‹‹قۇتادغۇ بىلىگ ›› نىڭ ئۇيغۇرچە، خەنزۇچە ئاۋازلىق نۇسخىسىنى ئۈرۈمچى ‹‹ ئېرپان ›› شىركىتى بازارغا سالغاندىن بۇيان، كىشلەرنىڭ ئەتىۋارلىق ھەمراھىغا ئايلاندى. خەنزۇچە ئاۋازلىق نەشرىنىڭ روياپقا چىقىشى بىلەن بۇ ئەڭگۈشتەرىمىزنى خەنزۇ قېرىنداشلار تونۇدى، ئۇلار كىتاب ھەققىدە چوڭقۇر پىكىر يۈرگۈزدى.
‹‹جۇڭخۇا مەدەنىيەت سەپىرى ›› نىڭ شىنجاڭ مەنزىلى مەملىكەتلىك چوڭ پائالىيىتىدە جۇڭخۇا مەدەنىيەت خەزىنىسىدىكى ‹‹ قۇتادغۇ بىلىگ ›› تىن ئىبارەت بۇ گۆھەرنى تونۇش، تەشۋىق قىلىش قىزغىنلىقى كۆتۈرۈلدى، بۇ مۇناسىۋەت بىلەن تاراتقۇلار ‹‹ جۇڭخۇا مەدەنىيەت سەپىرى ›› گە ئالاھىدە تەكلىپ بىلەن قاتناشقان مەدەنىيەت مىنىستىرلىقىنىڭ سابىق مىنىستىرى، شىنجاڭ ئۇيغۇر ئاپتونوم رايونلۇق خەلق ھۆكۈمىتىنىڭ مەسلىھەتچىسى، داڭلىق يازغۇچى، دۆلەت تارىخ-مەدەنىيەت يۇرتىنىڭ ئىلمىي خادىمى ۋاڭ مېڭ بىلەن شىنجاڭ ئۇيغۇر ئاپتونوم رايونلۇق ئەدەبىيات-سەنئەتچىلەر بىرلەشمىسىنىڭ رەئىسى ئازات سۇلتاننى زىيارەت قىلدى.
ۋاڭ مېڭ ‹‹ قۇتادغۇ بىلىگ ›› كە مۇنداق باھا بەردى: بۇ ئۇلۇغ قامۇس ئۇيغۇر مەدەنىيىتىنىڭ جەۋھىرى، ئۇيغۇر زىيالىلىرى ئارزۇلاپ ئوقۇيدىغان ئېسىل ئەسەر، ئۇيغۇرلار تۇرمۇشىنىڭ ئالتۇن دەۋرىدە بارلىققا كەلگەن، ئۇنىڭدا ئادەمنىڭ ئەخلاق -پەزىلىتىدىن تارتىپ، دۆلەتنىڭ قانۇن-پەرمانلىرىغىچە شېئىر، نەسرىي يەشمە شەكلىدە ئەڭ چىرايلىق سۆزلەر بىلەن بايان قىلىنغان، ئادەم بولۇشنىڭ يولى، دۆلەت باشقۇرۇشنىڭ يولى، كىشىلىك مۇناسىۋەت ناھايىتى توغرا بايان قىلىنغان. بۇ قامۇس شىنجاڭ ئوغۇل-قىزلىرى ئۈچۈنلا ئەمەس، جۇڭخۇا مىللەتلىرىگىمۇ ئورتاق قىممەتلىك. شۇ زامانلاردا ھاكىمىيەت ئىشىدا پاك، ئادىل ۋە ئىشەنچىلىك بولۇشتەك توغرا ئىدىيەلەر ئوتتۇرىغا قويۇلغان، بۇنىڭدىكى رەھبەرلىك قوشۇنىنى ساپلاشتۇرۇش دېگەندەك ئەينى دەۋرنىڭ ئىلغار قاراشلىرى ھازىرغا ئۇلاشقان. بۇ مەزمۇنلار خەلقنى تىنچ، خاتىرجەم تۇرمۇشقا ئۈندىگەن ھەم ئۈندەيدۇ. جۈملىدىن جۇڭگو ‹‹ قۇتادغۇ بىلىگ ›› كە مۇھتاج، شىنجاڭ ‹‹ قۇتادغۇ بىلىگ ›› كە تېخىمۇ مۇھتاج.
ئازات سۇلتان ‹‹قۇتادغۇ بىلىگ ›› نىڭ ئەھمىيىتى ھەققىدە توختىلىپ مۇنداق دېدى: ‹‹ قۇتادغۇ بىلىگ ›› ئۇيغۇر مەدەنىيىتىنىڭ سەمەرىسى، ئۇيغۇر مەدەنىيىتىدە ئۇيغۇر پەلسەپىسى، ئېستېتىكىسى، ئېتىكىسى، مەدەنىيەتنىڭ ھەممە يېرىگە چېتىلىدىغان، بىزگە ئەڭ مۇكەممەل ئۇچۇر، مەلۇمات بېرىدىغان بىر شاھانە ئەسەر. ئۇ يالغۇزلا ئۇيغۇر مىللىتىنىڭ تەپەككۈر سەۋىيەسىلا ئەمەس، شۇ دەۋىرىدىكى يىپەك يولىدا ياشىغان قېرىنداش مىللەتلەرنىڭ قىممەت قارىشى، تەپەككۈرلىرىنى ئەكس ئەتتۈرىدۇ. شۇ ۋاقىتتىكى تارىخ، مەدەنىيەت، قىممەت قاراشلىرىمىزنى، ئىزدىنىشلىرىمىزنى تەتقىق قىلىشتا بۈگۈنكى دەۋرىمىزدىمۇ بۇنىڭدىن ئۆتە مۇكەممەل يازما ماتېرىيال يوق، بۇ شۇنداق بىر يۇقىرى قىممەتنىڭ بەلگىسى، شۇنىڭغا بۇ ئەسەرگە تەتقىقات ساھەسىدىكىلەرلا ئەمەس، پۈتۈن مەملىكەت، ھەتتا دۇنيا مىقياسىدا قىزىقىش ئېشىۋاتىدۇ.