ئاپتونوم رايونىمىزدا ساياھەتچىلىك ئىچكىرى ئۆلكىلەر ۋە چەت ئەللەرگە قارىغاندا نىسبەتەن كېيىنرەك باشلانغان بولۇپ، ساياھەتچىلەرنىڭ ساياھەت جەريانىدا ئۆز ھوقۇقىنى قوغداشقا ئائىت بىلىملىرى كەمچىل. شۇ سەۋەبلىك ساياھەت جەريانىدا ساياھەتچىلەر بىلەن ساياھەت كوپىراتىپلىرى ۋە سەيلىگاھلار ئوتتۇرىسىدا تۈرلۈك ماجىرالار كۆرۈلۈۋاتىدۇ. بىر قىسىم يېڭىدىن قۇرۇلغان ساياھەت رايونلىرىدا ساياھەت مۇلازىمىتى كاپالەت سىستېمىسى مۇكەممەل بولمىغانلىقتىن تۈرلۈك ھادىسە كۆرۈلۈۋاتىدۇ. يۇقىرىقى مەسىلىلەرگە قارىتا ئاپتونوم رايونلۇق ساياھەت ئىدارىسى قانۇن ئىجرا قىلىش باش ئەترىتىنىڭ باشلىقى تۇرسۇنئاي ياسىن چۈشەنچە بېرىپ مۇنداق دېدى:

بىرىنچىدىن، ساياھەتچىلەرنىڭ ئۆزلىرى تاللىغان ساياھەت كوپىراتىپىنىڭ قانۇنلۇق ياكى ئەمەسلىكىنى بىلىش ھوقۇقى بار. ساياھەت كوپىراتىپلىرى بىلەن توختام تۈزۈشتىن بۇرۇن چوقۇم ساياھەت كوپىراتىپى ئورۇنلاشتۇرغان ساياھەت لىنىيەسى، سەيلىگاھلار، ساياھەتنىڭ مەزمۇنى، ئۆزى تۆلەيدىغان ھەقلەر ( سەيلىگاھقا كىرىش بېلىتى، كىرا ھەققى، ياتاق – تاماق ھەققى، سۇغۇرتا ھەققى)، ساياھەت جەريانىدا كۆرۈلگەن تۈرلۈك مەسىلىلەرنى بىر تەرەپ قىلىش قاتارلىق مەزمۇنلارنى ئېنىق بىلىشى كېرەك.

ئىككىنچىدىن، ساياھەتچىلەرنىڭ ساياھەت داۋامىدا ساياھەت يېتەكچىسى ياكى ئۈچىنچى بىر تەرەپنىڭ باشلىشى ۋە زورلىشى بىلەن بەلگىلەنگەن سەيلىگاھ، مېھمانساراي، دۇكان – ساراي، ئاشخانا، كۆڭۈل ئېچىش ئورۇنلىرى قاتارلىقلاردا ساياھەت توختامىنىڭ ئىچىدە بولمىغان ھەر قانداق شەكلى ئۆزگەرگەن ئېلىم – سېتىم ئىشلىرىنى رەت قىلىش ھوقۇقى بار.

ئۈچىنچىدىن، ساياھەتچىلەرنىڭ ساياھەتتىن بۇرۇن ياكى ساياھەت جەريانىدا شەخسىي ئىشى تۈپەيلىدىن ساياھەتنى داۋاملاشتۇرالمىسا ۋە ياكى ساياھەتتىن يالتىيىش ئەھۋالى كۆرۈلسە، ساياھەت توختامىنى ئۈچىنچى بىر تەرەپكە ئۆتۈنۈپ بېرىش ھوقۇقى بار. بۇنىڭدىن كېلىپ چىققان تۆلەشكە تېگىشلىك چىقىمنى ساياھەتچى ۋە توختامنى قوبۇل قىلغان ئۈچىنچى تەرەپ ئۈستىگە ئالىدۇ.

تۆتىنچىدىن، ساياھەت توختامى ئىمزالانغاندىن كېيىن ساياھەتچىلەرنىڭ سانى توشمىغانلىقى ۋە ياكى باشقا سەۋەبلەر تۈپەيلىدىن ساياھەت ئۆمىكى ۋاقتىدا يولغا چىقالمىسا، شۇنداقلا ساياھەتچىلەرنى باشقا ساياھەت ئۆمەكلىرىگە قوشۇپ قويسا، ساياھەتچىلەرنىڭ توختامنى بىكار قىلىپ، تاپشۇرغان ھەقنى قايتۇرۇۋېلىش ھوقۇقى بار.

