جاھان ئاگېنتلىقى 13-ماي خەۋىرى؛ لەگلەك تورى تەرجىمىسى: يەمەندە ئىنسانىي ياردەم يەتكۈزۈش ئۈچۈن 5 كۈنلۈك ئۇرۇش توختىتىش ئېلان قىلىنغاندىن كېيىن، سەئۇدى ئەرەبىستان تەرەپ يەمەندىكى شىئە ھۇسىي قۇراللىقلىرىنىڭ ئۇرۇش توختىتىش كېلىشىمىنى بۇزغانلىقىنى جاكارلىدى، يەمەن تەرەپتىن ئېتىلغان بىر راكىتا سەئۇدى ئەرەبىستان زېمىنىغا چۈشتى.
سەئۇدى ئەرەبىستان مۇداپئە مىنىسىتىرلىكى ، يەمەن تەرەپتىن ئېتىلغان بىر راكىتانىڭ سەئۇدى ئەرەبىستان زېمىنىغا چۈشكەنلىكىنى ئېلان قىلدى. سەئۇدى ئەرەبىستان رەسمى خەۋەر ئاگېنتلىقىدا بېرىلگەن خەۋەردە، «سەئ‍ۇدى ئەرەبىستان يەمەندىكى ئىنسانىي ياردەم يەتكۈزۈش مەقسىتىدىكى ئۇرۇش توختىتىشتا داۋاملىق سەۋىرلىك بولۇپ تۇرىدۇ» دېيىلگەن.
سەئۇدى ئەرەبىستان پادىشاھى سەلمان ئىبنى ئابدۇلئەزىز، يەمەنگە ياردەم بېرىش ھەققىدىكى ۋەدىسىنى ئىككى ھەسسىلەپ ئورۇندايدىغانلىقىنى بىلدۈردى، يەمەندە بۈگۈندىن باشلاپ ئىجرا قىلىنغان 5 كۈنلۈك ئۇرۇش توختىتىشنىڭ تۇنجى كۈنىدە سەئۇدى ئەرەبىستان ھۆكۈمىتى يەمەنگە 450 مىليون دوللارلىق ياردەم ئەۋەتىدىغانلىقىنى ئېلان قىلدى. سەئۇدى ئەرەبىستان 18-ئاپرېلدا بىرلەشكەن دۆلەتلەر تەشكىلاتىنىڭ يەمەنگە جىددىي ئىنسانىي ياردەم يەتكۈزۈش ئۈچۈن تەلەپ قىلغان 274 مىليون دوللارنىڭ ھەممىسىنى بېرىدىغانلىقى ھەققىدە ۋەدە بەرگەن. ب د ت ئىنساني ياردەم ئاگېنتلىقى باياناتچىسى جېنس لىرك تۈنۈگۈن ئېلان قىلغان باياناتىدا، « يەمەنگە ھەدىيە قىلىنىدىغان مەبلەغنىڭ ئىشلىتىلىدىغان پىلانلىرى ۋە پىلانلارنىڭ ھەمكارلاشقۇچىلىرى بېكىتىلدى، ئەمما مەبلەغ تېخىچە تاپشۇرۇلمىدى» دىگەن.
قاتارنىڭ جىبۇتىدىكى باش ئەلچىسى جاسىم ئىبنى جابىر جاسىم سۇرۇر، قاتارنىڭ يەمەنگە بېرىدىغان بارلىق ياردىمىنىڭ يۈزدە 25% نى جىبۇتىدىكى يەمەنلىك مۇساپىرلارغا بېرىدىغانلىقىنى، قالغان 75% نى ئەدەن رايۇنىغا دېڭىز ئارقىلىق يەتكۈزىدىغانلىقىنى بىلدۈردى.
جاسىم سۇرۇر، قاتارنىڭ يەمەنگە يەتكۈزىدىغان يىمەكلىكلەرنى جىبۇتىدىكى ب د ت مەركىزىگە يەتكۈزۈشكە باشلىغانلىقىنى، ياردەمنىڭ 4 ئايرۇپىلان بىلەن يۆتكىلىدىغانلىقىنى، 240 توننا يىمەكلىكنىڭ شۇئاندا ئىككى ئورۇنغا تاپشۇرۇپ بېرىلگەنلىكىنى بىلدۈردى.