بىر ھەپتە ئىلگىرى، سامسۇڭ پاتنېت ھوقوقىغا دەخلى-تەرۇز قىلغانلىقى ئۈچۈن، ئالما شىركىتىگە 548 مىليون دوللار تۆلەم تۆلىگەن. ئالما شىركىتى بۇ ھەپتىنىڭ چارشەنبە كۈنى سوتقا قايتا ئىلتىماس سۇنۇپ، سامسۇڭ تۆلىگەن تۆلەم پۇلىدىن رازى بولمىغانلىقىنى بىلدۈرگەن.

    ئالما شىركىتى چارشەنبە كۈنى سوت مەھكىمىسىگە تاپشۇرغان ماتىرىيالدا كۆرسىتىلىشىچە، سامسۇڭ بۇ شىركەتكە يەنە 180 مىليون دوللار (خەلق پۇلىغا تەخمىنەن 1.16 مىليارد يۈەن) تۆلەم تولۇقلىمىسى ۋە ئۆسۈم تاپشۇرۇشى كېرەككەن.

ئالما شىركىتىنىڭ ئېيتىشىچە، سامسۇڭنىڭ بەش خىل مەھسۇلاتى ئۇلارنىڭ پاتنېت ھوقوقىغا دەخلى-تەرۇز قىلغان، بىراق 2012-يىلى پاتنېت ھوقوقىغا دەخلى-تەرۇز قىلغان دەپ ھۆكۈم چىقىرىلغان بولسىمۇ، ھازىرغىچە بۇ مەھسۇلاتلارنى سېتىشنى توختاتمىغان.

سامسۇڭ بىلەن ئالما ئوتتۇرىسىدىكى پاتنېت دەۋاسى 2011-يىلى باشلانغان بولۇپ، مەزمۇنى يانفوننىڭ سىرتقى لايىھەسىدىن تارتىپ سىستېما ئىقتىدارىغىچە بولغان نۇرغۇنلىغان تەرەپلەرگە چېتىلىدىكەن. ئالما شىركىتى ئامېرىكا كالىفورنىيە ئىشتاتى يەرلىك سوت مەھكىمىسىگە قايتا-قايتا ئىلتىماس سۇنۇپ، سامسۇڭ ماركىسىدىكى كۆپ خىل ئەقلىي ئىقتىدارلىق يانفوننىڭ ئايفوننىڭ لايىھەسىنى دوراپلا قالماي، يەنە سىستېمىدىكى ئېكران يۈزىنى سىيرىپ قۇلۇپ ئېچىش، بارماق بىلەن ئېكران مەزمۇنىنى چوڭايتىش ۋە كىچىكلىتىش قاتارلىق نۇرغۇنلىغان ئىقتىدارلارنى كۆچۈرۈپ ئىشلەتكەنلىكىنى ئەيىبلىگەن. سوت مەھكىمىسى بۇنىڭغا چىقارغان ھۆكۈمدە، سامسۇڭ ئالما شىركىتى ئۈچۈن 930 مىليون دوللار تۆلەم تۆلىشى كېرەكلىكى بېكىتىلگەن.

    ئارقىدىن، سامسۇڭ سوتقا نارازىلىق ئەرزى سۇنۇپ، تۆلەم سوممىسىنى ئازايتىشنى تەلەپ قىلغان، ئامېرىكا سوت مەھكىمىسى بۇ دەۋاغا قايتا قاراپ چىققاندىن كىيىن، سامسۇڭنى ئالما شىركىتىنىڭ «سودا خاراكتېرلىك سىرتقى لايىھە» پاتنېت ھوقوقىغا دەخلى-تەرۇز قىلمىغان دەپ ھۆكۈم چىقىرىپ، تۆلەم سوممىسىنى 548 مىليون دوللارغا تۆۋەنلەتكەن.

   مانا ئەمدى، ئالما شىركىتى سامسۇڭ بەرگەن تۆلەم پۇلدىن رازى بولمىغاچقا، ئىككى شىركەت ئوتتۇرىسىدىكى جەڭ قايتىدىن باشلانغان، بىراق، ئاڭلاشلارغا قارىغاندا، ئۇرۇشۇپ تۇرسىمۇ بىر-بىرىدىن ئايرىلالمايدىغان بۇ ئىككى شىركەت ئوتتۇرىسىدىكى ھەمكارلىق مۇناسىۋىتى بۇ دەۋا تۈپەيلىدىن ئانچە چوڭ تەسرگە ئۇچرىمىغان ئىكەن.