ما يۈن 23 – نويابىر شىنجاڭ تاراتقۇلىرىنىڭ زىيارىتىنى قوبۇل قىلغاندا مۇنداق دېدى: ھازىر ئەلى بابانىڭ ئابۇنىچىلىرى 600 مىليوندىن ئاشتى، كۆپچىلىك ئەلى بابا گۇرۇھى بىلەن شىنجاڭنىڭ چوڭقۇر ھەمكارلىشىشىنى ناھايىتى ئۈمىد قىلىدۇ.

ما يۈن كۆپچىلىككە ناتونۇش ئەمەس، بولۇپمۇ 11 – نويابىردىكى توردا مال سېتىۋېلىش پائالىيىتىدە، ئەلى بابا قارىمىقىدىكى ئېلېكتىرونلۇق سودا سۇپىسىنىڭ سېتىش كىرىمى 57 مىليارد 100 مىليون يۈەنگە يېتىپ، كىشىلەرنى ھەيران قالدۇردى. ما يۈن ئېنىق قىلىپ مۇنداق دېدى: بىز ئامېرىكىنىڭ گىلاسلىرىنى، ئالياسكىنىڭ چوڭ قىسقۇچپاقىسىنى ساتساق بولىدۇ، شىنجاڭنىڭ تېخىمۇ كۆپ ئالاھىدە مەھسۇلاتلىرىنى سېتىشقا ئىشەنچىمىز بار. بىز رايونلار ئارا ئېلېكتىرونلۇق سودىنى جېجياڭ ۋە گۇاڭدۇڭ ئۆلكىلىرىدە نۇقتىدا سىناق قىلىۋاتىمىز. نۇقتىدا سىناق قىلىش مۇۋەپپەقىيەتلىك بولغاندىن كېيىن، ئۇنىڭ دائىرىسىنى ئومۇميۈزلۈك كېڭەيتىمىز. شىنجاڭدىكى ئاز سانلىق مىللەت ئاياللارنىڭ قول ھۈنەر بۇيۇملىرى ناھايىتى ياخشى دەپ ئاڭلىدىم. مېنىڭچە، بۇلارنى مەملىكەت ئىچىدىلا ئەمەس، پۈتۈن دۇنيادىمۇ سېتىشقا بولىدۇ.

ما يۈننىڭ ئىشەنچىسى تولۇق ئەمەلىيەت ئاساسىغا ئىگە، شىنجاڭ بىلەن ئەلى بابا گۇرۇھى 2013 – يىلى ھەمكارلىشىپ ئۇيۇشتۇرغان ‹‹شىنجاڭدا جەم بولايلى›› ناملىق پائالىيەت توردا سېتىش رېكورتىنى ياراتتى. بۇ يىل 9 – ئايدا بۇ گۇرۇھ ئۇيۇشتۇرغان ‹‹100 مىليون يۈەنلىك ئۆمەك›› پائالىيىتى، بولۇپمۇ تۇنجى قېتىملىق ئېلېكتىرونلۇق سودا ئارقىلىق دېھقانچىلىق مەھسۇلاتلىرىنى سېتىش سوممىسى 100 مىليون يۈەندىن ئاشۇرۇلدى. ‹‹تاۋباۋ›› تورى شىنجاڭدا تىجارەت باشلىغان ئۈچ يىلدىن بۇيان، شىنجاڭدىكى 800گە يېقىن ئوتتۇرا، كىچىك كارخانا توردا مال سېتىشقا كىرىشكەن.

ما يۈن ۋە ئۇنىڭ ھەمراھلىرى بۇ قېتىم شىنجاڭغا تەكشۈرۈشكە كەلگەندە، ئاساسلىقى شىنجاڭنىڭ ئالاھىدە مەھسۇلاتلىرى ۋە مەدەنىيەت مەھسۇلاتلىرىنى كۆزدە تۇتۇپ، ئەلى بابانىڭ دۇنياۋى ئېلېكتىرونلۇق سودا سۇپىسى ئارقىلىق ئوتتۇرا، كىچىك كارخانىلار ۋە دېھقانلارغا مۇلازىمەت قىلىشنى مەقسەت قىلغان. ما يۈن مۇنداق دېدى: بىز ئالاقە تورىدىن پايدىلىنىپ، بىلىمنى تۆۋەندىكىلەرگە يەتكۈزۈش ئارقىلىق دېھقانلارنىڭ ئىشلەپچىقىرىش ۋە تۇرمۇشىنى تېخىمۇ زامانىۋىلاشتۇرۇشنى، يېزا مەھسۇلاتلىرىنى سىرتقا چىقىرىشنى ئۈمىد قىلىمىز.
ئەلى بابا گۇرۇھى بۇ يىل ئامېرىكا نيۇيۇرك بىرژىسىدا ئاكسىيەسىنى مۇۋەپپەقىيەتلىك بازارغا سېلىپ، تارىختىن بۇيانقى كۆلىمى ئەڭ زورIPO سودىسىنى پۈتكۈزۈپ، دۇنيا بويىچە 1 – چوڭ ئېلېكتىرونلۇق سودا كارخانىسى، 2 – چوڭ ئالاقە تورى كارخانىسى بولۇپ قالدى.

ما يۈن شىنجاڭنىڭ يىپەك يولى ئىقتىساد بەلبېغىنىڭ يادرولۇق رايونى قۇرۇشىنى مۇھىم پۇرسەت دەپ بىلىپ، شىنجاڭنى ‹‹ئۈچ ئەسىر›› يىرىك پىلانىغا كىرگۈزدى. ئۇ مۇنداق دېدى: مەن سانلىق مەلۇمات دەۋرىدىكى شىنجاڭ ئۈچۈن ئازراق ئىش قىلىپ، ئەلى بابانىڭ ئەۋزەللىكى ئارقىلىق شىنجاڭنى دۇنياغا تونۇتۇشقا كۈچەيمەن.