەلمەكتە ئۇز.

مەزلۇمنىڭ لېۋىدىن پۇرقۇيدۇ تۇمان،
قولىدا تاماكا قاراقلىرى سۇس.
بوسۇغا تۈۋىگە زوڭزىيىپ ئويچان،
غۇربەت قايغۇسىغا ئوقۇيدۇ ئەپسۇس.

ئاينىغان ئاھانەت دۇت نەپەسلىرى،
سىقسىمۇ تېنىنى ياشايدۇ جىمجىت.
تاپىنى يېرىلغان قوللىرىدا چاك،
ئاقۇش چاچلىرى چىگىش بەك چىگىش.

خاتىمە

مۇھەببەت روھىنىڭ ئەڭ ئالىي قۇدرىتى،
كىمنى سۆي ۋە سۆيمە تاللايسەن ئۆزۈڭ.
ئەقلىڭنى كۆيدۈرسە چاغلىق ساختىلىق،
ياشايسەن بىر ئۆمۈر كۆتۈرمەي يۈزۈڭ.

ھايات ئۇ ئويۇنچۇق ئەمەستى ئەسلى،
بىر خاتا قەدەمدە تۈمەنمىڭ ئازاب.
ئارقاڭغا قايتمايسەن ماڭىسەن مەجبۇر،
ئازابنىڭ يولىدا كەتسەڭمۇ ياداپ.

ئەتىنى چۈشەيدۇ قايسى ئىرادە،
تەڭرىنىڭ قولىدا ئايلىنار دۇنيا.
بىلمەيمىز كىملەردە قانداق ئىستىقبال،
تەبىرسىز كۈنلەرنى ياشايمىز ئەمما.