جاھان ئاگېنتلىقى 27-ئاپرېل خەۋىرى؛ لەگلەك تورى تەرجىمىسى: شىمالى سىپرۇس تۈرك جۇمھۇرىيتى سايلام كومىتىتى، پرېزىدېنت سايلىمىدا مۇستاپا ئاكىنجىنىڭ غەلبە قىلغانلىقىنى ئېلان قىلدى. ئالى سايلام كومىتىتى باشلىقى شەفەق ئۆنەرى، سايلامغا قاتنىشىش نىسىبىتىنىڭ يۈزدە 64.15% بولغانلىقىنى، تاشلانغان 110 مىڭ 60 ئاۋازدىن 108 مىڭ 32 ىنىڭ كۈچكە ئىگە ئىكەنلىكىنى بىلدۈردى. مۇستەقىل نامزاتلاردىن ئاكىنجى 65 مىڭ 412 ئاۋاز بىلەن يۈزدە 60.38% ، دەرۋىش ئەر ئوغلى 42 مىڭ 520 ئاۋاز بىلەن 39.62% نەتىجىگە ئېرىشكەن بولۇپ بۇ سايلامدا ئاكىنجى غەلبە قىلغان. رەسمى نەتىجىلەر بۈگۈن كەچ ئېلان قىلىنىدىغان بولۇپ، ئاكىنجى رەسمى دوكلاتىنى ھەپتە ئىچىدە ئالىدۇ. ئاكىنجىنىڭ پرېزىدېنتلىق ۋەزىپىسىدە ئولتۇرۇش مۇددىتى 5 يىل بولىدۇ.
سابىق پرېزىدېنت دەرۋىش ئەر ئوغلى ئاكىنجىنىڭ 4-نۆۋەتلىك پرېزىدېنت سايلىمىدا غەلبە قىلغانلىقىنى تەبرىكلىدى. جەنۇبى سىپرۇس ھۆكۈمىتى رەھبەرلىرىمۇ ئاكىنجىغا تەبرىك تېلگراممىسى ئەۋەتتى. تۈركىيە ئۆكتىچى جۇمھۇرىيەت خەلق پارتىيىسى باشلىقى كامال قىلىچدار ئوغلى مۇستاپا ئاكىنجىنىڭ سايلامغا غەلبە قىلغانلىقىنى تەبرىكلىدى.