پاكىستان دىپلوماتىيە مىنىستىرلىقى 13- يانۋار بايانات ئېلان قىلىپ، شۇ كۈنى پاكىستاننىڭ ئافغانىستاننىڭ جالالئاباد شەھىرىدە تۇرۇشلۇق كونسۇلخانىسىنىڭ ھۇجۇمغا ئۇچرىغانلىقىنى كۈچلۈك ئەيىبلىدى. باياناتتا مۇنداق دېيىلدى: پاكىستان، ئافغانىستان ھۆكۈمىتىدىن بۇ ۋەقەنى ئومۇميۈزلۈك تەكشۈرۈپ، جىنايەتچىنىڭ ھۇجۇم قىلىش سەۋەبىنى ئېنىقلىشىنى، ھەمدە پاكىستان تەرەپكە تەكشۈرۈش تەپسىلاتىنى دوكلات قىلىشنى تەلەپ قىلدى. شۇنىڭ بىلەن بىر ۋاقىتتا، پاكىستان تەرەپ، ئافغانىستان ھۆكۈمىتىدىن، پاكىستاننىڭ ئافغانىستاندا تۇرۇشلۇق ۋەكىللەر ئۆمىكى بىلەن پاكىستان ئەمەلدارلىرىنىڭ جىسمانىي بىخەتەرلىكىگە ھەقىقىي كاپالەتلىك قىلىشنى تەلەپ قىلدى. شۇ كۈنى كەچتە، ئىسلام دۆلىتى ئەسەبىي تەشكىلاتى بۇ قېتىمقى ھۇجۇمنى ئۆزلىرىنىڭ پەيدا قىلغانلىقىنى جاكارلىدى. ئافغانىستان ئەمەلدارى 13- يانۋار، شۇ كۈنى يۇز بەرگەن ھۇجۇمدا ئاز دېگەندە 7 ساقچىنىڭ قازا قىلغانلىقىنى، 11 كىشىنىڭ يارىلانغانلىقىنى، بۇنىڭ ئىچىدە پاكىستان تەرەپنىڭ بىر خىزمەتچى خادىمىنىڭ بارلىقىنى ئىسپاتلىدى.