ئۈرۈمچى شەھىرىنىڭ مەركەز ۋە ئاپتونوم رايونلۇق پارتكومنىڭ قارار، ئورۇنلاشتۇرمىلىرىنى ئىزچىللاشتۇرغانلىقى ۋە ئەمەلىيلەشتۈرگەنلىكى توغرىسىدا چاتما خەۋەر (8)
جاڭ لېي

ۋۇ ياۋمىڭ خۇبېي ئۆلكىسىدىن ئۈرۈمچى شەھىرىگە كېلىپ سەككىز يىل ئىشلىگەندىن كېيىن ، يۇرتىدىكى ئاتا-ئانىسى ، ئايالى ۋە پەرزەنتلىرىنى ئۈرۈمچىگە ئېلىپ كېلىپ ، بۇ يەردە ئولتۇراقلىشىش قارارىغا كەلدى .

ۋۇ ياۋمىڭ ئۆزىنىڭ نېمىشقا مۇشۇنداق قارارغا كەلگەنلىكىنى چۈشەندۈرۈپ مۇنداق دېدى : مەن بۇ نەچچە يىلدا ئۈرۈمچىنىڭ ئاسمىنىنىڭ بارغانسېرى سۈزۈكلىشىپ ، يوللىرىنىڭ كېڭەيگەنلىكىنى ، شەھەرنىڭ بارغانسېرى چىرايلىقلىشىۋاتقانلىقىنى كۆردۈم . بۇ يەردە ياشىسام تولىمۇ راھەت ھېس قىلىدىكەنمەن .

مەيلى يەرلىكلەر ياكى سىرتتىن كەلگەنلەر بولسۇن ، ئۈرۈمچى شەھىرىدە ۋۇ ياۋمىڭغا ئوخشاش تەسىراتقا كەلگەنلەر ئاز ئەمەس. يېقىنقى يىللاردا، ئۈرۈمچىنىڭ تەرەققىياتى تېز بولدى، ئۆزگىرىشلەرمۇ كىشىنى ھەيران قالدۇرىدۇ. ئۈرۈمچى شەھىرى زامانىۋى چوڭ شەھەر تۈسىگە كىردى، بۇ يەردە ياشاۋاتقان ھەر مىللەت ئاممىسىنىڭ بەخت كۆرسەتكۈچى ئۈزلۈكسىز ئاشماقتا. ئاپتونوم رايونىمىزدىكى چوڭ – كىچىك شەھەرلەر ئىچىدە ئۈرۈمچى شەھىرى تەبىئىي ئەۋزەللىكى ۋە تىرىشچانلىقىغا تايىنىپ ئىسمى – جىسمىغا لايىق باشلامچىغا ئايلىنىپ، ‹‹ئەڭ ياخشى مەركىزىي شەھەر›› نىشانىغا قاراپ داۋاملىق ئىلگىرىلەپ، باشقا شەھەرلەرگە ئۈلگە بولۇش رولىنى جارى قىلدۇرۇپ كەلمەكتە.
نەچچە يىل تىرىشچانلىق كۆرسىتىپ ‹‹ئەڭ ياخشى مەركىزىي شەھەر›› بەرپا قىلدى

شەھەر ئادەمگە ئوخشايدۇ، ئەگەر ئۇنىڭ نىشانى، تەبىرى ۋە يۆنىلىشى بولمىسا سىجىل، ساغلام تەرەققىي قىلالمايدۇ.
2010 – يىلى مەركەزنىڭ شىنجاڭ خىزمىتى سۆھبەت يىغىنىنىڭ ئېچىلىشى شىنجاڭغا مىسلىسىز تارىخىي پۇرسەت ئېلىپ كەلدى. ئۈرۈمچى شەھىرى شىنجاڭنىڭ مەركىزىي شەھىرى بولۇش سۈپىتى بىلەن تېپىلغۇسىز تەرەققىيات پۇرسىتىنى كۈتۈۋالدى. مۇشۇنداق پەيتتە، ئۆزىگە قانداق قىلىپ توغرا باھا بېرىپ، قانداق شەھەر بەرپا قىلىش كېرەك؟
بۇنىڭ جاۋابى پات ئارىدا تېپىلىدۇ.

