- نېمە بوپ كەتتى، تېخى تۆنۈگۈن بىرگە ئىدۇق
- سەگۈنچەكتە ئىككى ئادەمنى كۈزەتكەن ئىدۇق، تېخى
- ئۆتكەن يەكشەنبە قىرلاردا ئايلانغانىدۇق
- « كۆچمەن قۇشلار يەرلىك قۇشلاردىن تېخىمۇ بەخىتلىك
- ھاياتنى تولۇق، تولۇق ياشىماقتا» دېگەن ئىدى، ئۇنتالمايۋاتىمەن...
Ölüm Risalesi
Erdem Beyazıt
ئۆلۈم رىسالىسى
ئەردەم بەيازىت ( تۈركىيە)
تامچە - تامچە قۇرۇلار ھايات
ئۆلۈم بولسا قىمىر-قىمىر
ئاڭلىماق قولاي
ئاڭلاتماق مۈشكۈل
ھەر دەقىق
بىلىپ تۇرىمەن
ئاز-ئازدىن ئۆلۈۋاتقىنىمنى
خەۋىرىم بار تۇغقان ئايدىن
ئېرىگەن قاردىن، ئاققان سۇدىن
ۋە ئاستا-ئاستا تۈگەۋاتقان ۋاقىتتىن
تەكرارلاپ تۇرماقتا سائەت
ۋاقىتمۇ مەخلۇقتۇر
ۋاقىتمۇ مەخلۇقتۇر
ئىشلىمەكتە يۈرىكىم
چاچلىرىم ۋە كۆزلىرىمنىڭ
ئەڭ كىچىك ھوجرىلىرى كونىرىماقتا
ئوقۇۋاتىمەن ھاياتنى
تۇپراقنىڭ ئۈستىدىن جىقراق
ئاستىدىكىلەر بىلەن بار بولغانلىقىنى
تۇپراق
ئۆلۈمگە ئاچ
ئۆلۈمگە مۇھتاج
ھايات
ئۆلۈم جەزمەن
ۋە ئۆلۈم مۇتلەق
يالغۇز ئىشىكىدۇر ئۆلۈمسىزلىكنىڭ
ئۆلۈم بىلەن تونۇشقاندىن كېيىن چۈشەندىم
پەقەت ياشاشنىڭ بىر كىملىك بەلگىسى ئىكەنلىكىنى
مەخلۇقتا ئاققان
شىلدىر-شىلدىر بىر ئېرىقتۇر ئۆلۈم
ئاتىلار ئۆلەر
كېزەر قوللىرى ئۆلۈمنىڭ
چاچلىرىدا ئانىلارنىڭ، ئوغۇللارنىڭ
ئانىلار ئۆلەر
يىلتىز تارتار ھەسرەت يۈرەكلەرگە
« بىر بالا پىر بوپ كەتسىمۇ»
شۇ چاغ چۈشىنەر نېمىمىش يىتىملىك
ئوغۇللار ئۆلەر
بىر قەپەز بولار ئۆلۈم
ئانا قەلبى بىر قۇشتۇر
ئازادلىقنى قۇبۇل قىلماس
سۆيگنى ئۆلەر
بىر ھىجرەت بولار ئۆلۈم
بىر ئانا يۇرت
مەسىلەن، ساۋاقداشلار
ساۋاقداشلىقلار بار مەكتەپلەردە
قارىساڭ بىرى كەلمەس بىر كۈنى
ۋە شۇندىن تارتىپ ھەرگىز كېلەلمەس
قاپقارا بىر كۆلەڭگە چۈشۈپ تۇرار
باغچىغا، كارىدورلارغا، سىنىپلارغا
ئېغىزلاردا كۇسۇلداشلار
كىملەرنىڭدۇ كىرپىكلىرى ھۆل
باغچىنىڭ خالى بىر يېرىدە ئولتۇرۇپ
قولىدا بىر تال ياغاچ سىزار رەسىمىنى
