جاھىللىق مۇۋەپپەقىيەت قازانغۇچىلارنىڭ خاراكتېرى

ئابلىكىم ھەسەن ئۆگەن

كونوسۇكى ماتسۇشىتا ياپونىيەنىڭ داڭلىق دۆلەت ھالقىغان كارخانىسى پاناسونىكنىڭ قۇرغۇچىسى بولۇپ، ئۇنىڭ كىشىلەر ئارىسىدا ‹‹تىجارەت ئىلاھى›› دېگەن نامى بار. كونوسۇكى ماتسۇشىتا يېڭى ئىگىلىك تىكلىگەن ۋاقىتتا، ئېلېكتىر سايمانلىرى ساھەسىگە كۆز تىكىپ، بۇ ساھەنىڭ كەلگۈسىدە زور تەرەققىياتقا ئېرىشىدىغانلىقىغا چوڭقۇر ئىشەندى ھەم بىر خىل يېڭى مەھسۇلاتنى تەتقىق قىلىشنى قارار قىلدى، ئۇ بولسىمۇ ئەينى ۋاقىتتا بازاردا يېڭىدىن بارلىققا كەلگەن ئائىلە ئېلېكتىر سايمانلىرىنىڭ توك مەنبە روزېتكىسى ئىدى. ئەپسۇس ئۇنىڭ بۇ كەشپىياتى ئويلىغىنىدەك قارشى ئېلىشقا ئېرىشەلمەي، روزېتكىنىڭ بىرسىمۇ سېتىلمىدى.

كونوسۇكى ماتسۇشىتانىڭ ئەتراپىدىكى كىشىلەر بۇنداق مەبلەغ سېلىشنىڭ خەتىرى ئىنتايىن چوڭ، ئۇنىڭدىن كۆرە كۆڭۈل خاتىرجەم بىرەر ئادەتتىكى خىزمەت تېپىپ، مۇقىم تۇرمۇش كەچۈرگەن ياخشى، دەپ قارىدى. ئەمما كونوسۇكى ماتسۇشىتا ئۇنداق قىلمىدى، ئۇ ئۆيىدىكى پۇلغا يارىغۇدەك نەرسىنىڭ ھەممىسىنى ھەتتا خوتۇنىنىڭ كىيىملىرىنىمۇ گۆرۈگە قويۇپ، توپلىغان پۇللارنى يەنە مەھسۇلات تەتقىق قىلىشقا سەرپ قىلدى. پاناسونىك ئېلېكتىر سايمانلىرى دەل ئۇنىڭ مۇشۇنداق جاھىللىقى نەتىجىسىدە ئۆسۈپ يېتىلدى.

پاناسونىك ۋېلىسىپىت چىرىغى، تېلېۋىزور قاتارلىقلارنى ئىشلەشتىن سىرت يەنە رەقەملىك ئېلېكتىر مەھسۇلاتلىرىنى ئىشلەپچىقاردى. شىركەت ھەر بىر قېتىملىق سىناقتا تەكرار ‹‹تەرسالىق››تا چىڭ تۇردى. بۈگۈنكى كۈندە پاناسونىك ئېلېكتىر سايمانلىرى دۇنيادا 230دىن ئارتۇق شىركىتى، 250 مىڭدىن ئارتۇق خىزمەتچىسى بار، مەھسۇلاتلىرى يەرشارىغا تارقالغان دەرىجىدىن تاشقىرى كارخانىغا ئايلاندى.

ناۋادا كونوسۇكى ماتسۇشىتا ئوساكا ئېلېكتىر چىراغ شىركىتى ئىشلەپچىقارغان روزېتكا سېتىلمىدى، دەپ بەل قويۇۋەتكەن بولسا، بۈگۈنكى پاناسونىك ئېلېكتىر سايمانلىرىمۇ بولمىغان بولاتتى. ئەمەلىيەتتە كۆپىنچە مۇۋەپپەقىيەت قازانغان كارخانىلار كۆپ ھاللاردا كارخانىچىلارنىڭ جاھىللىقىغا تايىنىپ ئۇتۇپ چىققان. ئەگەر ئوڭۇشسىزلىق كارخانىنىڭ ئۆسۈپ يېتىلىشىدە چوقۇم باشتىن كەچۈرۈشكە تېگىشلىك ئازاب – ئوقۇبەت دېيىلسە، ئۇنداقتا جاھىللىق دەل كارخانىنىڭ بۇنداق جاپا – مۇشەققەتنى يېڭىشىدىكى ئەڭ ياخشى قورالى.
ئەقلىي يەكۈن: كارخانا قىيىنچىلىققا ئۇچرىغاندا، كونوسۇكى ماتسۇشىتاغا ئوخشاش جاھىل خىزمەتچىلەرنى يېتىشتۈرۈش ئۈچۈن، چوقۇم روشەن نىشان بېكىتىشى كېرەك، چۈنكى كارخانا ئۆزىنىڭ نېمىگە ئېھتىياجلىق ئىكەنلىكىنى بىلگەندىلا، ئاندىن نېمىدە چىڭ تۇرسا مۇۋەپپەقىيەت قازىنالايدىغانلىقىنى چۈشىنىپ يېتىدۇ؛ خىزمەتچىلەرنى بىر قىسىم ئۇتۇق قازانغان جاھىل كارخانىچىلارنىڭ تەرجىمىھال ئوقۇشلۇقلىرى بىلەن تەمىنلەپ، ئۇلارنىڭ ھەر ۋاقىت ئوقۇپ ئۆگىنىشىگە شارائىت يارىتىپ بېرىشى كېرەك.