فىرانسىيە زۇڭتۇڭى خوللاند 6 – دېكابىر رۇسىيە زۇڭتۇڭى پۇتىن بىلەن موسكۋادا كۆرۈشكەندىن كېيىن، ئۇكرائىنا مەسىلىسىدە بەزى ئىجابىي نەتىجىلەرنىڭ قولغا كەلتۈرۈشىنى ئۈمىد قىلدى.
تەھلىلچىلەر مۇنداق قارىدى: ئۇكرائىنا كىرىزىسى ئۇزاققا سوزۇلۇپ ھەل بولمىغان، رۇسىيە ئامېرىكا بىلەن ياۋروپانىڭ جازا يۈرگۈزۈشى ۋە يېتىم قالدۇرۇشى نەتىجىسىدە قىيىن ئەھۋالدا قالغان، فىرانسىيەنىڭ ئىچكى سىياسىي ۋەزىيىتىدە ئۆزگىرىش يۈز بېرىۋاتقان ئەھۋالدا، خوللاندنىڭ ئويلىمىغان يەردىن رۇسىيەدە زىيارەتتە بولۇشى ‹‹دەل ۋاقتىدا›› بولدى، بۇنىڭدىن رۇسىيە بىلەن فىرانسىيە تەڭ نەپكە ئېرىشىدۇ، بۇنىڭ رايون جىددىي ۋەزىيىتىنى پەسەيتىشكە ئاز – تولا ياردىمى بولىدۇ.

ئۇكرائىنا كىرىزىسى مۇھىم نۇقتا

خوللاند 6 – دېكابىر قازاقىستان پايتەختى ئاستانەدىن پارىژغا قايتىش سەپىرىدە موسكۋادا توختاپ، پۇتىن بىلەن ۋنۇكوۋو ئايروپورتىدا ئىككى سائەت سۆھبەتلەشتى، ئىككى تەرەپ ئۇكرائىنا كىرىزىسىنى ھەل قىلىش توغرىسىدا مۇئەييەن ئورتاق تونۇشقا كەلدى.

خوللاند مۇنداق دېدى: ئۇكرائىنا كىرىزىسىدە توقۇنۇشۇۋاتقان ئىككى تەرەپ ھازىرقى شارائىتلاردىن تولۇق پايدىلىنىپ كىرىزىسنى تۈگىتىشى؛ مىنىسكى كېلىشىمىنىڭ ئومۇميۈزلۈك ئەمەلىيلىشىشىگە كاپالەتلىك قىلىپ، ئۇرۇشنى پۈتۈنلەي توختىتىشى كېرەك. توقۇنۇشۇۋاتقان ئىككى تەرەپ بەلگىلىمە بويىچە ئەسىرلەرنى ئالماشتۇرۇشى، ئۇكرائىنانىڭ زېمىن پۈتۈنلۈكىگە كاپالەتلىك قىلغان ئاساستا، سىياسىي جەھەتتە سۆھبەتلىشىشى كېرەك.

پۇتىن مۇنداق دېدى: ئۇكرائىنا كىرىزىسى سەۋەبلىك تالاپەت ئۈزلۈكسىز كۆپىيىپ، تىراگېدىيە كۆرۈلۈۋاتىدۇ. بىز قانلىق توقۇنۇشنى تېز توختىتىپ، ئۇكرائىنا تەۋەلىكىدە بىرلىككە كەلگەن سىياسىي مۇھىت يارىتىشقا قوشۇلىمىز. فىرانسىيە بىلەن ئۇكرائىنا كىرىزىسىنى ھەل قىلىشقا قاتنىشىۋاتقان غەربتىكى باشقا دۆلەتلەرنىڭ توقۇنۇشۇۋاتقان ئىككى تەرەپنى ئەسىرلەرنى ئالماشتۇرۇشقا كېلىشتۈرۈشكە يەنىمۇ تىرىشچانلىق كۆرسىتىشىنى ئۈمىد قىلىمەن.

ئۇكرائىنا زۇڭتۇڭى پوروشېنكو 6 – دېكابىر مۇنداق دېدى: دەسلەپكى قەدەمدە تۈزگەن كېلىشىم بويىچە، تەرەپلەر 9 – دېكابىر بېلارۇسىيە پايتەختى مىنىسكىدا قايتا سۆھبەت ئۆتكۈزىدۇ، بۇ قېتىمقى سۆھبەتتە ئىلگىرى ھاسىل قىلىنغان كېلىشىمنىڭ تەپسىلىي پىلانىنى ئەمەلىيلەشتۈرۈشنى بېكىتىشنى ئۈمىد قىلىمەن.

