جۇڭگو ئۇيغۇرچە رادىيو تورى 23-ماي بېيجىڭ خەۋىرى:
نۆۋەتتە جەڭگاھلاردا ئۇچۇۋاتقان ھەم رازۋېدكا قىلالايدىغان ھەم ئۇرۇش قىلالايدىغان ئۇچقۇچىسىز ئايروپىلاندىن تارتىپ، كىشىلەرنىڭ تۇرمۇشىغا كىرگەن ئىستىمال دەرىجىلىك ئاسماندىن سۆرەتكە ئالىدىغان ئۇچقۇچىسىز ئايروپىلانغىچە، جۇڭگودا ياسالغان ئۇچقۇچىسىز ئايروپىلانلارنى ھەممىلا يەردە كۆرگىلى بولىدىغان بولدى. ئۈزلۈكسىز بۆسۈش ۋە يېڭىلىق يارىتىش ئارقىلىق جۇڭگونىڭ ئۇچقۇچىسىز ئايروپىلانلىرى جۇڭگو ياسىمىچىلىقىنىڭ يېڭى ئوبراز ۋەكىلىگە ئايلاندى.
بۇ يىل 4-ئايدا ئېلىمىزنىڭ ئەڭ چوڭ قۇياش ئېنېرگىيەلىك ئۇچقۇچىسىز ئايروپىلانى «ھەسەن-ھۈسەن t4» غەربىي شىمالدىكى قۇملۇقنىڭ ئىچكىرىسىدە تۇنجى ئۇچۇش ۋەزىپىسىنى ئورۇنلىدى. بۇ ئېلىمىزنىڭ دۇنيادا ئامېرىكىدىن قالسا، ئىككىنچى بولۇپ، ئالاھىدە ئۇزۇن ۋاقىت ئۇچالايدىغان قۇياش ئېنېرگىيەلىك ئۇچقۇچىسىز ئايروپىلان تەتقىق قىلىپ ياساپ چىققان دۆلەتكە ئايلانغانلىقىدىن دېرەك بېرىدۇ. شۇنىڭ بىلەن بىر ۋاقىتتا، ئېلىمىزنىڭ ئىستىمال دەرىجىلىك ئۇچقۇچىسىز ئايروپىلانلىرىمۇ پۈتۈن دۇنيانىڭ تۆۋەن ھاۋا بوشلۇقىدا ئۇچۇشقا باشلىدى.
ئىگىلىك تىكلىگىنىگە ئەمدىلا 9 يىل بولغان خۇسۇسىي ئىگىلىكتىكى كارخانا «داجاڭ چۇاڭشىن» شىركىتى پەقەت بۇلتۇر بىر يىلدىلا 400 مىڭدىن ئارتۇق ئۇچقۇچىسىز ئايروپىلان سېتىپ، دۇنيا ئىستىمال دەرىجىلىك ئۇچقۇچىسىز ئايروپىلان بازىرىنىڭ %70 نى ئىگىلىدى.
خېرىدارلارنىڭ ھېس قىلغانلىرى ئارقىلىق يېڭى بىر ئەۋلاد مەھسۇلاتنىڭ ئىقتىدارىنى بېكىتىش، بۇنىڭغا كىشىنى جەلپ قىلىدىغان يېڭى سانائەت لايىھەسى قوشۇلۇپ، بۇ شىركەت ئىشلەپچىقارغان ئۇچقۇچىسىز ئايروپىلان مەھسۇلاتلىرى ئىلگىرى جۇڭگونىڭ ئەرزان باھالىق، تۆۋەن قوشۇلما قىممەتلىك ئەنئەنىسى ئوبرازىنى ئۆزگەرتتى. بۇنىڭ بىلەن ئۇلار جەمئىيەتتە ئۇچقۇچىسىز ئايروپىلان كەسپىدىكى«ئالما شىركىتى» دەپ ئاتالدى.