2015-يىللىق ئۈرۈمچى (ئەتىياز پەسىللىك) ئۆي-زېمىن سودا كۆرگەزمىسى 14-ماي شىنجاڭ قىزىلتۆپە شىنجاڭ خەلقئارا كۆرگەزمە مەركىزىدە ئېچىلدى. بۇ قېتىمقى كۆرگەزمىگە 79 ئۆي-زېمىن كەسپى تەرەققىيات كارخانىسى قاتنىشىپ، ئۆزلىرىنىڭ ئۆي سېتىۋالغاندىكى ئېتىبار بېرىش لايىھەلىرىنى بەس-بەستە تونۇشتۇرۇپ، نۇرغۇن شەھەر ئاھالىلىرىنى ئۆي سېتىۋېلىشقا جەلپ قىلدى.
بۇ قېتىمقى كۆرگەزمىنىڭ باش تېمىسى ‹‹سۈپەتلىك ئۆي، ئارزۇيىڭىزدىكى باغچا ›› بولۇپ، ئۆي-زېمىن سودا بازىرىنى جانلاندۇرۇش ئارقىلىق، ئۆي-زېمىن كەسپىنىڭ ساغلام تەرەققىياتىنى ئىلگىرى سۈرۈشنى ئاساسىي مەقسەت قىلدى ھەمدە سەمىمىي مۇلازىمەت قىلىش ، ئاممىغا نەپ يەتكۈزۈشنى تەكىتلەپ، مول مەزمۇنلۇق پائالىيەتلەر ئارقىلىق، كۆرگەزمىنىڭ جەلپ قىلىش كۈچى ۋە تەسىر كۈچىنى ئاشۇردى.
بۇ قېتىمقى كۆرگەزمە مەزگىلىدە، يېڭىدىن سېلىنغان تاۋار ئۆيلەرنى سېتىۋالغاندا، يەر خېتى بېجى مالىيە تولۇقلىمىسىدىن بەھرىمەن قىلىنىدۇ؛ ئۆينىڭ ئىگىدارچىلىق ھوقۇقىنى بېجىرىش جەريانىدا تۇرالغۇ ھەققى، ئولتۇرمىغان ئۆيلەرنى تىزىملاش ھەققى ئېلىنمايدۇ (تۇرالغۇ ئۆي، ئولتۇرمىغان ئۆيلەرنى رەنىگە قويۇش تىزىملاش ھەققى، تۇرالغۇ ئۆي، ئولتۇرمىغان ئۆينى ئالدىن تىزىملاش ھەققى قاتارلىقلارنى ئۆز ئىچىگە ئالىدۇ).
كۆرگەزمە نەق مەيدانىغا سىياسەت مۇلازىمەت رايونى تەسىس قىلىنغان بولۇپ، ئۈرۈمچى شەھەرلىك قۇرۇلۇش كومىتېتى، شەھەرلىك تەرەققىيات-ئىسلاھات كومىتېتى، شەھەرلىك مالىيە ئىدارىسى، شەھەرلىك ئۆي-زېمىن باشقۇرۇش ئىدارىسى، شەھەرلىك سودا–سانائەت ئىدارىسى، شەھەرلىك تۇرالغۇ ئۆي جامائەت فوندىنى باشقۇرۇش مەركىزى، شەھەرلىك يەرلىك باج ئىدارىسى قاتارلىق فۇنكىسسىيەلىك تارماقلار نەق مەيداندا مۇناسىۋەتلىك سىياسەتلەرنى تەشۋىق قىلىش، مەسلىھەت سوراش مۇلازىمەت سۇپىسى تەسىس قىلىپ، شەھەرلىك ئۆي-زېمىن كەسپى ئۇيۇشمىسىنىڭ قانۇن مەسلىھەتچىلىرى قانۇندىن مەسلىھەت سوراش مۇلازىمىتى بىلەن تەمىنلىدى.
ئىگىلىنىشىچە، بۇ قېتىمقى ئۆي-زېمىن كەسپى كۆرگەزمىسى 17-ماي ئاياغلىشىدىكەن.