ئامېرىكا دۆلەت ئىشلىرى مەھكىمىسىنىڭ باياناتچىسى پۇساكى 29-يانۋار مۇنداق دېدى: ئامېرىكا ئۆتكەن بىر ھەپتە رۇسىيە قوللىغان بۆلگۈنچى ئۇنسۇرلارنىڭ رۇسىيە بىلەن ئۇكرائىنا چېگرىلىنىدىغان رايوندا زوراۋانلىق قۇراللىق ھەرىكەت ئېلىپ بارغانلىقىنى كۈچلۈك ئەيىبلەيدۇ، ئامېرىكا رۇسىيە قوللىغان ئۇكرائىنانىڭ شەرقىدىكى ئەلئارا قۇراللىق كۈچلەرنىڭ بۆلگۈنچىلىك قىلىش پائالىيىتىنى دەرھال توختىتىشىنى مۇراجىئەت قىلدى، بولمىسا، ئامېرىكا بىلەن خەلقئارا جەمئىيەتنىڭ رۇسىيەگە تېخىمۇ كۆپ بېسىم بېرىدىغانلىقىنى بىلدۈردى. پۇساكى يەنە ياۋروپا ئەللىرى ئىتتىپاقىنىڭ رۇسىيەنى جازالاشنى ئۇزارتقانلىقىنى قوللايدىغانلىقىنى بىلدۈردى. بۇنىڭدىن ئىلگىرىكى نەچچە قېتىملىق جازالاشتا ئامېرىكا ياۋروپا ئەللىرى ئىتتىپاقى بىلەن تەڭ قەدەمدە ماڭدى.

شۈ كۈنى، سابىق سوۋېت ئىتتىپاقىنىڭ رەھبىرى گورباچېف رۇسىيە تاراتقۇلىرىنىڭ زىيارىتىنى قوبۇل قىلغاندا مۇنداق دېدى: رۇسىيە بىلەن غەرب دۆلەتلىرىنىڭ ئۇكرائىنا مەسىلىسىدىكى جىددىي مۇناسىۋىتى يېڭى سوغۇق مۇناسىۋەتلەر ئۇرۇشىدىن باشقا نەرسە ئەمەس، بۇ بىر مەيدان ئۇرۇشقا ئايلىنىشى، يەنى ھەربىي توقۇنۇش كېلىپ چىقىشى مۇمكىن.

ئىقتىسادنىڭ يەر شارىلىشىش ۋەزىيىتىنىڭ جىددىيلىشىشى، خەلقئارا ۋەزىيەتتە چوڭقۇر مۇرەككەپ ئۆزگىرىش يۈز بېرىۋاتقان ئارقا كۆرۈنۈشتە، ئۇكرائىنا كىرزىسى كەلتۈرۈپ چىقارغان ئامېرىكا بىلەن رۇسىيە مۇناسىۋىتىنىڭ جىددىيلىكىگە قانداق تاقابىل تۇرۇش- يېڭى بىر يىلدىكى ئامېرىكا دىپلوماتىيەسى ۋە دۆلەت بىخەتەرلىك ئىستراتېگىيەسىنىڭ زور تېمىسى.

يېقىنقى مەزگىلىدە ئامېرىكىنىڭ يېڭى بىر نۆۋەتلىك پارلامېنت كېڭەش پالاتاسى ھەربىي ئىشلار كومىتېتى ئامېرىكا دۆلەت بىخەتەرلىكىنى باش تېما قىلغان ئىسپات ئاڭلاش يىغىنى ئۆتكۈزدى. ئىسپات ئاڭلاش يىغىنىغا قاتناشقان بىر قانچە مۇھىم شەخسلەرنىڭ ھەممىسى رۇسىيە بىلەن ئۇكرائىنا ۋەزىيىتىدىن ئەندىشە قىلدى. سابىق زۇڭتۇڭنىڭ دۆلەت بىخەتەرلىكى ئىشلىرى ياردەمچىسى بىرزىنىسكى مۇنداق دېدى: پۇتىن ئوت بىلەن ئوينىشىۋاتىدۇ، بۇنىڭدىكى مەقسەت- سىياسىي ۋە ئىقتىسادى جەھەتتە ئۇكرائىنانىڭ مۇقىملىقىغا بۇزغۇنچىلىق قىلىش، بۇ ئارقىلىق ياۋروپاغا بۇزغۇنچىلىق قىلىش. سابىق دۆلەت ئىشلىرى كاتىپى ئالبىرايىت ئامېرىكا بىلەن شىمالىي ئاتلانتىك ئەھدى تەشكىلاتنىڭ بىرلىكتە ئۇكرائىناغا قۇراللىق ياردەم بېرىشنى قوللىدى، سابىق دۆلەت ئىشلىرى كاتىپى شۇرىسمۇ: رۇسىيەنىڭ ئەتراپىدىكى ياۋروپا دۆلەتلىرى رۇسىيەنىڭ تەبىئىي گازىغا تايىنىشتىن قۇتۇلىشى كېرەك، دېدى.

