ئاپتونوم رايونلۇق پارتكومنىڭ مۇئاۋىن شۇجىسى، ئاپتونوم رايوننىڭ رەئىسى شۆھرەت زاكىر 3 - يانۋار ج ك پ مەركىزىي كومىتېتى سىياسىي بىيۇروسىنىڭ ئەزاسى، ئاپتونوم رايونلۇق پارتكومنىڭ شۇجىسى جاڭ چۈنشيەننىڭ ھاۋالىسى بىلەن، ئۈرۈمچى ناھىيەسىدىكى ئاپتونوم رايونلۇق مۇز ئۈستى تەنھەرىكەت مەركىزىگە بېرىپ، مۇسابىقىگە قاتنىشىش ئالدىدا تۇرغان شىنجاڭ كوماندىسىدىكى تەنھەرىكەتچىلەر، تىرېنېرلار ۋە خىزمەتچىلەردىن ھال سوراپ، كۆپچىلىكنى بۇرچ تۇيغۇسى، مەسئۇلىيەت تۇيغۇسى ۋە تەخىرسىزلىك تۇيغۇسىنى يەنىمۇ كۈچەيتىپ، مەملىكەتلىك 13 - نۆۋەتلىك قىشلىق تەنھەرىكەت مۇسابىقىسىگە پۇختا تەييارلىق كۆرۈپ، مۇسابىقىدە ياخشى نەتىجە ۋە يۇقىرى سەۋىيە يارىتىپ، شىنجاڭلىقلارنىڭ شىنجاڭ روھىنى نامايان قىلىشقا رىغبەتلەندۈردى. 　　شۆھرەت زاكىر مەملىكەتلىك 13 - نۆۋەتلىك قىشلىق تەنھەرىكەت مۇسابىقىسىگە مۇناسىۋەتلىك ئەھۋاللار توغرىسىدىكى دوكلاتنى ئاڭلاپ، مۇز ئۈستى تەنھەرىكەت مەركىزىدە مەشىق قىلىۋاتقان شىنجاڭ كوماندىسىنىڭ تەنھەرىكەتچىلىرىدىن ھال سورىغاندىن كېيىن، ئاپتونوم رايونلۇق پارتكوم ۋە خەلق ھۆكۈمىتىگە ۋاكالىتەن كۆپچىلىك ۋە مەملىكەتلىك 13 - نۆۋەتلىك قىشلىق تەنھەرىكەت مۇسابىقىسىگە تەييارلىق قىلىۋاتقان شىنجاڭلىق تەنھەرىكەتچىلەر، تىرېنېرلار ۋە بارلىق خىزمەتچىلەردىن ھال سورايدىغانلىقىنى ئېيتتى. شۆھرەت زاكىر مۇنداق دېدى: يەنە ئون نەچچە كۈندىن كېيىن مەملىكەتلىك 13 - نۆۋەتلىك قىشلىق تەنھەرىكەت مۇسابىقىسى باشلىنىدۇ. مەملىكەتلىك 13 - نۆۋەتلىك قىشلىق تەنھەرىكەت مۇسابىقىسى ئاپتونوم رايونىمىز قۇرۇلغان 60 يىلدىن بۇيان ئۆتكۈزۈشنى تۇنجى قېتىم ئۈستىگە ئالغان مەملىكەتلىك چوڭ تىپتىكى ئۇنىۋېرسال تەنھەرىكەت مۇسابىقىسى بولغاچقا، ئاپتونوم رايونلۇق پارتكوم ۋە خەلق ھۆكۈمىتى مەملىكەتلىك 13 - نۆۋەتلىك قىشلىق تەنھەرىكەت مۇسابىقىسىنى ئۆتكۈزۈش خىزمىتىگە يۈكسەك ئەھمىيەت بەردى ھەم پۈتۈن كۈچى بىلەن قوللىدى. مەملىكەتلىك 13 - نۆۋەتلىك قىشلىق تەنھەرىكەت مۇسابىقىسىنىڭ تەشكىلىي ھەيئىتى قۇرۇلغان بىر يىلغا يېقىن ۋاقىتتىن بۇيان دۆلەت تەنتەربىيە باش ئىدارىسىنىڭ توغرا يېتەكلىشى ۋە زور كۈچ بىلەن قوللىشى نەتىجىسىدە، مۇسابىقىنىڭ تۈرلۈك تەييارلىق خىزمەتلىرى تەرتىپلىك ۋە يۇقىرى ئۈنۈملۈك ئىشلىنىپ، ئالدىن مۆلچەرلەنگەن نىشانغا يەتتۇق.

　　شۆھرەت زاكىر مۇنۇلارنى تەكىتلدى: مەملىكەتلىك 13 - نۆۋەتلىك قىشلىق تەنھەرىكەت مۇسابىقىسى باشلىنىشقا ئاز قالدى، مۇسابىقىنىڭ تەييارلىق خىزمەتلىرى ئاخىرقى باسقۇچقا قەدەم قويدى. شۇڭا، تەنھەرىكەتچىلەرگە پائال ئالغا ئىنتىلىپ، قەيسىرانە ئېلىشىدىغان روھىي قىياپىتى ۋە ياخشى تەنتەربىيە ئەخلاق - پەزىلىتىنى تولۇق جارى قىلدۇرۇپ، ھەر قايسى ئۆلكىلەرنىڭ تەنھەرىكەتچىلىرى بىلەن تەجرىبە ئالماشتۇرۇشنى كۈچەيتىپ، دوستلۇق يەتكۈزۈپ، ئېلىمىزنىڭ تەنتەربىيە ئىشلىرى ئۈچۈن ئورتاق تۆھپە قوشۇش توغرىسىدا تەربىيە بېرىش ۋە ئۇلارنى يېتەكلەش كېرەك. تەنھەرىكەتچىلەر ئىلمىي مەشىق قىلىشقا دىققەت قىلىپ، سالامەتلىكىنى ياخشى ئاسراپ، ئەڭ ياخشى ھالەت بىلەن مۇسابىقىگە قاتنىشىشى كېرەك؛ مۇسابىقە مەزگىلىدە، كۆتۈرەڭگۈ روھىي ھالەتتە ياخشى نەتىجىلەرنى قولغا كەلتۈرۈپ، شىنجاڭلىقلارنىڭ ئىجابىي ئوبرازى ۋە ياخشى روھىي ھالىتىنى تولۇق نامايان قىلىپ، بېيجىڭ قىشلىق ئو ت م نى مۇۋەپپەقىيەتلىك ئۆتكۈزۈش ئۈچۈن كۈچ چىقىرىپ ۋە مەدەت بېرىپ، گۈزەل شىنجاڭ بەرپا قىلىش، ۋەتەن ئارزۇسىنى بىرلىكتە ئەمەلگە ئاشۇرۇش ئۈچۈن تېخىمۇ كۆپ ئاكتىپ كۈچ توپلىشى كېرەك؛ پەن تەتقىقات، داۋالاش، سالامەتلىكنى ئەسلىگە كەلتۈرۈش قاتارلىق ئارقا سەپ كاپالىتى خىزمىتىنى كۈچەيتىپ، تەنھەرىكەتچىلەرنىڭ تەييارلىق كۆرۈش ۋە مۇسابىقىگە قاتنىشىشى ئۈچۈن، ياخشى شارائىت ھازىرلاپ بېرىش كېرەك .

　　ئاپتونوم رايون رەھبەرلىرىدىن لى شۆجۈن بىلەن تيەن ۋېن يوقلاش ۋە ھال سوراشقا قاتناشتى.