بەشىنچىدىن، ساياھەتچىلەر ساياھەت داۋامىدا ساياھەت كوپىراتىپلىرى تەمىنلىگەن مۇلازىمەتتىن بەھرىمەن بولىدۇ. بۇ جەرياندا كېلىپ چىققان جىسمانىي ۋە مال – مۈلۈك زىيىنى ئۈچۈن ساياھەت كوپىراتىپلىرىدىن تۆلەم تەلەپ قىلىش ھوقۇقى بار. سەيلىگاھ، مېھمانساراي، دۇكان – ساراي، ئاشخانا، كۆڭۈل ئېچىش ئورۇنلىرى قاتارلىق ساياھەت مۇلازىمەت ھالقىلىرىدىن چىققان مەسىلە، زىيانغا شۇ تىجارەتنى قىلغۇچى ئۈچىنچى تەرەپ قوشۇمچە جاۋابكار بولىدۇ.

ئالتىنچىدىن، ساياھەت جەريانىدا ساياھەتچىلەرنىڭ ئىززەت – ئابرۇيى، ئۆرپ – ئادىتى ۋە دىنىي ئېتىقاد ھوقۇقىغا ھۆرمەت قىلىنىدۇ. ساياھەتچىلەرنىڭ ساياھەت جەريانىدا ساياھەتنى تەشكىللىگۈچى تەرەپتىن ئۆزىنىڭ شەخسىي ئۇچۇرى ۋە مەخپىيەتلىكىنى ساقلاشنى تەلەپ قىلىش ھوقۇقى بار.

يەتتىنچىدىن، ساياھەتچىلەرنىڭ ساياھەتنى تەشكىللىگۈچى تەرەپتىن ئۆزلىرىنى بىخەتەر، ساغلام بولغان ساياھەت مۇلازىمىتى بىلەن تەمىنلەشنى تەلەپ قىلىش ھوقۇقى، شۇنداقلا ساياھەتچىلەرنىڭ ساياھەت داۋامىدا ساياھەتنى تەشكىللىگۈچى تەرەپتىن ئۇشتۇمتۇت يۈز بەرگەن ۋەقەلەرنى ۋاقتىدا، توغرا بىر تەرەپ قىلىشنى تەلەپ قىلىش، سالامەتلىك ئەھۋالىغا ماس كەلمەيدىغان ساياھەت پائالىيەتلىرىنى رەت قىلىش ھوقۇقى بار.

سەككىزىنچىدىن، ساياھەتچىلەرنىڭ ساياھەت قىلىش داۋامىدا جىسمانىي ۋە مال – مۈلۈك بىخەتەرلىكى خەۋپكە ئۇچرىسا، ساياھەتنى تەشكىللىگۈچى تەرەپ ۋە شۇ جايدىكى يەرلىك ھۆكۈمەت ئورۇنلىرىدىن ياردەم تەلەپ قىلىش ھوقۇقى بار. چېگرا سىرتىدىكى ساياھەت داۋامىدا مەسىلىگە يولۇقسا، دۆلىتىمىزنىڭ شۇ جايدا تۇرۇشلۇق ئىش بېجىرىش ئورۇنلىرىدىن ياردەم تەلەپ قىلىش ھوقۇقى بار.

توققۇزىنچىدىن، ساياھەتچىلەرنىڭ ساياھەت داۋامىدا ساياھەت توختامى بىكار قىلىنغان ئەھۋالدا، ساياھەتنى تەشكىللىگۈچى تەرەپتىن قايتىپ كېتىشنى تەلەپ قىلىش ھوقۇقى بار.

ئونىنچىدىن، ساياھەتچىلەرنىڭ ساياھەتنى تەشكىللىگۈچى ئورۇننىڭ قانۇن – تۈزۈمگە خىلاپ قىلمىشلىرىنى بايقىغاندا، ئۇلارنى ساياھەت باشقۇرۇش، سودا – سانائەت مەمۇرىي باشقۇرۇش، مال باھا، قاتناش، سۈپەت – تېخنىكا، سەھىيە قاتارلىق مۇناسىۋەتلىك ئورۇنلارغا ئەرز قىلىش ھوقۇقى بار.