ئۇدا بىر ھەپتىدىن بۇيان، ئۈرۈمچىدە ھاۋا ئىللىق بولغاچقا، كىشىلەر كەچ كۈز پەسلىنى ئۇنتۇغاندەك بولدى. 21-ئۆكتەبىر كۈندۈزدە، ئۈرۈمچىدە ھاۋا ئوچۇق بولۇپ، ئەڭ يۇقىرى تېمپېراتۇرا℃24.8 قا چىقتى.

ئۈرۈمچى شەھەرلىك مېتېئورولوگىيە ئىستانسىسىنىڭ باشلىقى ۋاڭ جيەننىڭ ئېيتىشىچە، ئۈرۈمچىدە 10-ئايدا يۇقىرى تېمپېراتۇرىنىڭ ℃24 قا چىقىشى ئەجەپلىنەرلىك بولمىسىمۇ، لېكىن بۇ خىل ھاۋا ئۇزۇن داۋاملاشمايدىكەن. 22-ئۆكتەبىردىن باشلاپ يۇقىرى تېمپېراتۇرا℃20 دىن ئاشمايدىكەن.
ۋاڭ جيەننىڭ تونۇشتۇرۇشىچە، كەلگۈسى ئۈچ كۈندىن بەش كۈنگىچە ھاۋارايىغا تەسىر كۆرسىتىدىغان كۆرۈنەرلىك سەۋەب بولمىغاچقا، ئۈرۈمچىدە يەنىلا ھاۋا ئوچۇق بەزىدە بۇلۇتلۇق بولۇپ، تېمپېراتۇرا يىللاردىكىدىن سەل يۇقىرى بولىدىكەن.

پۈتۈن شىنجاڭ مىقياسىدىن قارىغاندا، 21-ئۆكتەبىر كېچىدىن 22-ئۆكتەبىر كۈندۈزگىچە، ئىلى دەريا ۋادىسى، بورتالا، تارباغاتاي، ئالتاي، تەڭرىتېغىنىڭ تاغلىق رايونلىرىدا ئازراق يامغۇر ياغىدىكەن، تاغلىق رايونلاردا يامغۇر ئارىلاش قار ياكى قار ياغىدىكەن، قىسمەن رايونلاردا ئوتتۇراھال قار يېغىپ، تېمپېراتۇرا℃5 ~℃3 قىچە چۈشىدىكەن. كەلگۈسى ئۈچ كۈندە، شىنجاڭنىڭ باشقا رايونلىرىدا ھاۋا ئوچۇق بەزىدە بۇلۇتلۇق بولىدىكەن.