ئەسلىمىلەرنىڭ
بەزىلىرى بىر يەرگە يىغىلىشىپ
مەنىسىز سۆزلەر بىلەن چارەسىزلىكنى بايان قىلماقتا
ئاندىن بىر مازاردا، بىر ئورەكنىڭ بېشىدا
بىر ئىشىكنىڭ ئاغزىدا
ھەممە سۈكۈت قىلار
ئۆلۈم سۆز قىلار
ۋە داۋام قىلار ھايات
بەزىدە بىر چاقنىڭ ئاستىدا
تەرەپباللا كېلەر ئۆلۈم
ئۇشتۇمتۇتلا تۈگەر سىناق
توك كېتىپ قالغاندەكلا
ئارزۇ-ھەۋەسلەر يوق بولار
بەزى ئۆلۈملەر بار
ئۆلۈمدىن بۇرۇن كېلەر
مەسىلەن تۈرمىنىڭ بىر كامېرىدا
سۇئاللار ھەمىشە جاۋاپسىز قالار ئۇ يەردە
گەپ قىلغىنى پەقەت چۈشلەردۇر
ياكى جىمغۇر تاملاردا خىياللار
كۆزلەر قۇبۇل قىلار، بارماقلار قۇبۇل قىلار
لېكىن مېڭە ھەمىشە ئۈمىت تەرەپدارىدۇر
بەزىدە ئوقۇلىۋاتقان كىنو لېنتىسىنىڭ
بىر پارچىسىدىكى قېتىپ قالغان رەسىمگە ئوخشاشتۇر
ئۆلۈم
ئۇدۇلىدا بىر گۇرۇپپا ئەسكەر
كۆزلەر ستۋوللارنىڭ قاپقارا ئېغىزلىرىنى كۆرمەس
قاراپ قالار كۆپكۆك ئاسماندا
ساڭگىلاپ تۇرغان ئاپئاق بۇلۇتقا
ئۆلۈمدىن ئۇزاق ئۆلۈملەر باردۇر
گېزىت ئېلانلىرىدا ئۇچرايدىغان
دۇنياغا باغلىنىپ قېلىشنىڭ بىچارە
ۋە جاھىل بىر بەلگىسىدۇر
كۆپرەك قالغانلارغا ئائىت بولغان
يەنە ئۆمۈچۈك تورىنىڭ ئوتتۇرىسىغا چۈشۈپ قالغان
بىر پاشىنىڭ تىترىگەن پۇتلىرىدا كۆرگەنىدىم ئۆلۈمنى
ئۆلۈملەر باردۇر؛
بىر دەرەخنىڭ يىلتىزلىرىنىڭ پاراس-پۇرۇس ئۈزۈلىشىگە ئوخشاش
جان پاراس-پۇرۇس قىلىپ چىقار تومۇرلاردىن
ئۆلۈملەر باردۇر؛
جان قۇشتەك ئۇچۇپ كېتەر
بىر چايكىنىڭ لەرزان ئۇچۇپ
كۆپكۆك ئاسماندا غايىپ بولغىنىدەك
تۈركچىدىن ئەنۋەر ھامىت ( ئايپالتا) ئۇيغۇرچىلاشتۇردى.
ئوكيان تورىدىكى بارلىق ئەسەرلەرنىڭ نەشىر ھوقۇقى ئوكيان تورىغا مەنسۈپ. قالايمىقان كۆچۈرۈپ ئىشلىتىشكە، قانۇنسىز نەشىر قىلىشقا، ھەرقانداق مېدىيا ۋاستىلىرىدا ئېلان قىلىشقا بولمايدۇ. خىلاپلىق قىلغانلارنىڭ قانۇنى جاۋابكارلىقى سۈرۈشتە قىلىنىدۇ. قالايمىقان كۆچۈرۈپ تارقاتقان تور بىكەتلەر ئاشكارە ئېلان قىلىنىدۇ.