يېقىندا ئامېرىكىنىڭ ياۋروپا ئىشلىرىغا مەسئۇل ياردەمچى دۆلەت ئىشلىرى كاتىپى نىيىۋلەندمۇ مۇنداق دېدى: شىمالى ئاتلانتىك ئەھدى تەشكىلاتى ئىتتىپاقداش دۆلەتلەر بىلەن بىرلىكتە دەرھال شىمالى ئاتلانتىك ئەھدى تەشكىلاتىنىڭ شەرقىدىكى ئالتە ئالدىنقى سەپتىكى دۆلەتلەردە قوماندانلىق شىتابى ۋە قوماندانلىق مەركىزى تەسس قىلىشى كېرەك.

ئەمما سابىق دۆلەت ئىشلىرى كاتىپى كېسىنگىر مۇنداق دېدى: ئۇكرائىنا مەسىلىسىدە ئامېرىكا ئۆزىنىڭ نىشانىنىڭ نېمە ئىكەنلىكىنى ئېنىق ئويلىشىشى، ئاندىن يەنە مۇۋاپىق ۋاسىتىنى تاللاپ تاقابىل تۇرۇشى كېرەك، ھەربىي ۋاستە ئويلىنىش دائىرىسىدە بولۇشى كېرەك، ئەمما نوقۇل ھەربىي ۋاستە بىلەنلا بۇ مەسىلىنى ھەل قىلىش قېيىن.

بىرزىنىسكىمۇ مۇنداق دېدى: ياۋروپا توقۇنۇشىنىڭ رۇسىيەنىڭ دۇنيا بىلەن قارىشلىشىشىغا ئۆزگىرىشىدىن ساقلىنىش كېرەك، بۇ نۇقتا ناھايىتى مۇھىم، چۈنكى ئوتتۇرا شەرقتە ئەسەبىي ئۇنسۇرلارنىڭ زوراۋانلىق ھەرىكىتىنى توسۇش-ئامېرىكا بىلەن رۇسىيەنىڭ ئورتاق مەنپەئەتىگە ئۇيغۇن كېلىدۇ.

ئۆتكەن بىر يىلدا يېڭى سوغۇق مۇناسىۋەتلەر ئۇرۇشى- ناھايىتى كۆپ تاراتقۇلاردا ئامېرىكا بىلەن رۇسىيە مۇناسىۋىتى دەپ تەسۋىرلەندى، ئەمما ئامېرىكا ۋىليام مارى ئىنستىتۇتى بىلەن «دىپلوماتىيە سىياسىتى» ژۇرنىلىنىڭ 28-يانۋار ئېلان قىلغان تەكشۈرۈش نەتىجىسىدىن ئايان بولۇشىچە، تەكشۈرۈلگەن يەر شارىدىكى 4187 خەلقئارا مۇناسىۋەت ئالىمى ئىچىدىن %38 ئالىم: ئامېرىكا بىلەن رۇسىيە كەلگۈسى 10 يىلدا سوغۇق مۇناسىۋەتلەر ئۇرۇشى دەۋرىگە كىرىدۇ ياكى توقۇنۇش بولىدۇ، دەپ قارىغان. بۇ نىسبەت ئۆتكەن يىلى 3-ئايدا گاللوپ ئېلان قىلغان %50تىن بەلگىلىك تۆۋەنلىگەن.

بىرزىنىسكى ئېيتقاندەك، ئامېرىكا خەلقئارا مەسىلىلەردە رۇسىيەنى پۈتۈنلەي يېتىم قالدۇرۇشقا ئامالسىز. ۋاشىنگتون ئاقىللار ئامبىرى ۋە خەلقئارا تەتقىقات مەركىزىنىڭ تەتقىقاتچىسى بىسساما مۇنداق دېدى: ئامېرىكا بىلەن رۇسىيە مۇناسىۋىتى ئامېرىكىنىڭ ياۋروپا ئەللىرى ئىتتىپاقى، شىمالىي ئاتلانتىك ئەھدى تەشكىلاتى قاتارلىق ھەر قايسى تەرەپلەرنىڭ مۇناسىۋىتىنى سىناۋاتىدۇ. ھازىرقى باسقۇچتا ئەپچىل ئەمەلىي كۈچ ئامېرىكىنىڭ ئۆزگىچە رەھبەرلىك ئىقتىدارىنى نامايان قىلالايدۇ، ئەمما ئامېرىكىنىڭ سىياسىتى يېقىنقى يىللاردىن بۇيان يەنە خامچوتنى قىسقارتىش قاتارلىق ئەمەلىي ئامىللارنىڭ چەكلىشىگە ئۇچراپ، كۆڭۈلدىكىدەك ھالەتكە يېتەلمەيۋاتىدۇ.