شۇجى جاڭ چۈنشيەن 2011 – يىلى 16 – يانۋار ئاپتونوم رايونىمىزدا ئېچىلغان ‹‹ئىككى يىغىن›› مەزگىلىدە ئۈرۈمچى شەھىرى ۋەكىللەر ئۆمىكىنىڭ گۇرۇپپا مۇزاكىرىسىگە قاتناشقاندا: ‹‹ئۈرۈمچى شەھىرىنى تىرىشىپ جۇڭگونىڭ غەربىي رايونىدىكى مەركىزىي شەھەرگە، ئوتتۇرا ئاسىيا، غەربىي ئاسىياغا يۈزلەنگەن زامانىۋى خەلقئارا سودا مەركىزىگە، كۆپ مىللەت ئىناق ئولتۇراقلاشقان شەھەرگە، تەڭرىتاغدىكى بوستانلىق باغچا شەھىرىگە ۋە رايونلار ئارا مۇھىم ئۇنىۋېرسال قاتناش تۈگۈنىگە ئايلاندۇرۇشىمىز كېرەك››، دېگەنىدى. جاڭ چۈنشيەن شۇ كۈنى يەنە: ئۈرۈمچى شەھىرىنى شىنجاڭدىكى ‹‹ئەڭ ياخشى مەركىزىي شەھەر›› قىلىپ قۇرۇپ چىقىشنى تۇنجى قېتىم ئوتتۇرىغا قويدى.
‹‹ئەڭ ياخشى مەركىزىي شەھەر›› نىشانى ئۈرۈمچى شەھىرىنىڭ تەرەققىيات يۆنىلىشىنى ئېنىق كۆرسىتىپ بەردى.

ئۈرۈمچى شەھىرى شۇنىڭدىن كېيىنكى نەچچە يىلدا پۇرسەتنى چىڭ تۇتۇپ پائال ئالغا ئىلگىرىلەپ، ئىقتىسادىي تەرەققىيات، شەھەر قۇرۇلۇشى، ئىجتىمائىي مۇقىملىق، خەلق تۇرمۇشىنى ياخشىلاش قاتارلىق جەھەتلەردە كۈچەپ، ‹‹ئەڭ ياخشى مەركىزىي شەھەر›› بەرپا قىلىش نىشانىغا قاراپ ئىلگىرىلىدى.
ئۈرۈمچى شەھىرى 2013 – يىلى ئىشلەپچىقىرىش ئومۇمىي قىممىتىنى 40 مىليارد دوللارغا، ئىجتىمائىي ئىستېمال بۇيۇملىرىنىڭ پارچە سېتىلىش ئومۇمىي سوممىسىنى 15 مىليارد 660 مىليون دوللارغا، سودا ئىمپورت – ئېكسپورت ئومۇمىي سوممىسىنى 12 مىليارد دوللارغا، مالىيە كىرىمىنى 6 مىليارد 470 مىليون دوللارغا يەتكۈزدى. بۇ كۆرسەتكۈچلەر ئۈچ يىلدا بىر قاتلىنىپ، ئېشىش سۈرئىتى مەملىكىتىمىزدىكى ئۆلكىلەرنىڭ مەركىزىي شەھەرلىرى ئىچىدە ئالدىنقى قاتاردا تۇردى. بۇ يىل ئۈرۈمچى شەھىرىنىڭ ئىقتىسادىي كۆرسەتكۈچى داۋاملىق مۇقىم ئاشتى.

