مەملىكەتلىك خەلق قۇرۇلتىيى دائىمىي كومىتېتىنىڭ باشلىقى جاڭ دېجياڭ 30-ئاۋغۇست ‹‹خەلق›› سارىيىدا كرودىيەنىڭ پارلامېنت باشلىقى جوسىپ لېيكو بىلەن سۆھبەت ئۆتكۈزدى

جاڭ دېجياڭ مۇنداق دېدى: جۇڭگو بىلەن كرودىيەنىڭ ئەنئەنىۋى دوستلۇقى چوڭقۇر. بولۇپمۇ 2005-يىلى ئومۇميۈزلۈك ھەمكارلىق شېرىكلىك مۇناسىۋىتى ئورناتقاندىن بۇيان، ئىككى دۆلەت مۇناسىۋىتى ئوڭۇشلۇق تەرەققىي قىلدى، سىياسىي جەھەتتىكى ئۆزئارا ئىشىنىشى چوڭقۇرلاشتى، قارشى تەرەپنىڭ يادرولۇق مەنپەئەتى ۋە زور كۆڭۈل بۆلىدىغان مەسىلىلىرىنى ئۆزئارا ھۆرمەتلەپ، بىر-بىرىنى چۈشىنىپ، ئىقتىساد-سودا، پەن-مائارىپ، يېزا ئىگىلىكى قاتارلىق ساھەلەردىكى ھەمكارلىقى ئۇچقاندەك تەرەققىي قىلدى، خەلقئارا ۋە كۆپ تەرەپلىك ئىشلاردا ئالاقە ۋە ماسلاشتۇرۇشنى ساقلىدى. كېلەر يىلى جۇڭگو بىلەن كرودىيەنىڭ ئومۇميۈزلۈك ھەمكارلىق شېرىكلىك مۇناسىۋەت ئورناتقانلىقىنىڭ 10 يىللىقى. بىز ياخشى سىياسىي مۇناسىۋەتنى تېخىمۇ كۆپ ھەمكارلىق مۇۋەپپەقىيەتلىرىگە ئايلاندۇرۇپ، جۇڭگو-كرودىيە مۇناسىۋىتىدە يېڭى تېخىمۇ زور تەرەققىياتنى قولغا كەلتۈرۈشنى ئىلگىرى سۈرىمىز.

جاڭ دېجياڭ ئىككى دۆلەتنىڭ قانۇن چىقىرىش ئورگانلىرىنىڭ ئالاقىسى ھەققىدە توختالغاندا مۇنۇلارنى بىلدۈردى: جۇڭگو مەملىكەتلىك خەلق قۇرۇلتىيى كرودىيە پارلامېنتى بىلەن بولغان مۇناسىۋەتنى كۈچەيتىشكە ئەھمىيەت بېرىدۇ، ئىككى تەرەپنىڭ ھازىرقى ياخشى ھەمكارلىق ئاساسىدا، تېخىمۇ ئىجابىي ھەمكارلىقنى قانات يايدۇرۇپ، دۆلەت مۇناسىۋىتىنىڭ تەرەققىيات ئومۇمىيلىقىغا تېخىمۇ ياخشى مۇلازىمەت قىلىشنى ئۈمىد قىلىمىز.

لېيكو مۇنداق دېدى: كرودىيە بىلەن جۇڭگو بىر-بىرىنى ھۆرمەتلەپ، بىر-بىرىگە باراۋەر مۇئامىلە قىلىدۇ، ئىككى دۆلەت ئوتتۇرىسىدىكى دوستلۇق ئۇزۇن تارىخقا ئىگە. كرودىيە بىر جۇڭگو سىياسىتىدە قەتئىي چىڭ تۇرىدۇ، جۇڭگونى ئاۋۋالقىدەكلا ئىشەنچىلىك دوستى دەپ قارايدۇ. كرودىيە پارلامېنتى جۇڭگو مەملىكەتلىك خەلق قۇرۇلتىيى بىلەن بىرلىكتە، ھەر قايسى قاتلامدىكى ئالاقىنى كۈچەيتىپ، ئىككى دۆلەتنىڭ ھەر قايسى ساھەلىرىدىكى ھەمكارلىقتا تېخىمۇ زور مۇۋەپپەقىيەتلەرنى ئىلگىرى سۈرۈشنى خالايدۇ.