تەبىئىي شارائىتى ناچار بولغان شىنجاڭ ئۇيغۇر ئاپتونوم رايونى خوتەن ۋىلايىتىدە يېقىندا ھەممە ئائىلىلەرگە توك يەتكۈزۈلدى. دۆلەتلىك ئېلېكتىر تورى شىنجاڭ ئېلېكتىر شىركىتىنىڭ تونۇشتۇرۇشىچە، 12-بەش يىللىق پىلان مەزگىلىدە، شىنجاڭ ئېلېكتىر شىركىتى ئىلگىرى-كېيىن بولۇپ خوتەن ۋىلايىتىدە 168 ئېلېكتىر تورى تۈرىنى يولغا قويغان. ھازىرغىچە، سەككىز ناھىيەدىكى 41 مىڭ 600 توكسىز نوپۇسنىڭ توك مەسىلىسىنى ھەل قىلىپ، ئېلېكتىر تورى بىلەن قاپلاش دائىرىسىدىكى ھەممە ئائىلىلەرگە توك يەتكۈزگەن، بۇنىڭغا جەمئىي بىر مىليارد 943 مىليون يۈەن مەبلەغ سالغان، ھەر بىر ئائىلىگە سېلىنغان مەبلەغ ئوتتۇرىچە 66 مىڭ 700 يۈەندىن توغرا كېلىپ، خوتەندىكى توكسىز جايلارنىڭ ئېلېكتىر قۇرۇلۇشى ۋەزىپىسىنى مۇددەتتىن 18 ئاي بۇرۇن ئورۇنلىغان. شىنجاڭنىڭ 12-بەش يىللىق توكسىز جايلارنىڭ ئېلېكتىر قۇرۇلۇشى پىلانى بويىچە، 2015-يىلىنىڭ ئاخىرىغىچە، شىنجاڭ ئېلېكتىر تورى بىلەن شىنجاڭ تەۋەسىدىكى ھەممە ئائىلىلەرنى قاپلايدىكەن. نۆۋەتتە، ئېشىپ قالغان توكسىز نوپۇس ئاساسلىقى جەنۇبىي شىنجاڭدىكى قەشقەر، ئاقسۇ قاتارلىق ئۈچ ۋىلايەت، بىر ئوبلاستقا مەركەزلەشكەن. بۇ يىل، دۆلەتلىك ئېلېكتىر تورى شىنجاڭ ئېلېكتىر شىركىتى ئىككى مىليارد 82 مىليون يۈەن مەبلەغ سېلىپ، مۇھىت ناچار بولۇش قاتارلىق قىيىنچىلىقلارنى يېڭىپ، بۇ يىل 9-ئاينىڭ ئاخىرىغىچە، ئۈچ ۋىلايەت، بىر ئوبلاستنىڭ توك مەسىلىسىنى ئۈزۈل-كېسىل ھەل قىلىپ، پۈتۈن شىنجاڭنىڭ ئېلېكتىر تورى بىلەن قاپلاش دائىرىسىدىكى ھەممە ئائىلىلەرگە توك يەتكۈزۈشنى دۆلەت پىلانىدىن مۇددەتتىن بىر يىل بۇرۇن ئىشقا ئاشۇرىدىكەن.