ئىقتىسادىي تەرەققىيات ئۈرۈمچى شەھىرىنىڭ تۈرلۈك ئىجتىمائىي ئىشلىرىنىڭ تەرەققىياتىنى بىۋاسىتە ئىلگىرى سۈردى. ئۈرۈمچى شەھىرى تۆت يىلدىن بۇيان ‹‹ئەڭ ياخشى مەركىزىي شەھەر›› قۇرۇش نىشانىنى زىچ چۆرىدەپ، مەركەز ۋە ئاپتونوم رايونلۇق پارتكومنىڭ قارار، ئورۇنلاشتۇرمىلىرىنى ئەستايىدىل ئىزچىللاشتۇردى ۋە ئەمەلىيلەشتۈردى، ئاساسىي قاتلامنىڭ ئاساسىدا تۈپتىن ئۆزگىرىش بولدى، ئىقتىسادىي ۋە ئىجتىمائىي ئىشلاردا ھالقىما تەرەققىيات ئىشقا ئاشۇرۇلۇپ، خەلق تۇرمۇشى ھەقىقىي ياخشىلاندى، ئۆزگىرىش، ئىسلاھات، دادىللىق، زامانىۋى مەدەنىيەتنى باشلامچى قىلغان كەيپىيات بارغانسېرى قويۇقلاشتى، قوشۇن قۇرۇلۇشىدا زور ئۆزگىرىش بولدى، جەمئىيەت گۈللەندى، مۇقىم ۋە ئىناق بولدى.

شۇجى جاڭ چۈنشيەن بۇ يىل 6 – نويابىردىن 9 – نويابىرغىچە ئۈرۈمچى شەھىرىدە تۆت كۈن خىزمەتلەرنى چوڭقۇر تەكشۈرۈپ تەتقىق قىلغاندىن كېيىن: يېقىنقى يىللاردىن بۇيان، ئۈرۈمچى شەھىرى ئىقتىسادىي قۇرۇلۇش، سىياسىي قۇرۇلۇش، مەدەنىيەت قۇرۇلۇشى، ئىجتىمائىي قۇرۇلۇش، پارتىيە قۇرۇلۇشى ۋە ئېكولوگىيە مەدەنىيلىكى قۇرۇلۇشى قاتارلىق جەھەتلەردە زور ئىلگىرىلەشلەرنى قولغا كەلتۈردى، ئاپتونوم رايونلۇق پارتكوم، خەلق ھۆكۈمىتى بۇنى تولۇق مۇئەييەنلەشتۈرىدۇ، دېدى. بۇ، ئۈرۈمچى شەھىرىنىڭ تۆت يىلدا ‹‹ئەڭ ياخشى مەركىزىي شەھەر›› نىشانىغا قاراپ زور قەدەم تاشلىغانلىقىدىن دېرەك بېرىدۇ.
ھەقىقىي تۇتۇپ، ئەمەلىي ئىشلەپ، ‹‹بەشتە ئۈلگە›› بولدى

