2-ئىيۇن ، مۇخبىرنىڭ ئۈرۈمچى شەھەرلىك قاتناش تارماق ئەترىتى ئالاھىدە ھەرىكەت قاتناش ساقچى چوڭ ئەترىتىدىن ئىگىلىشىچە ، ئۈرۈمچىدە جىددىي ئەھۋالغا تاقابىل تۇرۇش موتسىكلىت چارلاش تارماق ئەترىتى قۇرۇلغان بولۇپ ، ئۇلار تۇيۇقسىز ۋەقەلەر ھەمدە يوللاردىكى قاتناش توسۇلۇش ئەھۋاللىرىنى جىددى بىر تەرەپ قىلىدىكەن .

ئىگىلىنىشىچە ، بۇ ئەترەتكە ئۈرۈمچى شەھەرلىك قاتناش ساقچى تارماق ئەترىتى ئالاھىدە ھەرىكەت قاتناش ساقچى چوڭ ئەترىتىدىن ساغلام ، كەسپىي ئىقتىدارى كۈچلۈك ياش ساقچىلار تاللانغان بولۇپ ، ئىش ئورنىغا چىقىشتىن بۇرۇن موتسىكلىت مىنىش ، جىددىي ئەھۋاللارنى بىر تەرەپ قىلىش قاتارلىق جەھەتلەردىن كۆپ تەرەپلىمىلىك تەربىيەلەنگەن .

ئالاھىدە ھەرىكەت قاتناش ساقچى چوڭ ئەترىتىنىڭ باشلىقى جۇ خۇڭشىڭنىڭ مۇخبىرغا تونۇشتۇرۇشىچە ، بۇ چارلاش ئەترىتى قۇرۇلغاندىن كېيىن ، ئاساسلىقى ئىككى مۇھىم ۋەزىپىنى ئۈستىگە ئالىدىكەن ، بىرى ، تۇيۇقسىز ۋەقە ياكى قاتناش ھادىسىلىرى يۈز بەرسە ، دەرھال نەق مەيدانغا يېتىپ بېرىپ ، قۇتقۇزۇش ئاپتوموبىللىرى ۋە ساقچى ئاپتوموبىللىرىغا يېشىل يول ئېچىپ ، ۋەقەنى تېز بىر تەرەپ قىلىدىكەن .

يەنە بىرى ، بۇ ئەترەت سودا رايونى ، باغچا ، مەكتەپ قاتارلىق ئادەم ۋە ئاپتوموبىل بىر قەدەر كۆپ بولغان ھەمدە قۇرۇلۇش قىلىنىۋاتقان يول بۆلەكلىرى ، قاتناش ئاسان توسۇلىدىغان يول بۆلەكلىرىدە چارلاش ئېلىپ بېرىپ ، شەھەر ئاھالىلىرىنىڭ تۇرمۇش ۋە قاتنىشىغا قولايلىق يارىتىدىكەن .