شىنخۇا ئاگېنتلىقىنىڭ 17- مارت رىيادتىن يوللىغان تېلېگراممىسى، نۇر تورى تەرجىمىسى:

سەئۇدى ئەرەبىستان رەھبەرلىكىدىكى كۆپ دۆلەتلىك بىرلەشمە ئارمىيەسىنىڭ باياناتچىسى ئەھمەد 17- مارت: «بىرلەشمە ئارمىيەنىڭ يەمەندىكى ھۈسەيىن قوراللىقلىرىغا قارىتىلغان ھەربىي ھەرىكىتى ئاخىرلىشاي دەپ قالدى، كېيىنكى ۋەزىپە يەمەننىڭ بىخەتەرلىكىنى ئەسلىگە كەلتۈرۈش ۋە دۆلەتنى قايتا قۇرۇپ چىقىش» دېگەن.

ئەھمەد تاراتقۇلارغا: «يەمەندىكى قەبىلىلەرنىڭ سالا قىلىشى ئارقىسىدا، بىرلەشمە ئارمىيە بىلەن ھۈسەيىن قوراللىقلىرى يەمەن-سەئۇدى ئەرەبىستان چېگراسىدا ئاساسىي جەھەتتىن ئۇرۇش توختىتىشنى ئىشقا ئاشۇردى. بىرلەشمە ئارمىيەنىڭ بۇنىڭدىن كېيىنكى ۋەزىپىسى يەمەننىڭ بىخەتەرلىكىنى ئەسلىگە كەلتۈرۈشكە ۋە قايتا قۇرۇشقا ياردەم قىلىش» دېگەن.

ھۈسەيىن (Ḥūthiyyūn) قوراللىقلىرىنىڭ بىرلەشمە ئارمىيەنى يەمەندىكى پۇقرالارغا ھۇجۇم قىلدى، دەپ ئەيىبلىشىگە قارىتا، ئەھمەد: «ھۈسەيىن قوراللىقلىرى ئادەملەر توپلاشقان جايغا ۋە پۇقرالارنىڭ ئارىسىغا كۆز بوياپ كىرىۋالىدۇ. ئۇلار پۇقرالارنى قالقان قىلىپ، بىرلەشمە ئارمىيەنىڭ ھۇجۇمىدىن ئۆزىنى چەتكە ئالماقچى» دېگەن.

ئۇ:«بىرلەشمە ئارمىيە 15- مارت يەمەننىڭ غەربىي شىمالىدىكى خۇججا ئۆلكىسىگە جايلاشقان ھۈسەيىن قوراللىقلىرىنىڭ ھەربىي ئىشلار نىشانىنى بومباردىمان قىلدى، ئۆلۈپ-يارىلانغانلارنىڭ كۆپ سانلىقى ھۈسەيىن قوراللىقلىرى» دېگەن. ئەمما ھۈسەيىن قوراللىقلىرى كونترول قىلىۋاتقان يەمەن دۆلەتلىك خەۋەرلىشىش ئاگېنتلىقىنىڭ دېيىشىچە، بىرلەشمە ئارمىيە بىر بازارغا ھۇجۇم قىلغان، ھۇجۇمدا كەم دېگەندىمۇ 67 ئادەم ئۆلۈپ، 55 ئادەم يارىلانغان.

2014-يىلى 9-ئايدا ھۈسەيىن قوراللىقلىرى يەمەننىڭ پايتەختى سانانى ئىشغال قىلىپ ئۇزاق ئۆتمەيلا يەمەننىڭ جەنۇبىدىكى رايونلارنى ئىشغال قىلغان.

2015- يىلى 3- ئايدا، سەئۇدى ئەرەبىستان قاتارلىق دۆلەتلەر ھۈسەيىن قوراللىقلىرىغا قارىتا «كەسكىن توپان» ناملىق ھەربىي ھەرىكەت قوزغىغان.

بۈگۈنگە قەدەر، ھۈسەيىن قوراللىقلىرى يەنىلا سانا ۋە شىمالدىكى بىر قىسىم مۇھىم بازارلارنى كونترول قىلىۋېتىپتۇ. بىرلەشمە ئارمىيەنىڭ ياردىمى ۋە قوللىشى بىلەن يەمەن زۇڭتۇڭى ھادىنىڭ ھۆكۈمەت ئارمىيەسى ۋە قەبىلە قوراللىقلىرى يەمەننىڭ ئىككىنچى چوڭ شەھەرى ئادىن ۋە ئۈچىنچى چوڭ شەھەرى تائىزنىڭ كۆپ قىسىم رايونلىرىنى قايتۇرۇۋالغان.