جاھان ئاگېنتلىقى 13-ماي خەۋىرى؛ لەگلەك تورى تەرجىمىسى: سۇرىيە بەششار ئەسەد ھۆكۈمىتى ۋە ئىراق-شام ئىسلام دۆلىتى ئەسەبىي تەشكىلاتى «ISIS» قا قارشى ئۇرۇش قىلىۋاتقان سۇرىيە ئۆكتىچىلىرى، سۇرىيەنىڭ ھەلەب شەھىرىنىڭ شىمالىدا 11- مايدىن باشلاپ ھەرىكەت باشلىغان بولۇپ، شۇ جەرياندا 5 يېزىنى كونترول قىلدى. 2014-يىلى يانۋاردا ISIS تەشكىلاتى سۇرىيە ئۆكتىچىلىرىگە قارشى ئۇرۇش باشلىغان بولۇپ، سۇرىيەنىڭ دەير زور ۋە رەققە قاتارلىق بىر قانچە رايۇنىدا كىڭەيگەن ئىدى، ISIS تەشكىلاتى ھەلەب شەھىرىنىڭ شىمالىدىكى يېزىلاردا «مۇمبۇج، چوبانبەي، ئەل باب، ئاكتارىن، تۈركمەن بارىخ، گۇندارا، جەرابلۇس قاتارلىق بىر قانچە ئورۇنلارنى كونترول قىلىۋالغان بولۇپ، ئەينەل ئەرەب «كوبانى» سىرتىدا توقۇنۇشلار داۋاملاشقان ئىدى. ئۆكتىچىلەر ھەلەبنىڭ شىمالىدىكى كارامىل يېزىسىدا 11-مايدا باشلىغان ھۇجۇم ھەرىكىتى نەتىجىسىدە 5 يېزىنى قولىغا كىرگۈزدى. سۇرىيە ئۆكتىچى گۇرۇپپىسى «شامىيە فرونتى» ھەرىكەت قۇماندانى ئەبۇ ۋەلىد، 1 يېرىم يىلدىن بۇيان ISIS كە قارشى كۈرەش قىلىۋاتقانلىقىنى تىلغا ئېلىپ، « خەلقىمىز ISIS دەپ ئاتالغان بۇ خارىجىييە تېرور تەشكىلاتىنى ئازابىنى تارتتى، ISIS تەشكىلاتى شۇئاندا ئاجىز بىر باسقۇچتا تۇرماقتا، بىزنىڭ نىشانىمىز ئاۋال «ئەل باب، چوبانبەي، ئاكتارىن، مۇمبۇج» قاتارلىق ISIS نىڭ قولىدىكى رايۇنلارنى قايتۇرۋېلىشتۇر» دېدى. ئەبۇ ۋەلىد، كارامىل يېزىسىدىن باشلاپ 3 كۈن ئىچىدە «ھاساجىك، شاھبا، گۇل، سۇرۇچ، ھاسسىيە» قاتارلىق 5 يېزىنى ISIS تىن قايتۇرۋالغانلىقىنى، بۇ ھەرىكەتكە ئۆكتىچىلەردىن 7 گۇرۇپپىنىڭ قاتناشقانلىقىنى بىلدۈردى. ئەبۇ ۋەلىد، ISIS نى ئىسلام نامىدا خەلقكە زۇلۇم قىلىدىغان بىر تەشكىلات ئىكەنلىكىنى، ISIS نىڭ يېقىندا سۇرىيە زېمىنىدىن يۇقىلىدىغانلىقىنى ئېيتتى.