ئەھەدى ر و با ئىلا ر

(1)
ھايات - شام ، ئۆچىدۇ تۇرمايدۇ يېنىق ،
كەلدىڭمۇ جاھانغا ، كەتمىشىڭ ئېنىق .
شۇ <<كىلىپ - كەتمەك >> نىڭ ئۆزى بىر سۇئال ،
جاۋاپقا ھازىر بول ، ئۆچكىچە تىنىق !

(2)
ئوخشايدۇ بىنامغا ھاياتنىڭ يولى ،
مېھنەتكە باغلىقتۇر ئۇنىڭ ھۇسۇلى .
نېمىنى تېرىساڭ ئالىسەن شۇنى ،
دېمەككى ، مۇھىمدۇر تېرىش ئۇسۇلى .

 (3)
ئادەمگە ئادەملىك زىننىتى ئەلا ،
نە زىننەت ، شان -تۆھپە ، مېھنىتى ئەلا .
ئەبەدى ئەمەستۇر ئادەمگە ياشاش ،
دېمەككى ، ھەردەقىق قىممىتى ئەلا !

 (4)
ئا لەمدىن ئادەمدەك ئۆتكىنىڭ خوپتۇر ،
<<ئويناش >>تىن ئويلاشقا كۆچكىنىڭ خوپتۇر .
مەي ئىچسەڭ چىرايلىق ھايا بىلەن ئىچ ،
بولمىسا سوغۇق سۇ ئىچكىنىڭ خوپتۇر .

 (5)
ھايات ۋە ماماتنىڭ ئارىسى بىر قاش ،
قاش كەتسە شاھ ، گادا ...ھەممىسى ئوخشاش .
بەرىبىر ئوخشاشقۇ بارار جايىمىز ،
نېمەڭگە يوغانلىق قىلىسەن ئاداش !

 (6)
سەن نېمە ، مەن نېمە ، ئوخشاشلا ئادەم ،
مېنى پەس چاغلىما ، ئۆزۈڭنى ھاتەم .
ئۇچارمىش پاختەكمۇ بەزىدە ئوڭدا ،
ئالمىشىپ تۇرارمىش ، توي بىلەن ماتەم .

(7)
ئادەمدە كۆز ئىككى ، ئەمما ئېغىز بىر ،
مۇشۇنىڭ ئۆزى بىر ھىكمەت ، ئەمەس سىر .
ناۋادا ئالماشسا ئېغىز بىلەن كۆز ،
ھالىمىز نە بۇلۇپ كېتەتتى ، يا پىر ...!

(8)

ئې كۆڭۇل ، ياخشىنىڭ ئاشىناسى بول ،
زاۋالسىز ئەسكىنىڭ ئىستىلاسى بول .
پاراغەت تەختىنىڭ شاھى بولغىچە ،
ئەل - ۋەتەن ئىشقىنىڭ مۇپتىلاسى بول .

 (9)
مەيلى سەن باي ياكى گادايدىن تۇغۇل ،
بول ئاۋال ياخشى قىز ، ۋاپادار ئوغۇل .
تۇزكورنىڭ دۇ ئاسى بولمايدۇ مەقبۇل ،
بولسىمۇ بىر ئۆمۇر تا ئەتكە مەشغۇل !

 (10) بالىلىق چاغلىرىم قۇچاقتا ئۆتتى ،
ياشلىقىم يالقۇنلۇق ئوچاقتا ئۆتتى .
قېرىلىق يېقىنلاپ كەلگەندە ئۆمرۈم ،
يۇرەككە قادالغان پىچاقتا ئۆتتى ...!

( ئەھەدى 2005-يىل ماي)