12-ئاينىڭ 1-كۈنى، مائارىپ مىنىستىرلىكى پارتگۇرۇپپىسى تېلېۋىزىيە يىغىنى ئېچىپ، يېقىندا تەكشۈرۈپ چىقىلغان مەركىزىي مۇزىكا ئىنىستىتۇتى پارتگۇرۇپپىسىنىڭ دائىمىي ھەيئەت ئەزاسى، مەكتەپ مۇدىرى ۋاڭ سىجاۋنىڭ قىزى ئۈچۈن بەلگىلىمىگە خىلاپ توي مۇراسىمى ئۆتكۈزۈپ بەرگەنلىك مەسلىسىنى ئاشكارا تەنقىدلىدى. تەكشۈرۈش ئارقىلىق 2015-يىلى 6-ئايدا ۋاڭ سىجاۋنىڭ قىزى ئۈچۈن توي مۇراسىمى ئۆتكۈزۈش جەريانىدا ۋەزىپىسىدىن پايدىلىنىپ مەزكۇر مەكتەپ بىلەن ئالاقىسى بار بېيجىڭدىكى مەلۇم بىر خەلقئارالىق سەنئەت مەركىزى تەمىنلىگەن ئېتىبار باھانى قوبۇل قىلغانلىقى، ھەمدە مەكتەپتىكى خىزمەتداشلىرى، قول ئاستىدىكىلەرنى توي مۇراسىمىغا قاتنىشىشقا ھەمدە توي مۇراسىمىدا خىزمەت قىلىشقا تەكلىپ قىلغانلىقى (بۇلارنىڭ ئىچىدە بەش نەپەر مەكتەپ رەھبەرلىك بەنزىسىنىڭ ئەزاسى بار)، بۇ ئارقىلىق ناچار تەسىر بەرگەنلىكى، بۇ قىلمىشىنىڭ مەركەزنىڭ سەككىز تۈرلۈك بەلگىلىمىسىنىڭ روھى ۋە پارتىيەنىڭ پاكلىق ئىنتىزامىغا خىلاپ ئىكەنلىكى ئېنىقلاندى.

مەكتەپنىڭ شۇجىسى گو شۇلەن بىرىنچى مەسئۇل كىشى بولۇش سۈپىتى بىلەن ۋاڭ سىجاۋنىڭ قىزى ئۈچۈن بەلگىلىمىگە خىلاپ ھالدا توي مۇراسىمى ئۆتكۈزۈشىنى توسماستىن ئۆزى توي مۇراسىمىغا قاتنىشىپ، بەخىت تىلىگەن، ئۆز مەجبۇرىيىتىنى ئادا قىلمىغان. مەكتەپنىڭ مۇئاۋىن شۇجىسى، ئىنتىزام شۇجىسى فېڭ خۇەنلېي پارتىيە ئىستىلى پاكلىق قۇرۇلۇشىنى نازارەت قىلىدىغان بىرىنچى مەسئۇل كىشى تۇرۇپ، ۋاڭ سىجاۋنىڭ قىزى ئۈچۈن بەلگىلىمىگە خىلاپ توي مۇراسىمى ئۆتكۈزۈپ بېرىشىنى توسماي، توي مۇراسىمىغا قاتناشقان، نازارەت قىلىش مەجبۇرىيىتىنى ئادا قىلمىغان. مائارىپ مىنىستىرلىكى پارتگۇرۇپپىسى، بېيجىڭ شەھەرلىك ئىنتىزام تەكشۈرۈش كومىتېتى تەتقىق قىلىش ئارقىلىق ۋاڭ سىجاۋغا پارتىيە ئىچىدە ئېغىر ئاگاھلاندۇرۇش جازاسى بېرىش، ئۇنىڭ مەركىزىي مۇزىكا ئىنىستىتۇتى پارتگۇرۇپپىسىنىڭ دائىمىي ھەيئەت ئەزالىق، مەكتەپ مۇدىرىلىق سالاھىيىتىنى ئېلىپ تاشلاش جازاسى بېرىشنى قارار قىلدى؛ گو شۇلەن، فېڭ خۇەنلېي قاتارلىقلارغا پارتىيە ئىچىدە ئاگاھلاندۇرۇش جازاسى بېرىشنى قارار قىلدى.

ئىسمىنى ئاشكارىلاشنى خالىمىغان بىر نەپەر مەركىزىي مۇزىكا ئىنىستىتۇتىنىڭ پىروفېسسورى مۇخبىرغا ۋاڭ سىجاۋ جازالىنىپ ۋەزىپىسىدىن ئېلىپ تاشلىنىشتىن ئۈچ كۈن بۇرۇن تۇيۇقسىز ئۆزىنى يېڭى نۆۋەتلىك ئىلىم-پەن كومىتېتىنىڭ مۇدىرى دەپ ئېلان قىلغانلىقى، بۇنىڭدىن بۇرۇن يېڭى نۆۋەتلىك ئىلىم-پەن كومىتېتى ئەزالىرىنىڭ ئىسىملىكى تېخى ئاشكارىلانمىغانلىقىنى ئېيتتى. ئۇنىڭ چۈشەندۈرىشىچە، ئۈچ يىل بۇرۇن ئىلگىرىكى ئىلىم-پەن كومىتېتىنىڭ نىزامنامىسى ئۆزگەرتىلىپ، ئەزالارنىڭ يېشى 65 تىن ئېشىپ كەتمەسلىكى كېرەك دەپ بەلگىلەنگەن، شۇنىڭ بىلەن بىر تۈركۈم پېشقەدەم پىروفېسسورلار ئىلىم-پەن كومىتېتىدىن چېكىنىپ چىققان، لېكىن بۇ قېتىم يەنە قايتا ئۆزگەرتىش كىرگۈزۈپ، ياش چەكلىمىسىنى 70 ياشقا ئۇزارىتقان، شۇنىڭ بىلەن بۇ يىل 66 ياشقا كىرگەن ۋاڭ سىجاۋ ئوڭۇشلۇق ھالدا يېڭى نۆۋەتلىك ئىلىم-پەن كومىتېتىنىڭ مۇدىرى بولغان.