رۇسىيە زۇڭتۇڭى پۇتىن ئامېرىكىلىق بوكسچى روي جونېس بىلەن خاتىرە سۈرەتكە چۈشتى
جۇڭگو تورى، 20-ئاۋغۇست خەۋىرى: رۇسىيە ‹‹ھەمراھ›› خەۋەرلەر تور بېكىتىنىڭ خەۋىرىگە قارىغاندا، رۇسىيە زۇڭتۇڭى پۇتىن ئامېرىكىلىق داڭلىق بوكسچى روي جونېس بىلەن سۆھبەتلەشكەن ھەمدە ناۋادا جونېس رۇسىيەدە ئۇزاق مۇددەت تۇرۇپ قالغۇدەك بولسا، ئۇنىڭ رۇسىيە دۆلەت تەۋەلىكىگە ئۆتۈشىگە ياردەم بېرىدىغانلىقىنى بىلدۈرگەن.
پۇتىن كۆرۈشۈشنىڭ دەسلىپىدىلا مۇنداق دېگەن: مەن سىز بىلەن تونۇشقانلىقىمدىن تولىمۇ خۇشالمەن، سىز مېنىڭ تەنتەربىيەنى ۋە بوكس ھەرىكىتىنى بەك ياخشى كۆرىدىغانلىقىمنى بىلىشىڭىز مۇمكىن.
پۇتىن جونېسنىڭ مۇزىكا ۋە كىنوچىلىق ئىشلىرىدا قولغا كەلتۈرگەن نەتىجىلىرىنى ماختىغان. ئۇ مۇنۇلارنى بىلدۈرگەن: مەن سىزنىڭ رۇسىيە سودا ساھەسىدىمۇ ئۇتۇقلارنى قولغا كەلتۈرۈشىڭىزنى ئۈمىد قىلىمەن. جونېس مۇنداق دېگەن: مەن دەل مۇشۇنىڭ ئۈچۈن كەلدىم، ناۋادا مېنىڭ رۇسىيە پاسپورتۇم بولسا، ئىككى يەردە بېرىش-كېلىش قىلىشقا بەك قولايلىق بولاتتى، چۈنكى بۇ يەردىكىلەر تەنتەربىيەنى بەك ياخشى كۆرىدۇ. مەنمۇ شۇ ۋەجىدىن بۇ يەرنى قىزغىن سۆيىمەن.
پۇتىن مۇنداق دېگەن: رۇسىيە خەلقى سىزنى ئوبدان بىلىدۇ، ناۋادا سىز ھاياتىڭىزنىڭ بىر قىسمىنى رۇسىيەدە ئۆتكۈزمەكچى بولسىڭىز، بىز ئەلۋەتتە سىزنىڭ تەلىپىڭىزنى خۇشاللىق بىلەن قاندۇرىمىز.