ئالىي خەلق سوت مەھكىمىسى يېقىندا ئېلان قىلغان «خەلق سوت مەھكىمىسى خىزمىتىدىن يىللىق دوكلات (2014- يىل)» (ئاق تاشلىق كىتاب)تا مۇنداق دېيىلدى: 2014- يىلى سوت مەھكىمىسى ئىنتىزامغا قاتتىق رىئايە قىلىش ۋە قانۇننى پاك يۈرگۈزۈش تەربىيەسىنى كۈچەيتىپ، ساقچىلارغا جۇ يۇڭكاڭ، بو شىلەي قاتارلىقلارنىڭ قانۇننى ئاياغ ئاستى قىلىش، پارتىيەنىڭ ئىتتىپاقلىقىغا بۇزغۇنچىلىق قىلىش، قانۇنسىز سىياسىي ھەرىكەتلەرنى تەشكىللەش قىلمىشلىرى پەيدا قىلغان ئېغىر خەۋپنى تولۇق تونۇپ، جۇ يۇڭكاڭنىڭ قانۇن - ئىنتىزامغا ئېغىر دەرىجىدە خىلاپلىق قىلىش دېلوسىنىڭ سوت مەھكىمىسى خىزمىتىدە پەيدا قىلغان ناچار تەسىرىنى قەتئىي تۈگىتىپ، كادىرلار بىلەن ساقچىلارنى چوڭ ھەق، چوڭ ناھەق مەسىلىلىرىدە مەيدانى مۇستەھكەم، بايرىقى روشەن بولۇشقا يېتەكلىدى.
　　ئاق تاشلىق كىتابتا مۇنداق دېيىلدى: ھەر دەرىجىلىك سوت مەھكىمىلىرى 2014- يىلى پارتىيە ئىستىلى ۋە پاكلىق قۇرۇلۇشى بويىچە مەسئۇلىيەتنى سۈرۈشتۈرۈش مېخانىزمىنى ئورنىتىش ئۈستىدە ئىزدەندى. ھەر دەرىجىلىك خەلق سوت مەھكىمىلىرى خەلق سوت مەھكىمىسىدىكى ساقچىلار قانۇن - ئىنتىزامغا خىلاپلىق قىلغان 33 دېلودا «بىر دېلونى قوش تەكشۈرۈش»نى يولغا قويدى، سوت مەھكىمىسىنىڭ رەھبەرلىك ۋە نازارەتچىلىك مەسئۇلىيىتى بار 73 نەپەر رەھبىرىي كادىرىنىڭ جاۋابكارلىقىنى قاتتىق سۈرۈشتۈردى.
　　ئەدلىيە خىزمىتى ئىستىلى قۇرۇلۇشىنى چوڭقۇرلاشتۇرۇش جەھەتتە، مەملىكىتىمىزدىكى سوت مەھكىمىلىرى 2014- يىلى كۈندىلىك سوت قىلىش ئىشلىرىنى 48 مىڭ 809 قېتىم، مەخسۇس سوت قىلىش ئىشلىرىنى 9629 قېتىم تەكشۈرۈپ، مەركەزنىڭ «سەككىز تۈرلۈك بەلگىلىمە»سىنىڭ روھىغا خىلاپلىق قىلىش قاتارلىق ئىستىل مەسىلىلىرىنى ئاشكارا ۋە يوشۇرۇن تەكشۈرۈپ، بەلگىلىمىگە خىلاپ قىلمىشتىن 1206 ئادەم/ قېتىم نەق مەيداندا تۈزىتىپ، 177 كىشىگە پارتىيە ئىنتىزامى، سىياسىي ئىنتىزام جازاسى، 19 كىشىگە باشقا جازا بەردى، شۇنداقلا ئۇنىڭ ئىچىدىكى 20 تىپىك دېلونى جەمئىيەتكە ئاشكارا ئۇقتۇرۇش قىلدى.
　　ئاق تاشلىق كىتابتا يەنە مۇنداق دېيىلدى: 2014 - يىلى مەملىكىتىمىزدىكى خەلق سوت مەھكىمىلىرى قانۇن - ئىنتىزامغا خىلاپلىق قىلغان 2180 ساقچىنى دېلو تۇرغۇزۇپ تەكشۈرۈپ، 1937 دېلونى بىر تەرەپ قىلدى. 2014- يىلىنىڭ ئاخىرىغىچە، 180 كىشىنى ئەدلىيە ئورگانلىرىنىڭ بىر تەرەپ قىلىشىغا ئۆتكۈزۈپ بەردى. 1733 كىشىگە پارتىيە ئىنتىزامى، سىياسىي ئىنتىزام جازاسى بەردى.