يوپۇق ئېچىش مۇراسىمىدىن كۆرۈنۈش

ئىختىيارىي مۇخبىرىمىز ئابلىمىت سوپىھاجى خەۋىرى، فوتوسى: 10-ماي، ‹‹قۇتادغۇبىلىگ» تەتقىقات مەركىزى قەشقەر پېداگوگىكا ئىنىستىتۇتىدا رەسمىي قۇرۇلۇپ ۋىۋىسكا ئېسىلدى. شىنجاڭ ئۇيغۇر ئاپتونوم رايونلۇق ئەدەبىيات-سەنئەتچىلەر بىرلەشمىسى، قەشقەر ۋىلايىتى، قەشقەر پېداگوگىكا ئىنىستىتۇتىنىڭ مۇناسىۋەتلىك رەھبەرلىرى ۋە قەشقەر ۋىلايىتىدىكى بىر قىسىم تەتقىقاتچى، يازغۇچى–شائىرلار، قەشقەر پېداگوگىكا ئىنىستىتۇتى فىلولوگىيە فاكۇلتېتىنىڭ بىر قىسىم ئوقۇتقۇچى- ئوقۇغۇچىلىرىدىن بولۇپ 200 دىن ئارتۇق كىشى مۇراسىمغا قاتناشتى.

يېقىنقى يىللاردىن بۇيان، پارتىيە-ھۆكۈمەتنىڭ روز كۈچ بىلەن قوللاپ غەمخورلۇق قىلىشى، ئالىم-مۇتەخەسسىسلەرنىڭ جاپالىق ئىزدىنىشلىرى نەتىجىسىدە «تۈركىي تىللا دىۋانى»، «قۇتادغۇبىلىگ»، «خەمىسە»، «چاھار دىۋان» قاتارلىق كۆپلىگەن قىممەتلىك مەدەنىي مىراسلىرىمىز خەلقىمىز بىلەن قايتىدىن يۈز كۆرۈشتى. مەشھۇر ئەسەر «قۇتادغۇبىلىگ» نىڭ نەشر قىلىنغىنىغا بۇ يىل دەل 30 يىل بولغان بولۇپ، بۇ 30 يىلدىن بۇيان، بۇ ئەسەر ھەققىدە ئاز بولمىغان تەتقىقاتلار ئېلىپ بېرىلغان بولسىمۇ ئەمما «قۇتادغۇبىلىگ» ئۆز ئىچىگە ئالغان مەزمۇن، پىكىر، ئىدىيە، ئۇچۇر مەلۇماتلارغا نىسبەتەن ئېيتقاندا بۇ نەتىجىلەرنى پەقەت دېڭىزدىكى بىر تامچىغا ئوخشىتىش مۇمكىن.

نۆۋەتتىكى ياخشى ۋەزىيەت، ئۆگىنىش، تەتقىقات مۇھىتى بۇ ھەقتە تېخىمۇ كۆپ تەتقىقاتلارنى ئېلىپ بېرىشقا ئىلھاملاندۇرىدۇ. ئەنئەنىۋى مەدەنىيەتكە ۋارسلىق قىلىش ۋە ئۇنى بۈگۈنكى زامانىۋى مەدەنىيەتتە جارى قىلدۇرۇش مەقسىتىدە قۇرۇلغان «قۇتادغۇبىلىگ» تەتقىقات مەركىزى بۇ ھەقتىكى تەتقىقاتنى تېخىمۇ چوڭقۇرلاشتۇرۇش ۋە كەڭلىككە ئىگە قىلىشتا ئىنتايىن مۇھىم ئەھمىيەتكە ئىگە. ئۇ، قەشقەرنىڭ مەدەنىيەت-سەنئەت ئىشلىرىدىكى يەنە بىر بۆسۈش خاراكتېرلىك ئىلگىرىلەش ھېسابلىنىدۇ.

قەشقەر تارىختىن بۇيان نۇرغۇنلىغان تەتقىقاتچى ئالىملار، مۇتەخەسسىسلەر، يازغۇچى شائىرلار توپلاشقان قەدىمىي مەدەنىيەت بۆشۈكى. بۇ مەركەزنىڭ قۇرۇلۇشى يەنە ئۆز نۆۋىتىدە قەشقەردىن ئىبارەت تارىخىي مەدەنىيەتلىك شەھەردىكى تارىخىي مەدەنىيەت ئىزنالىرىنى قېزىشتا ۋە ئۇنى جۇلالىتىشتا ئىنتايىن مۇھىم رولغا ئىگە.

‹‹قۇتادغۇبىلىگ» تەتقىقات مەركىزىنىڭ بەلگىسى