كوبى تېلېۋىزىيە ئىستانسىسى قاتارلىق ياۋروپادىكى داڭلىق ئاخبارات ۋاسىتىلىرىنىڭ خەۋەر قىلىشىچە، گېرمانىيە ئا دەرىجىلىك بىرلەشمىسىنىڭ زەردارى بايرىن مىيۇنخېن كوماندىسىنىڭ باش تىرېنېرى گۇاردىئولا مۇشۇ پەسىللىك مۇسابىقە ئاخىرلاشقاندىن كېيىن، ئىنگلاند دەرىجىدىن تاشقىرى بىرلەشمىسىدىكى مانچېستېر شەھىرى كۇلۇبى بىلەن توختام تۈزۈشكە قوشۇلغان بولۇپ، «كۈندىلىك پوچتا گېزىتى» بۇ خەۋەرگە قارىتا ئىز قوغلاپ خەۋەر بېرىپ، مانچېستېر شەھىرى كۇلۇبىنىڭ گۇئاردىئولانىڭ يىللىق ئىش ھەققى ئۈچۈن 13 مىليون 200 مىڭ فوندېستېرلىڭ چىقىرىدىغانلىقىنى، گۇئاردىئولانىڭ كەلگۈسىدە پۇتبول تىرېنېرلىرى ساھەسىدىكى ئەڭ يۇقىرى مائاشلىق تىرېنېرغا ئايلىنىدىغانلىقىنى ئاشكارىلىدى.

      ھازىر كۆك قوشۇن چىلسىنىڭ باش تىرېنېرى مورىنىيو 13 مىليون 200 مىڭ فوندېستېرلىڭ يىللىق ئىش ھەققى بىلەن 1-ئورۇندا تۇرۇۋاتقان بولۇپ، ئەگەر گۇئاردىيولا كېلەر يىلى يازدا مانچېستېر شەھىرىگە قوشۇلۇپ قالسا، ئۇ ھالدا، مورىنىيو بىلەن تەڭلىشىپ، دۇنيادىكى ئەڭ يۇقىرى مائاشلىق تىرېنېرغا ئايلىنىدۇ.

      گۇئاردىيولانىڭ بايرىن مىيۇنخېن كۇلۇبىدا ھازىر ئىلىۋاتقان يىللىق مائاشى 11 مىليون 200 مىڭ فوندېستېرلىڭ بولۇپ، 2013-يىلى بايرىن مىيۇنخېنغا كەلگەندىن بۇيان، غەلىبە قىلىش نىسبىتى 75. 94 پىرسەنتكە يەتكەن. ھازىرغا قەدەر گۇئاردىيولا بايرىن مىيۇنخېن كوماندىسىنى يېتەكلەپ، ئىككى قېتىم گېرمانىيە ئا دەرىجىلىك بىرلەشمىسىنىڭ چېمپىيونلۇقىغا، بىر قېتىم گېرمانىيە لوڭقىسى چېمپىيونلۇقىغا، بىر قېتىم ياۋروپا دەرىجىدىن تاشقىرلار لوڭقىسىغا، بىر قېتىم دۇنيا كۇلۇبلار لوڭقىسى چېمپىيونلۇقىغا ئېرىشكەن.

دۇنيادىكى مائاشى ئەڭ يۇقىرى تىرېنېرلار رەت-تەرتىپى

     چىلسى باش تىرېنېرى مورىنىيو يىللىق ئىش ھەققى 13 مىليون 200 مىڭ فوندېستېرلىڭ

ئەنچىلوتتى (مادرىد كوماندىسىغا باش تىرېنېر بولغان ۋاقتىدا) يىللىق ئىش ھەققى 11 مىليون 400 مىڭ فوندېستېرلىڭ

بايرىن مىيۇنخېن باش تىرېنېرى گۇئاردىيولا يىللىق ئىش ھەققى 11 مىليون 200 مىڭ فوندېستېرلىڭ

ئارسىنال باش تىرېنېرى ۋىنگىر يىللىق ئىش ھەققى 8 مىليون 300 مىڭ فوندېستېرلىڭ

مانچېستېر بىرلەشمىسى باش تىرېنېرى ۋەنگال يىللىق ئىش ھەققى 7 مىليون 300 مىڭ فوندېستېرلىڭ.