يامغۇردىن كېيىنكى ئۈرۈمچى
ئۆز خەۋرىمىز: ئۈرۈمچىدە 2-ئىيۇن سائەت 10:00 ئەتراپىدا تۇيۇقسىز ھاۋا ئۆزگىرىپ قىسقا ۋاقىتلىق ھۆل-يېغىنلىق ھاۋارايى كۆرۈلۈپ، سىرتقا چىققان كىشىلەر دالدىلىنىشقا ئامالسىز قالدى. ئەمما بۇ قېتىملىق يامغۇردىن كېيىن ئۈرۈمچى ئاسمىنى سۈزۈلۈپ، تېمپېراتۇرا ئۆرلەشكە باشلىدى.
ئۈرۈمچى شەھەرلىك مېتېئورولوگىيە ئىستانسىسىنىڭ مۆلچەرلىشىچە، 2-ئىيۇن سائەت 14:00 دىن 20:00 گىچە، ئۈرۈمچى شەھەر رايونىدا ھاۋا بۇلۇتلۇق بولۇپ، ئۈچ بال شامال چىقىدىكەن، تېپمېراتۇرا ℃10 ~ ℃16 گىچە بولىدىكەن؛ مىچۇەن-كۆكتاغ رايونىدىمۇ ھاۋا بۇلۇتلۇق بولۇپ، ئۈچ بال شامال چىقىدىكەن، تېمپېراتۇرا ℃13 ~ ℃18 گىچە بولىدىكەن؛ داۋانچىڭ رايونىدا ھاۋا بۇلۇتلۇق بولۇپ، ئۈچ بال شامال چىقىدىكەن، تېمپېراتۇرا ℃12 ~ ℃18 گىچە بولىدىكەن؛ يۇقىرىقى تاغ تاغلىق رايونىدا ئازراق يامغۇر يېغىپ، ئۈچ بال شامال چىقىدىكەن، تېمپېراتۇرا ℃3 ~ ℃6 گىچە بولىدىكەن.
پۈتۈن شىنجاڭ مىقياسىدا، كەلگۈسى ئۈچ كۈندە شىنجاڭنىڭ ھەر قايسى جايلىرىدا ھاۋا ئوچۇق ياكى بۇلۇتلۇق بولىدىكەن، شامال كۈچى زور بولمايدىكەن.
ئاپتونوم رايونلۇق مېتېئورولوگىيە ئىستانسىسىنىڭ مۆلچەرلىشىچە، بۈگۈن كۈندۈزدىن كېچىگىچە، سانجى ئوبلاستىنىڭ شەرقىي قىسمى، تەڭرىتېغىنىڭ تاغلىق رايونى، ئاقسۇ، بايىنغۇلىن موڭغۇل ئوبلاستى، تۇرپان-پىچان-توقسۇن ئويمانلىقى، قومۇل قاتارلىق رايونلارنىڭ قىسمەن رايونلىرىدا ئۆتكۈنچى ياكى ئازراق يامغۇر ياغىدىكەن، تاغلىق رايونلارنىڭ قىسمەن رايونلىرىدا ئوتتۇرھال ياكى قاتتىق يامغۇر يېغىپ، شەرقىي شىنجاڭدىكى شامال ئېغىزلىرىدا سەككىز بال ئەتراپىدا غەربىي شىمال شامىلى چىقىدىكەن، جەنۇبىي شىنجاڭنىڭ غەربىي قىسمىدا 4~5 بال قىيپاش غەرب شامىلى، جەنۇبىي شىنجاڭ ئويمانلىقىنىڭ شەرقىي قىسمىدا 4~5 بال قىيپاش شەرق شامىلى چىقىدىكەن، جەنۇبىي شىنجاڭ ئويمانلىقىدىكى قىسمەن رايونلاردا چاڭ-توزانلىق ياكى قۇم بورانلىق ھاۋارايى كۆرۈلىدىكەن.