ئاپتونوم رايوننىڭ توقۇمىچىلىق، كىيىم – كېچەك كەسپىنى راۋاجلاندۇرۇپ، ئىشقا ئورۇنلىشىشقا تۈرتكە بولۇش سۆھبەت يىغىنى 24 – مارت چۈشتىن كېيىن ئۈرۈمچىدە ئۆتكۈزۈلدى، يىغىندا بۇ يىل توقۇمىچىلىق، كىيىم – كېچەك كەسپىدە مۇقىم مۈلۈككە 27 مىليارد 600 مىليون يۈەن مەبلەغ سېلىپ، 67 مىڭ كىشىنى ئىشقا ئورۇنلاشتۇرۇش ئوتتۇرىغا قويۇلدى.
بۇ يىل ئاپتونوم رايون ھالقىسىمان پاختا يىپ ئېگىرىش ئۇرچۇقىنى 2 مىليونغا، ئايلانما لوڭقىلىق چاقنى 120 مىڭغا، توقۇش ئىستانوكىنى 1500گە، يىللىق كىيىم – كېچەك ئىشلەپچىقىرىش مىقدارىنى 50 مىليون يۈرۈشكە يەتكۈزۈش، ئائىلىدە توقۇلغان بۇيۇملار، گىلەم قاتارلىقلارنىڭ مەھسۇلات مىقدارىنى ئوخشاش مەزگىلدىكىدىن %20 ئاشۇرۇشنى پىلانلىدى.
ئاپتونوم رايونلۇق پارتكوم دائىمىي كومىتېتىنىڭ ئەزاسى، ئاپتونوم رايوننىڭ دائىمىي مۇئاۋىن رەئىسى خۇاڭ ۋېي سۆھبەت يىغىنىدا مۇنداق دېدى: ئورۇنلار ھەرىكەت لايىھەسىنى پۈتۈن كۈچ بىلەن ياخشى ئورۇنداپ، نۇقتىلىق ھالدا توقۇمىچىلىق، كىيىم – كېچەك سانائىتى رايونلىرىنىڭ ئۇل ئەسلىھە ۋە زاۋۇت ئۆيى قۇرۇلۇشىنى تېزلىتىش، سودىگەر ۋە مەبلەغ جەلپ قىلىش سالمىقىنى ئاشۇرۇش، كارخانىلارنىڭ ئىشچى قوبۇل قىلىش قىيىن بولۇش مەسىلىسىنى ھەل قىلىش، بازارنى غەربكە كېڭەيتىش قاتارلىق خىزمەتلەرنى تېز ئىلگىرى سۈرۈشى كېرەك. بولۇپمۇ ‹‹ئۈچ شەھەر، يەتتە رايون، بىر مەركەز››نىڭ باشلامچىلىق رولىنى ياخشى جارى قىلدۇرۇپ، بۇ يىل قۇرۇلۇشتا دەسلەپكى كۆلەم شەكىللەندۈرۈش كېرەك. پۇل مۇئامىلىنىڭ توقۇمىچىلىق، كىيىم – كېچەك كەسپىنى قوللاش تەدبىرلىرىنى ئەمەلىيلەشتۈرۈپ، مەبلەغ يۈرۈشتۈرۈش قىيىن بولۇش مەسىلىسىنى ھەل قىلىش كېرەك.
ئاپتونوم رايون 2014 – يىلى توقۇمىچىلىق، كىيىم – كېچەك كەسپىنى راۋاجلاندۇرۇپ، ئىشقا ئورۇنلىشىشقا تۈرتكە بولۇش خىزمىتىنى يولغا قويۇپ ياخشى نەتىجىگە ئېرىشتى، 2014 – يىلى ئاپتونوم رايون بويىچە توقۇمىچىلىق، كىيىم – كېچەك كەسپىدە مۇقىم مۈلۈككە 9 مىليارد 615 مىليون يۈەن مەبلەغ سېلىنىپ، ئالدىنقى يىلىدىكىدىن %76.1 ئېشىپ، تارىختا يېڭى رېكورت يارىتىلدى، يېڭىدىن 40 مىڭ كىشى ئىشقا ئورۇنلاشتى.