شىنخۇا تورىنىڭ 22-مارتتىكى خەۋىرى، باغداش تورىدىن ئىرپان تەرجىمىسى:

ئامېرىكا ھۆكۈمىتى يېقىندا شىمالىي مۇز ئوكياندىكى بىفورت دېڭىزى (Beaufort)گە ئائىت لايىھەنى چىقارغاندىن كېيىن، ئامېرىكا بىلەن بىفورت دېڭىزىنىڭ ئىگىلىك ھوقۇقى ھەققىدە ماجىرالىشىۋاتقان كانادانىڭ ھەرقايسى ساھەلىرىدىكى ئىنكاس كۈچلۈك بولدى، ئامېرىكىنىڭ بۇ قىلمىشى ئىگىلىك ھوقۇق ماجىراسىنى ھەل قىلىشقا پايدىسى يوق دەپ قارىدى.

كانادا جامائەت پىكىرىنىڭ قارىشىچە، ئامېرىكا دېڭىز-ئوكيان ئېنېرگىيە باشقۇرۇش ئىدارىسى 3-ئاينىڭ 14-كۈنى چىقارغان «2017-يىلدىن 2022-يىلغىچە بىفورت دېڭىزى ۋە چۇكچى دېڭىزى ئىجارە ھوقۇقىنى ئېچىۋېتىش» لايىھەسىنىڭ مەقسىتى ئالاقىدار دېڭىز رايونىنىڭ نېفىت ۋە تەبىئىي گازىنى قېدىرىپ تەكشۈرۈش بولۇپ، بۇ كانادانىڭ شىمالىي دېڭىز ئوكياندىكى ئىگىلىك ھوقۇقىغا تاجاۋۇز قىلغانلىق بولۇپ، ئىغۋاگەرچىلىك تۈسىگە ئىگە ئىكەن.

بىفورت دېڭىزى ئامېرىكا ئالياسكا ئىشتاتى ۋە كانادا يۇكون رايونىدىن شىمالدا بانكس ئارىلىغىچە بولۇپ، شىمالىي قۇتۇپ تاقىم ئاراللىرىنىڭ غەربى، چۇكچى دېڭىزىنىڭ شەرقىدە، كۆلىمى 476 مىڭ كىۋادرات كىلومېتىر، ئوتتۇرىچە چوڭقۇرلىقى 1000 مېتىر بولۇپ، نېفىت ۋە تەبىئىي گاز بايلىقى ئىنتايىن مول.