ئاپتونوم رايونلۇق پارتكوم دائىمىي كومىتېتىنىڭ ئەزاسى، ئۈرۈمچى – سانجى پارتكومىنىڭ شۇجىسى، ئۈرۈمچى شەھەرلىك پارتكومنىڭ شۇجىسى جۇ خەيلۈن ئۈرۈمچى شەھىرىنىڭ تۈرلۈك ئۇتۇقلىرى ئۈستىدە توختىلىپ، چوڭقۇر قاتلاملىق سەۋەبلەرنى چۈشەندۈرۈپ مۇنداق دېدى: ئۈرۈمچىدىكى كىشىلەر، ئۈرۈمچىنىڭ ئاسمىنى ۋە زېمىنى ئۆزگەرگىنى يوق، ئەمما كىشىلەرنىڭ ئىدىيەسىدە، روھىي ھالىتىدە، رەھبەرلىك ئىستىلىدا ئۆزگىرىش بولدى، ئاخىرىدا ئۈنۈمىمۇ ياخشى بولدى، دېيىشىدۇ. ئەمەلىيەتتىمۇ ئىشلار ھەقىقەتەن شۇنداق بولدى. تۆت يىلدىن بۇيان، ئۈرۈمچى شەھىرىنىڭ قىياپىتى، خەلق تۇرمۇشى، ئىقتىسادىي ۋە ئىجتىمائىي تەرەققىياتىدا زور ئۆزگىرىش بولدى. بۇ، ئۈرۈمچى شەھىرىدىكى يۇقىرىدىن – تۆۋەنگىچە ھەممەيلەننىڭ بىر نىيەت، بىر مەقسەتتە بولۇپ، ھەقىقىي تۇتۇپ، ئەمەلىي ئىشلەپ، مەركەز ۋە ئاپتونوم رايونلۇق پارتكومنىڭ قارار، ئورۇنلاشتۇرمىلىرىنى پۈتۈن كۈچى بىلەن ئىزچىللاشتۇرۇپ ۋە ئەمەلىيلەشتۈرۈپ، ئۆزگىرىش ياسىغانلىقى، ئىسلاھات قىلغانلىقى ۋە دادىل بولغانلىقىنىڭ نەتىجىسىدۇر.

جەمئىي 33 مىليارد 200 مىليون يۈەن مەبلەغ سېلىنىپ، ‹‹كۆك ئاسمان قۇرۇلۇشى›› يولغا قويۇلدى. ئىلگىرى – كېيىن بولۇپ ئاتموسفېرا بۇلغايدىغان 110 تۈرنى تۈزىدى، ‹‹كۆمۈرنى گازغا ئۆزگەرتىش›› خەلق تۇرمۇشى قۇرۇلۇشى ئوڭۇشلۇق تاماملىنىپ، ئۈرۈمچى شەھىرى مەملىكىتىمىزدىكى تۇنجى ‹‹گازلاشقان›› شەھەرگە ئايلىنىپ، ھاۋا سۈپىتى سىجىل ياخشىلاندى. ھاۋا سۈپىتى جەھەتتە بۇ يىل ئۇدا نەچچە ئاي مەملىكىتىمىز بويىچە ئالدىنقى قاتاردا تۇردى.

يول قاتناش سىستېمىسى ئۈزلۈكسىز مۇكەممەللەشتى، ھەر تەرەپكە تۇتىشىدىغان شەھەر يولى تورى ھەر مىللەت ئاممىسىنىڭ يول يۈرۈشىنى زور دەرىجىدە قولايلاشتۇردى. ‹‹كاتەكچە شەكىللىك›› يول قۇرۇلۇشى شەھەر قاتنىشىنى تېخىمۇ راۋانلاشتۇردى، تېز سۈرئەتلىك ئاممىۋى قاتناش سىستېمىسى شەھەر ئاھالىسىنىڭ يول يۈرۈشىگە قولايلىق ياراتتى، يۇقىرى سۈرئەتلىك پويىز يېڭى يولۇچىلار بېكىتى، مېترو 1 – نومۇرلۇق لىنىيەسىدە كەينى – كەينىدىن ئىش باشلىنىپ، كەلگۈسى تەرەققىياتقا ئاساس سېلىندى.

مال باھاسى تىزگىنلەندى، مائارىپقا ئەھمىيەت بېرىلىپ، ئىشقا ئورۇنلاشتۇرۇش ئىلگىرى سۈرۈلۈپ، خەلققە نەپ يەتكۈزۈلدى. نۇرغۇن مەبلەغ ۋە ئەلگە نەپ يەتكۈزۈش سىياسەتلىرى كەينى – كەينىدىن خەلق تۇرمۇشى ساھەسىگە يۈزلىنىپ، ھەر مىللەت ئاممىسىنىڭ تۇرمۇش سۈپىتى ئۈزلۈكسىز ئۆستى، كىشىلەرنىڭ شەھەرنى ئېتىراپ قىلىش تۇيغۇسىمۇ ئۈزلۈكسىز كۈچەيدى.

