مەخپىي  كۆرۈنۈش
قۇربان ئابلىمىت


ۋەدە بېرىش ئاددىيلا بىر ئىش،
يالغان دەيمەن.
يىغلاپ تۇرۇپ بەرگەن ۋەدىنى،
توشقانغا ئۇۋا بولماس قومۇشلۇق،
قومۇشلۇقتا توشقان ئۆلۈكى.
باھار قېچىپ چىقار باغلاردىن،
ئېچىلغاندا ئۆرۈك چېچىكى.

ئۇچراپ قالسا تۆت قۇلاق،
بەخت يالغان كۈلدۈرەر مېنى.
كۆزۈم ئەمەس،
كۆرۈپ تۇرار يۈرىكىم سېنى.

ماڭا ئەۋەتىلگەن خەت ئەمەس،
مەندىن جاۋاب كۈتكەن سوئال ئۇ.
ھايات مېنى كۈلدۈرۈپ،
قىيناپ تۇرۇپ ئالار ئىمتىھان.
ھايات،
گۈل بەرگىدە ياتقان چاڭ－توزان.

بەخت كۈلدۈرەلمەس مېنى.
ھايات ئالدىيالماس مېنى،
سەبىيلىك.
قۇچىقىمدا ئويناپ ئولتۇرۇپ،
كۈلدۈرىدۇ ئۈمىدلىرىمنى.