تەھلىلچىلەر مۇنداق قارىدى: فىرانسىيە بىلەن رۇسىيە رەھبەرلىرى 9 – دېكابىر ئۆتكۈزۈلىدىغان مىنىسكى سۆھبىتىدىن بۇرۇن ئۇچراشتى، ئۇلار پەيتنى ناھايىتى ياخشى تاللىدى دېيىشكە بولىدۇ، ئىككى رەھبەر ئاساسەن ئۇكرائىنا كىرىزىسىنى ھەل قىلىش مەقسىتىدە ئۇچراشتى.

خوللاند مۇنداق دېدى: پۇتىن بىلەن سۆھبەت ئۆتكۈزۈپ، مىنىسكى كېلىشىمىنىڭ ئۈنۈمىنى ھەقىقىي مۇئەييەنلەشتۈردۇق ھەم چېگرا رايوننى باشقۇرۇش – تىزگىنلەش قاتارلىق مەسىلىلەردە بەزى نەتىجىلەرنى قولغا كەلتۈردۇق. لېكىن، ئۇكرائىنا كىرىزىسىدە توقۇنۇشۇۋاتقان ئىككى تەرەپنىڭ سىياسىي جەھەتتە سۆزلىشىشى يەنىلا قىيىن بولۇپ، بۇنىڭغا خېلى ۋاقىت كېتىدۇ.

فىرانسىيەنىڭ تەسىر كۈچىنى ئاشۇرۇش

فىرانسىيەدىكى تاراتقۇلار مۇنداق دېدى: خوللاند ئۇكرائىنا كىرىزىسى كۈچەيگەندىن بۇيان موسكۋاغا زىيارەتكە بارغان غەربتىكى ئاساسلىق دۆلەتنىڭ تۇنجى رەھبىرى. بۇ قېتىم فىرانسىيە بىلەن رۇسىيە رەھبەرلىرىنىڭ تۇيۇقسىز ئۇچرىشىشىنى فرانسىيە تەۋسىيە قىلغان.

فىرانسىيە ‹‹فىگارو گېزىتى››نىڭ خەۋىرىدە مۇنداق دېيىلدى: بۇ قېتىمقى ئۇچرىشىش قارىماققا تۇيۇقسىز بىلىنسىمۇ، بۇ ئىش ئاللىبۇرۇن پىلانغا كىرگۈزۈلگەن. فىرانسىيە زۇڭتۇڭ مەھكىمىسى ئىزچىل خوللاندنىڭ موسكۋادا زىيارەتتە بولۇشى ئۈچۈن مۇۋاپىق پەيتنى كۈتكەن.

بۇ يىل 6 – ئايدا ئۇكرائىنا كىرىزىسى يەنىمۇ كەسكىنلىشىپ، رۇسىيە بىلەن غەرب ئەللىرىنىڭ توقۇنۇشى كۈچەيدى. خوللاند پۇتىننى فىرانسىيەدە ئۆتكۈزۈلىدىغان نورماندىيەدە قۇرۇقلۇققا چىقىشنىڭ 70 يىللىقىنى خاتىرىلەش مۇراسىمىغا ئالاھىدە تەكلىپ قىلىپ، دىپلوماتىيە سەھنىسى ھازىرلاپ، تەرەپلەرگە ئۇكرائىنا كىرىزىسى توغرىسىدا پىكىر ئالماشتۇرۇش پۇرسىتى ياراتتى. مۇراسىم ئۆتكۈزۈلۈشتىن بىر كۈن بۇرۇن پۇتىن فىرانسىيەدە ئامېرىكا زۇڭتۇڭى ئوباما، فىرانسىيە زۇڭتۇڭى خوللاند، گېرمانىيە زۇڭلىسى مېركىل، ئەنگلىيە باش ۋەزىرى كامېرون ۋە ئۇكرائىنا زۇڭتۇڭى پوروشېنكو بىلەن ئايرىم – ئايرىم ئۇكرائىنا كىرىزىسى توغرىسىدا سۆھبەت ئۆتكۈزدى. بۇ، تاراتقۇلارنىڭ يۈكسەك دىققىتىنى تارتتى.

غەربتىكى دۆلەتلەرنىڭ بېسىمىغا ئۇچراۋاتقان رۇسىيەگە نىسبەتەن، خوللاندنىڭ بۇ قېتىم زىيارەتكە كېلىشى دەل ۋاقتىدا بولدى، بۇ تاشقى مۇھىتنى ۋە رۇسىيە بىلەن ئامېرىكا، ياۋروپا ئوتتۇرىسىدىكى جىددىي مۇناسىۋەتنى ياخشىلاشقا ھەم ئۇكرائىنا كرىزىسىنى پەسەيتىشكە پايدىلىق.