ئادەم، مالىيە، ئەشيا سېلىنمىسى زورايتىلىپ، ئاساسىي قاتلام تەشكىلاتلىرى، مۇقىملىقنى ساقلاش كۈچلىرى، ئاممىۋى خىزمەتتىن ئىبارەت ئۈچ ئاساس پۇختىلىنىپ، ئىجتىمائىي ئومۇمىيەت سىجىل مۇقىم بولدى.

ئاپتونوم رايوننىڭ ئۈرۈمچى شەھىرىنىڭ خىزمەتلىرىنى مۇئەييەنلەشتۈرۈشى ئۈرۈمچى شەھىرىدىكى يۇقىرى – تۆۋەننىڭ غەيرىتىنى ھەسسىلەپ ئاشۇردى، ھەر مىللەت كادىرلار ۋە ئاممىنىڭ ئۈرۈمچىنى داۋاملىق گۈللەندۈرۈش ئىرادىسى ۋە ئىشەنچىنى چىڭىتتى.
جۇ خەيلۈن تېخى يېقىندا ئېچىلغان ئۈرۈمچى شەھىرىنىڭ كادىرلار خىزمىتى يىغىنىدا مۇنداق دېدى: شۇجى جاڭ چۈنشيەننىڭ ئۈرۈمچى شەھىرىدە خىزمەتلەرنى تەكشۈرۈپ تەتقىق قىلغاندا قىلغان سۆزىنىڭ روھىنى ئەستايىدىل ئۆگىنىپ ۋە ئىزچىللاشتۇرۇپ، ‹‹بەشتە ئۈلگە بولۇش›› تەلىپى بويىچە ئۈرۈمچى شەھىرىنى ‹‹ئەڭ ياخشى مەركىزىي شەھەر›› قىلىپ قۇرۇپ چىقىشىمىز كېرەك.

ئۈرۈمچى ئالدىدا مېڭىپ، ئاپتونوم رايونىمىزغا ئۈلگە بولدى
ئاپتونوم رايونلۇق پارتىيە مەكتىپى ئىقتىسادشۇناسلىق ئوقۇتۇش – تەتقىقات بۆلۈمىنىڭ مۇدىرى لى يەن مۇنداق دېدى: ئۈرۈمچى شەھىرى ئاپتونوم رايونىمىزنىڭ مەركىزىي شەھىرى بولۇش سۈپىتى بىلەن ئاپتونوم رايونىمىزنىڭ سىياسىي، ئىقتىسادىي ۋە مەدەنىيەت مەركىزى، بۇ شەھەرنىڭ ئۆزگىچە تەبىئىي ئەۋزەللىككە ئىگە ئىكەنلىكىنى ئىنكار قىلغىلى بولمايدۇ. لېكىن بىز چوقۇم كېيىنكى تىرىشچانلىقنىڭ ھەقىقىي ھالقىلىق رول ئوينايدىغانلىقىنى تونۇپ يېتىشىمىز كېرەك، ئۈرۈمچى شەھىرىنىڭ بۈگۈنكى نەتىجىلەرنى قولغا كەلتۈرۈشىنى ئۈرۈمچى شەھىرىدىكى ھەر مىللەت كادىرلار ۋە ئاممىنىڭ مىنۇت – سېكۇنتنى قولدىن بەرمەي، جاپاغا چىداپ باش چۆكۈرۈپ ئىشلىگەنلىكىدىن ئايرىپ قارىغىلى بولمايدۇ. ئاپتونوم رايونىمىزدىكى جايلار، شەھەرلەر بۇ نۇقتىنى تونۇپ يېتىشى، ئۈرۈمچى شەھىرىنىڭ ئاپتونوم رايونلۇق پارتكومنىڭ قارار، ئورۇنلاشتۇرمىلىرىنى تولۇق چۈشىنىش، ئەمەلىيلەشتۈرۈش، ئىجىرا قىلىش ئىقتىدارىدىن ئۆگىنىپ، ئۈرۈمچىنى ئۈلگە قىلىپ، تېخىمۇ كۆپ مۇنەۋۋەر شەھەر قۇرۇپ چىقىشى كېرەك.

