شىنجاڭ ئۇنىۋېرسىتېتى كۇتۇپخانىسىنىڭ ئىلمىي دوكلات زالىدا 9 – ئىيۇن چۈشتىن كېيىن بىرمۇ بوش ئورۇن قالمىغانىدى. مەملىكەتلىك خەلق قۇرۇلتىيى دائىمىي كومىتېتىنىڭ سابىق مۇئاۋىن باشلىقى ئىسمائىل ئەھمەد ئوقۇتقۇچى، ئوقۇغۇچىلارغا مەركەزنىڭ 2 – قېتىملىق شىنجاڭ خىزمىتى سۆھبەت يىغىنىنىڭ روھىغا بىرلەشتۈرۈپ، مىللەتلەر ئىتتىپاقلىقىنى قوغداش، دىن ئەسەبىيلىكى ئىدىيەسىنىڭ يامراپ كېتىشىنى تىزگىنلەش ھەققىدە لېكسىيە سۆزلىدى.

ئىسمائىل ئەھمەد پارتىيەنىڭ مىللەت، دىن سىياسىتى، مىللىي تېررىتورىيەلىك ئاپتونومىيە تۈزۈمىنىڭ شىنجاڭدىكى ئەمەلىيىتىنى چۆرىدىگەن ھالدا، شىنجاڭنىڭ تەرەققىيات مۇساپىسى ۋە ئەمەلىي ئەھۋالىغا بىرلەشتۈرۈپ، ھەر مىللەت ئوغۇل – قىزلىرىنىڭ مۈرىنى مۈرىگە تىرەپ، ئېجىل – ئىناق ئۆتۈپ، شىنجاڭنى ئورتاق ئېچىپ گۈللەندۈرۈپ، چېگرا رايوننىڭ مۇقىملىقى، بىرلىكى، مىللەتلەر ئىتتىپاقلىقىنى ئورتاق قوغداپ، جۇڭخۇا مىللەتلىرىنىڭ تەرەققىياتىنى ئورتاق ئىلگىرى سۈرگەنلىكىنىڭ زور ئەھمىيىتىنى بايان قىلدى.

ئوقۇتقۇچى، ئوقۇغۇچىلار لېكسىيەنى ئاڭلىغاندىن كېيىن، ئۈلگىلىك رولىنى ياخشى جارى قىلدۇرۇپ، ئىدىيەدە يەنىمۇ ئويغىنىپ، ئاپتونوم رايونىمىزنىڭ تەستە قولغا كەلگەن مىللەتلەر ئىتتىپاق، جەمئىيەت مۇقىم، ئىقتىسادى گۈللەنگەن، ھەر مىللەت خەلق خاتىرجەم تىرىكچىلىك قىلىدىغان ياخشى ۋەزىيىتىنى يەنىمۇ مۇستەھكەملەپ ۋە يۈكسەلدۈرۈپ، ئۇلۇغۋار غايىنى قەلبىگە پۈكۈپ، دۆلەتنى سۆيۈش، شىنجاڭنى سۆيۈش قىزغىنلىقىنى ئىختىساسلىقلارغا ئايلىنىشتىكى ھەرىكەتلەندۈرگۈچ كۈچ قىلىپ، دۆلەت ۋە ئاپتونوم رايونىمىزنىڭ قۇرۇلۇشى ئۈچۈن ياشلىقى ۋە ئەقىل – پاراسىتىنى تەقدىم قىلىدىغانلىقىنى بىلدۈردى.

شىنجاڭ ئۇنىۋېرسىتېتى خىمىيە سانائىتى ئىنستىتۇتى پارتكومىنىڭ شۇجىسى تۇرغۇن توختى مۇنداق دېدى: مىللەتلەر ئىتتىپاقلىقى ھەر مىللەت خەلقنىڭ جان تومۇرى، ھەر مىللەت خەلقنىڭ تۇرمۇشىغا سىڭگەن بىر خىل ھېسسىيات، شىنجاڭدىن ئىبارەت كۆپ مىللەتلىك ئائىلىدە ھەممىمىز بىر – بىرىمىزدىن ئايرىلالمايمىز. ئوقۇتقۇچى بولۇش سۈپىتىم بىلەن ئۆزۈمدىن، ئەتراپىمدىكى كىچىك ئىشلاردىن باشلاپ مىللەتلەر ئىتتىپاقلىقى ئىدىيەسىنى كىشىلەر قەلبىگە سىڭدۈرىمەن.