ئۈرۈمچى شەھىرى نۆۋەتتە مەركەزنىڭ 2 – قېتىملىق شىنجاڭ خىزمىتى سۆھبەت يىغىنى ۋە يېپەك يولى ئىقتىساد بەلبېغى قۇرۇلۇشى قاتارلىق مۇھىم پۇرسەتكە دۇچ كېلىپ، ‹‹ئەڭ ياخشى مەركىزىي شەھەر›› قۇرۇشتىن سىرت يەنە يېڭى نىشانى تىكلەندى.

بۇ يىل سېنتەبىردە ئېچىلغان 4 – نۆۋەتلىك جۇڭگو – ئاسىيا، ياۋروپا كۆرگەزمىسى مەزگىلىدە، 9 – نۆۋەتلىك يىپەك يولىدىكى شەھەر باشلىقلىرى مۇنبىرى تۇنجى قېتىم ئۈرۈمچىدە ئۆتكۈزۈلدى، شۇ چاغدا جۇ خەيلۈن نۇتقىدا: ئۈرۈمچى يىپەك يولى ئىقتىساد بەلبېغى مەركىزىي رايونىدىكى ‹‹بەش مەركەز››نى، يەنى قاتناش تۈگۈنى مەركىزى، سودا – ئەشيا ئوبوروتى مەركىزى، پۇل مۇئامىلە مەركىزى، ئىلىم – پەن – مائارىپ – مەدەنىيەت مەركىزى ۋە داۋالاش مۇلازىمىتى مەركىزىنى تىرىشىپ قۇرۇپ چىقىدۇ، دېدى.

ئۈرۈمچى شەھىرى ھازىر بۇ نىشاننى ئەمەلگە ئاشۇرۇش ئۈچۈن، ‹‹قاتتىق دېتال›› ۋە ‹‹يۇمشاق دېتال›› قۇرۇلۇشىنى زور كۈچ بىلەن ئىلگىرى سۈرۈپ، تىرەكلىك رولى، باشلامچىلىق رولى ۋە تۈرتكە بولۇش رولىنى ئاكتىپ جارى قىلدۇرۇپ، 2025 – يىلىغىچە ئۈرۈمچى شەھىرىنى ئاسىيا – ياۋروپا كىندىكىدىكى سودا مەركىزىگە، پۇل مۇئامىلە مەركىزىگە، قاتناش مەركىزىگە، ئەشيا ئوبوروتى مەركىزىگە، پەن – تېخنىكا، مەدەنىيەت مەركىزىگە ئايلاندۇرۇپ، ئۈرۈمچى شەھىرىنى يىپەك يولى ئىقتىساد بەلبېغىنىڭ تۈگۈنىگە ئايلاندۇرۇشنى ۋە زور دەرىجىدە ئېچىۋېتىلگەن، تەسىرى كۈچلۈك، ئىقتىسادى گۈللەنگەن، جەمئىيەت ئىناق، ئېكولوگىيەسى ياخشى ئاسىيا – ياۋروپا چوڭ قۇرۇقلۇقىدىكى مەركىزىي شەھەرگە ئايلاندۇرۇشنى قولغا كەلتۈرىدۇ. ئاشۇ چاغدا، ئۈرۈمچى شەھىرى ھەقىقىي ‹‹ئەڭ ياخشى مەركىزىي شەھەر››گە ئايلىنىپ، ئۇنىڭ ئاپتونوم رايونىمىزدىكى نەمۇنىلىك، ئۈلگىلىك رولى تېخىمۇ گەۋدىلىنىدۇ .